هاوسەرۆکی پەژاک زیلان ڤەژین رایگەیاند، راپه‌ڕین و سه‌رهه‌ڵدانی ژنان له‌ئێراندا، كاریگه‌ری له‌سه‌ر هه‌موو جیهان داناوه و دۆخەکە ناگەڕێتەوە بۆ دواوە، داواشی کرد کە ئۆپۆزسیۆنی کوردی و ئێران بەرەیەکی یەکگرتوو دابمەزرێنن.
هاوسه‌رۆكی په‌ژاك؛ زیلان ڤه‌ژین تیشك ده‌خاته سه‌ر راپه‌ڕین و سه‌رهه‌ڵدانی گه‌لان له‌ئێران و رۆژهه‌ڵاتی كوردستان و ئاستی ئه‌و شۆڕشه له ماوه‌ی ئه‌و چل و شه‌ش رۆژیدا به‌رده‌وامه و ده‌ڵێت؛ ئه‌و رۆح و به‌رخۆدانه‌ی سه‌رهه‌ڵدێران، به‌پێشه‌نگایه‌تی ژنان ئه‌مڕۆكه كاریگه‌ری له‌سه‌ر هه‌موو جیهان داناوه، بووه‌ته هێمایه‌كی ئازادی و دیموكراسی بۆ هه‌موو ژنان و هه‌موو گه‌لان و مرۆڤایه‌تی و گه‌لانی بن ده‌ست و دیموكراتیكخواز. به‌شداربوونی گه‌ل به‌یه‌ك رۆح، به‌یه‌ك باوه‌ڕی، به‌بێ جیاوازی بیروباوه‌ڕ، مه‌زهه‌ب، دین و ره‌گه‌ز خۆی له‌خۆیدا ئاستێكی بڵنده‌ی له‌م راپه‌ڕین و سه‌رهه‌ڵدان و شۆڕشه‌دا.
ڤه‌ژین له‌سه‌ر رۆڵ و پێگه‌ی هێز و لایه‌نه ئۆپۆزسیۆنیه كوردی و ئێرانیه‌كانیش له‌م قۆناخه‌دا ده‌ڵێت:"ئه‌و هێزانه ده‌بێت به‌پێ خواسته‌كانی گه‌لان هه‌ڵسوكه‌وت بكه‌ن. گه‌لی ئه‌و هێز و لایه‌نانه‌ی پێشتر تاقی كردبێته‌وه، ئه‌وا جارێكی تر چانسی تاقی كردنه‌وه به‌و هێز و لایه‌نانه ناداته‌وه".
هاوسه‌رۆكی په‌ژاك ئه‌وه‌ش ده‌ڵێت؛ هێزه ئۆپۆزسیۆنه كوردی و ئێرانی له‌م قۆناخه‌دا ده‌بێت به‌ره‌یه‌كی یه‌كگرتوو دامه‌زرێنن، ئه‌م به‌ره‌یه هه‌م له‌به‌رژه‌وه‌ندی گه‌لی كورد و هه‌میش له‌به‌رژه‌وه‌ندی گه‌لانی ئێراندا ده‌بێت.
له‌دیمانه‌یه‌كدا هاوسه‌رۆكی پارتی ژیانی ئازادی كوردستان"په‌ژاك"، له‌سه‌ر سه‌رهه‌ڵدانی گه‌لان له‌رۆژهه‌ڵاتی كوردستان و ئێراندا ده‌ئاخفێت و هه‌ڵسه‌نگاندن بۆ ئاستی ئه‌و سه‌رهه‌ڵدان و راپه‌ڕین و شۆڕشه ده‌كات كه گه‌لان له‌ماوه‌ی ئه‌و چل و شه‌ش رۆژه‌دا پێگه‌یشتوون.
زیلان ڤه‌ژین؛ له‌كه‌سایه‌تی ژنی كورد، شه‌هید ژینا ئه‌مینی_دا، هه‌موو شه‌هیدانی راپه‌ڕینی گه‌لانی ئێرانی به‌بیرهێنایه‌وه و رایگه‌یاند؛ ئه‌و هیوا و ئاواته‌ی شه‌هیدانی راپه‌ڕیووی ئێران و رۆژهه‌ڵاتی كوردستان به‌سه‌ركه‌وتن تاجدار دەکەین. ئه‌و خه‌یاڵ و ئامانجه‌ی شه‌هیدان به‌مسۆگه‌ری دەگەیەننە سه‌ركه‌وتن، چونكه هه‌ر یه‌ك له‌و شه‌هیدانه، به‌هیوا و بڕوابه‌خۆبوون و ئیراده‌وه خۆڕاگرانه‌وه به‌شداری ئه‌و سه‌رهه‌ڵدانانه بون. به‌شداربوونیش به‌ئازایه‌تی و قاره‌مانیه‌تی و به‌جه‌ساره‌تێكی گه‌وره‌وه به‌شداریان له‌و سه‌رهه‌رهه‌ڵدانانه‌دا كرد. ته‌نانه‌ت شه‌هیدبوونیشیان دابووه پێش چاوی خۆیان و شه‌هاده‌تیشیان له‌به‌رچاو دانابوو. و له‌هه‌مانكاتدا ئه‌و كه‌سانه‌ی له‌ئێستادا له‌سه‌رشه‌قامه‌كان و كۆڵانه‌كاندا خۆڕاگری ده‌نوێنن و له‌به‌رامبه‌ر به‌و رژێمه دیكتاتۆره سڵاویان لێده‌كه‌م. ئه‌و رۆح و به‌رخۆدانه‌ی سه‌رهه‌ڵدێران، به‌پێشه‌نگایه‌تی ژنان ئه‌مڕۆكه كاریگه‌ری له‌سه‌ر هه‌موو جیهان داناوه، بووه‌ته هێمایه‌كی ئازادی و دیموكراسی بۆ هه‌موو ژنان و هه‌موو گه‌لان و مرۆڤایه‌تی و گه‌لانی بن ده‌ست و دیموكراتیكخواز. به‌شداربوونی گه‌ل به‌یه‌ك رۆح، به‌یه‌ك بڕوا، به‌بێ جیاوازی بیروباوه‌ڕ، مه‌زهه‌ب، دین و ره‌گه‌ز خۆی له‌خۆیدا ئاستێكی بەرزە له‌م راپه‌ڕین و سه‌رهه‌ڵدان و شۆڕشه‌دا. ئه‌مه‌ش نموونه‌یه‌كه له‌خۆڕاگری له‌سه‌رئاستی جیهان. پێشتریش چه‌ندین راپه‌ڕین و سه‌رهه‌ڵدانی كۆمه‌ڵگه‌ی ئێران و رۆژهه‌ڵات پێكهاتن، به‌ڵام له‌راستیدا ئه‌و سه‌رهه‌ڵدان و خۆپیشاندانه‌ی پێشوو زیاتر به‌به‌شێك له‌كۆمه‌ڵگه یا خود به چینێكی تایبه‌ته‌وه سنوردار ده‌بوو. ئه‌مه‌ش هه‌ر جاره وه‌كو كه‌م و كۆرتیه‌كی راپه‌ڕین و سه‌رهه‌ڵدانه‌كانی پێشووتر ده‌بینرا، بۆیه‌ش ئه‌گه‌ر كۆمه‌ڵگه هه‌موو به‌یه‌كه‌وه به‌شداری له‌راپه‌ڕین و سه‌رهه‌ڵدانه‌كاندا بكه‌ن، ئه‌وا به‌بێ گۆمان ئامانج و ئاواته‌كانی سه‌رهه‌ڵدێر و ناڕه‌زایه‌تیه‌كان ئه‌نجامێكی باشتری بگرتبایە. ئێدی ئه‌مڕۆكه ئه‌و رۆحی یه‌كبوونه، یه‌كانگیر و یه‌كگرتوو كه رۆحی ئازادیخوازی گه‌لانی ئێرانه یه‌كیان گرتووه، ئه‌و تۆڕه‌بوون و داواكاری ژنانه كه به‌ساڵانه له‌ژێر باڵاده‌ستی پیاو و سیسته‌می پیاو ـ ناوه‌نددا سه‌ریهه‌ڵداوه، به‌روونی ده‌بینرێت. بۆیه‌ش ئه‌و ئاسته‌ی ئه‌مڕۆكه پێش هه‌ر شتێك سنوره‌كان و به‌ربه‌سته‌كانی تێكشكاند و به‌هه‌موو جۆگرافیای ئێراندا بڵاوبوویه‌وه، ته‌نانه‌ت رۆژهه‌ڵاتی ناوین و جیهانیشی له‌ناواخنی خۆیدا گرته‌وه، ئه‌مه‌ش بۆ خۆی ئاستێكی بڵنده له‌و تێكۆشان و خۆڕاگریه‌ی گه‌لانی ناڕه‌زایی له‌خۆپیشاندانه‌كاندا.
ئێدی ئه‌و سیسته‌م و ده‌سه‌ڵات و به‌رێوه‌به‌رایه‌تی قابیلی گۆڕان نیه
له‌به‌ر ئه‌وه‌ی داواكارییه‌كان، داواكاریه‌كی ئایدیۆلۆژی و سیاسی و رێكخستنی و مێژوویی و کولتورییە، بۆیه‌ش به‌رده‌وامی خۆپیشاندانه‌كان و به‌هێزبوونی ئاست و كاریگه‌ری خۆپیشاندان و راپه‌ڕینه‌كه نیشانده‌دات. داواكاری گه‌ل، داواكاریه‌كی رۆژانه‌یی و بابه‌ته رۆژانه‌یه‌كانی كۆمه‌ڵگه و تاك نییه. داواكاری ژیانی ئازاد و دیموكراتی ده‌كه‌ن. ئه‌و حكومه‌ت و رژێمه نه‌ده‌توانێت چاره‌سه‌ری بخولقێنێت و رزیووه و ناتوانێت ببێته وه‌ڵامده‌ره‌وه‌ی داواكاریه‌كانی گه‌لان. ئێدی ئه‌و سیسته‌م و ده‌سه‌ڵات و به‌رێوه‌به‌رایه‌تی قابیلی گۆڕان نیه، بۆیه‌ش داواكاری گه‌لان، داواكاریه‌كی مافدار و به‌روومه‌تن و به‌بێ یه‌ك و دوو ده‌بێت بگه‌نه سه‌ركه‌وتن و ئامانجه‌كانی خۆیان. ئامانجی ئازادی و بۆ ئه‌وه‌ی ئه‌و ئازادیه‌ش پێكبێت، به‌سه‌دان قۆربانی دراوه، ئێش و ئازار و ئه‌شكه‌نجه‌یان بینیووه. وه‌كو كۆمه‌ڵگه‌ی كوردیش ته‌نیا له‌و سه‌رهه‌ڵدانانه‌دا نه، به‌ڵكۆ به‌ساڵانه وه‌كو كۆمه‌ڵگه‌ی ئازادیخواز له‌به‌رامبه‌ر به‌سیسته‌می ده‌وڵه‌ت نه‌ته‌وه، سیسته‌می دیكتاتۆر و تاكپارێز قۆربانیمان داوه. و له‌به‌رامبه‌ر به‌و قۆربانیانه‌ش هه‌میشه ده‌وڵه‌تی دیكتاتۆر ویستوویانه باڵاده‌ستی خۆیان و ده‌سه‌ڵاتی خۆیان بسه‌پێنن. به‌ڵام ئه‌مڕۆكه ئه‌و شۆڕشه‌ی به‌پێشه‌نگایه‌تی ژنان ده‌ستی پێكردوه، ئێدی هه‌ركه‌س هۆشیار بووه، واتا هۆشیاریه‌كه كه ده‌توانێـت سه‌ركه‌وتنی گه‌ل مسۆگه‌ر بكات.
كۆمه‌ڵگه هه‌میشه‌ییه و له‌شوێنی خۆیه‌تی، ئه‌وه‌ی كۆرت مه‌ودان و كورتخایه‌نن، ده‌وڵه‌ت و سیسته‌مه‌كانن. ئه‌گه‌ر كۆمه‌ڵگه ئه‌و سیسته‌م و به‌رێوه‌به‌رایه‌تیانه قه‌بوڵ نه‌كات، ئه‌وا ئه‌و سیسته‌م و به‌رێوه‌به‌رایه‌تیانه ناتوانن به‌رده‌وام بن و خۆیان به‌رێوه ببه‌ن و خۆیان له‌سه‌ر پێ رابگرن و هه‌میشه‌یی نابن. ٤٤ ساڵ پێش هه‌ر ئه‌م كۆمه‌ڵگه‌یه سیسته‌مێكی دیكتاتۆر و ده‌سه‌ڵاتداری به‌پێشه‌نگایه‌تی ژنان هه‌ڵوه‌شاند. ئه‌مرۆش هه‌ر به‌و رۆحه و پێشه‌نگایه‌تیه ئه‌و رژێم و حكومه‌ت تاکڕەو و ده‌سه‌ڵاتخواز و دیكتاتۆره قه‌بوڵ ناكات. ئه‌و ئاسته‌ی ئه‌مڕۆی راپه‌ڕینی گه‌لان، له‌ئاستی شۆڕشێكدایه. و ئه‌و قۆربانیانه‌ش له‌ئاستی شۆڕشێكدایه.
مێشك و هزری سیسته‌م زه‌بڕی كۆشنده‌ی به‌ركه‌وتووه
له‌به‌شێكی تری دیمانه‌كه‌یدا، هاوسه‌رۆكی پارتی ژیانی ئازادی كوردستان"زیلان ڤه‌ژین" ئاماژه به‌رۆڵی ژنان له‌هه‌ڵوه‌شاندنه‌وه و رووخانی رژێم ده‌كات و ده‌ڵێت:"له‌دنیادا ژماره‌ی ئه‌و سیسته‌م و ده‌سه‌ڵاتانه زۆرن كه هه‌م وه‌كو سیسته‌م و هه‌میش وه‌كو هه‌یكه‌له، رووخان و هه‌ڵوه‌شان. له‌هه‌ندێ شوێندا به‌هه‌ڵوه‌شاندنه‌وه‌ی ئه‌و سیسته‌م و ده‌وڵه‌تانه ده‌رفه‌تی وه‌رچەرخانی دیموكراتیانه یا خۆد زه‌مینه‌ی سیسته‌مێكی پێشكه‌وتووتر ره‌خسا، بەڵام پێش چل و چوار ساڵ كه سیسته‌می ده‌سه‌ڵاتداریه‌تی شاهه‌نشاهی ئێران له‌لایه‌ن گه‌لانی ئێرانه‌وه هه‌ڵوه‌شێندرا، كه‌چی سیسته‌مێكی هاوشێوه به‌هه‌مان زیهنیه‌ت و لۆژیكه‌وه هاته سه‌رده‌سه‌ڵات.
به‌ڵام ئه‌مڕۆكه كه به‌درۆشمی ژن، ژیان، ئازادی و به‌پێشه‌نگایه‌تی خودی ژنان ده‌ست به‌شۆڕش و راپه‌ڕین كراوه، زه‌برێكی مه‌زن له‌سیسته‌می تاكپه‌رست و ده‌سه‌ڵاتخواز، پیاو ـ ناوه‌ند و ره‌گه‌زپه‌ره‌ست دراوه. ئه‌م سه‌رهه‌ڵدان و راپه‌ڕینه‌ی كه به‌پێشه‌نگایه‌تی ژنان ده‌ستی پێكردوه، ته‌نیا زه‌بڕێك نییه له‌دژی رژێمی ئیسلامی ئێران، به‌ڵكۆ به‌گشتی زه‌برێكه له‌دژی هه‌موو ئه‌و سیسته‌م و ده‌سه‌ڵاتانه‌ی به‌ناوه‌ندگه‌رایی پیاوی ده‌سه‌ڵاتخواز به‌رێوه ده‌چێت. بۆیه‌ش رژێم تا ئێستاكه هه‌نگاوێكی به‌ره‌و چاره‌سه‌ری نه‌هاوێشتووه و پێداگری له‌سه‌ر زیهنیه‌ت و ده‌سه‌ڵاتخوازی خۆی ده‌كات. هه‌موو كه‌س ده‌زانێت ئه‌و سیسته‌مه ته‌نیا وه‌كو هه‌یكه‌لێك ماوه‌ته‌وه، چونكه مێشك و هزر و زیهنیه‌تی ئه‌و سیسته‌مه زه‌بری به‌ركه‌وت. ئه‌گه‌ر ئه‌م زیهنیه‌ته بڕۆخێ، هه‌یكه‌لیش ئێدی ناتوانێت خۆی له‌سه‌ر پێ رابگرێت و نموونه‌ی دیموكراتیكیش زۆرن بۆ ئه‌وه‌ی ببنه جێگره‌وه‌ی ئه‌و سیسته‌مه ده‌سه‌ڵاتخوازه. گه‌لیش خاوه‌ن ئه‌زموونه و ده‌توانێت ئێدی خۆی به‌رێوه ببات.
به‌هاری عه‌ره‌بی و وڵاتانی عه‌ره‌بی له‌به‌رچاوانن، شۆرش و سه‌رهه‌ڵدان پێكهاتن، به‌ڵام به‌هۆی ئه‌وه‌ی زیهنیه‌ت هه‌ر هه‌مان زیهنیه‌ت بوو و له‌زیهنیه‌تدا گۆڕانكاری پێكنه‌هات، بۆیه‌ش جارێكی تر حكومه‌تی ناوه‌ندی و ده‌وڵه‌تگه‌را شوێنگۆڕكێیان پێكرا. هه‌ره به‌رچاویش، ده‌وڵه‌تی عێراقه. ده‌وڵه‌ت و رژێمه‌كه‌ی سه‌ددام حۆسین هه‌ڵوه‌شا، به‌ڵام جارێكی تر سیسته‌مێكی ناوه‌ندی و ده‌وڵه‌تگه‌را دامه‌زرا.
تێكۆشانی گه‌لانیش و ئه‌و ئه‌زموونه‌ی گه‌لان پێگه‌یشتوون، ئێدی ناچاره كه له‌زیهنیه‌تدا گۆڕانكاری پێكبێت. چونكه ئه‌گه‌ر له‌زیهنیه‌تدا گۆڕانكاری پێكنه‌یه‌ن، ئه‌وا ئه‌و هه‌یكه‌ل و سیسته‌مه‌شی بۆنیاد بنرێن، ناتوانن ببنه وه‌ڵامده‌ره‌وه‌ی داوكاریه‌كانی كۆمه‌ڵگه. رووخانی سیسته‌م كارێكی ئاسانه، به‌ڵام گۆڕانیكاری زیهنیه‌تی كارێكی درێژخایه‌ن و تێكۆشانێكی دیموكراتیانه‌ی ده‌وێت. گۆڕانكاری زیهنیه‌تی، گۆڕانكاریه‌كی بنه‌ڕه‌تیه. له‌به‌ر ئه‌وه‌شه كه ژنی كورد و ژنانی ئێرانی و گه‌لی كورد و هه‌موو گه‌لانی ئێران له‌و زانابوون و هۆشیارییه‌دان كه كێشه‌ی سه‌ره‌كی و بنه‌ڕه‌تی سیسته‌م له‌كوێدایه. بۆیه‌ش سه‌ركه‌وتن به‌مسۆگه‌ری هی گه‌لانی ئێران بێت.
خاوه‌نده‌ركه‌وتن له‌شه‌هیدان، هه‌ڵوێستێكی شۆڕشگێڕانه‌یه
له‌به‌شێكی دیكه‌ی دیمانه‌كه‌یدا هاوسه‌رۆكی په‌ژاك تیشكده‌خاته سه‌ر خاوه‌نداری گه‌ل له‌یه‌كتر و به‌تایبه‌تی له‌شه‌هیدان و ده‌ڵێت؛ به‌راستی ئه‌و هه‌ڵوێستانه، هه‌ڵوێست و رۆحێكی شۆڕشگێڕیه. ئه‌و كه‌سانه‌ی شه‌هید بوون و شه‌هید ده‌بن، له‌به‌ره‌ی هه‌ره له‌پێش سه‌رهه‌ڵدان و راپه‌ڕینه‌كاندا جێگه‌ی خۆیان گرتووه و جێگه ده‌گرن. هه‌موو گه‌نجن، هیوا و ئاواتی زۆر جیاواز و گه‌وره‌یان هه‌یه، به‌ڵام ئه‌مڕۆكه له‌پێناو گشت كۆمه‌ڵگه گیانیان به‌ختده‌كه‌ن. خاوه‌نداریه‌تی له‌شه‌هیدان، به‌راستی نموونه‌یه. نموونه‌یه‌كه كه شایسته‌ی ئه‌م شۆڕشه‌یه. خاوه‌نداریه‌تی گه‌ل له‌شه‌هیدان به‌درۆشمی"شه‌هید نامرێ" له‌كه‌سایه‌تی شه‌هید ژینا ئه‌مینیدا و له‌هه‌موو شاره‌كانی رۆژهه‌ڵاتی كوردستان، جێگه‌ی شانازی و رێزه. هه‌م له‌كاتی به‌خاك سپاردن و هه‌میش له‌كاتی چله‌ی شه‌هیدان گه‌ل به‌شێوازێكی نموونه‌یه رێزیان لێگیراوه. گه‌ل خاوه‌نداری له‌شه‌هیدانی خۆیان دەکەن. ئه‌وه نیشان ده‌دات كه گه‌ل بە رۆحی شۆڕشەوە ژیان ده‌كات. و بۆ سه‌ركه‌تنی ئه‌و رۆحه پێشه‌نگایه‌تی و پێشڕه‌وی ده‌كات. بۆیه‌ش ده‌بێت ئه‌و هه‌ڵوێسته‌ی گه‌ل و خاوه‌نداریه‌تیه له‌شه‌هیدان به‌به‌هێزتر و به‌به‌رفراوانتر به‌رده‌وام بكات. دۆژمن په‌لامار ده‌دات و رێگری ده‌كا، ده‌بێت گه‌ل ئه‌و ئاسته‌نگی و به‌ربه‌ستانه په‌سه‌ند نه‌كه‌ن و تێپه‌ڕیان بكه‌ن. هه‌رچۆن تا ئێستا به‌و رۆحیه‌ته شۆڕشگێڕییه تێكۆشاوه، ده‌بێت له‌مه‌وبه‌دواوه‌ش به‌و رۆحیه‌تیه تێكۆشانی خۆی به‌رده‌وام بكات. خاوه‌نداری تاك به‌تاكی بنه‌ماڵه‌ی شه‌هیدان، تۆڕه‌یی و ره‌ق و كین له‌به‌رامبه‌ر به‌رژێم و دۆژمن زیاتر ده‌كات. بۆیه‌ش گرنگه هه‌ڵوێستی خاوه‌نداریه‌تی له‌شه‌هیدان مه‌زنتر و به‌هێزتر پێشبخرێت.
دایكانی ئاشتی رۆڵێكی مه‌زن له‌ئه‌ستۆیانه، ده‌بێت دایكانی ئاشتی بنه‌ماڵه‌ی شه‌هیدان به‌ته‌نیا به‌جێ نه‌هێڵن. ئه‌و دایكانه‌ی خاوه‌ن شه‌هیدن، با له‌نێو رێزه‌كانی دایكانی ئاشتیدا جێگه بگرن. ده‌بێت دایكانی به‌رێكخستن بوونی خۆیان به‌رفراوانتر بكه‌ن و له‌گه‌ڵ دایكانی ئێرانی و شه‌هیداندا به‌رێكخستن بوونی هاوبه‌ش، و چالاكی هاوبه‌ش پێكبهێنن. به‌تایبه‌تی له‌گه‌ڵ دایكانی به‌لووچ دا.
رژێم ده‌یه‌وێت راپه‌ڕین و سه‌رهه‌ڵدانی گه‌لان پارچه بكات
زیلان ڤه‌ژین له‌به‌رده‌وامی ئاخاوتنه‌كانیدا هه‌وڵه‌كانی رژێم بۆ دووبه‌ره‌كی نانه‌وه‌و پارچه‌كردنی ئامانجی سه‌رهه‌ڵدان وشۆڕشی گه‌لان له‌هێرشكردن و به‌ئامانجگرتنی گه‌لی كورد و به‌لووچ دا ده‌كات و ده‌ڵێت؛ ئه‌وه‌ی راستی بێت، له‌كاتی شۆڕشی گه‌لانی ئێرانیشدا، جارێكی تر به‌فتوای خۆمه‌ینی گه‌لی كورد له‌شاری پاوه‌وه بگره تا سنه كۆمه‌ڵكۆژكران، ده‌وڵه‌ت به‌هه‌موو شێوه‌یه‌ك په‌لاماری كوردانی دا و كۆشت و بڕی كوردانی پێكهێنا. ده‌وڵه‌ت و رژێمی ئێران به‌و هێرشانه‌ی له‌سه‌ر هه‌ر دوو پێكهاته‌ی كورد و به‌لووچ ده‌یه‌وێت ئامانجی خۆپیشاندانه‌كان به‌لارێدا ببات و ریزه‌كانی گه‌ل له‌به‌رامبه‌ر به‌بوونی سیسته‌م و رژێمه‌كه‌ی لاواز بكات. رژێمی ئێران زیاتر له‌هه‌موو پێكهاته و به‌شه‌كانی تری گه‌لانی ئێران په‌لاماری گه‌لی كورد و به‌لووچ ده‌دات، ئه‌مه‌ش به‌زانابوون پێكدێنێت. به‌درێژایی ته‌مه‌نی رژێمی ئیسلامی ئێران هه‌رێمی به‌لووچستان له‌كۆمه‌ڵێك خزمه‌تگۆزاری ته‌ندرۆستی، كۆمه‌ڵایه‌تی، په‌روه‌رده‌یی، سیاسی و ئیداری بێ به‌ش كراون، ته‌نانه‌ت ئاوی خواردنه‌وه و سیسته‌می په‌روه‌رده‌یی له‌و هه‌رێمه‌دا بوونی نییه، خه‌ڵك نه‌ده‌توانێت به‌زمانی خوی و نه‌ش به‌گشتی ده‌توانێت بخوێنێت. خامنه‌یی خۆی هه‌ڕه‌شه له كوردان و به‌لووچه‌كان ده‌كات. ده‌یه‌وێت هه‌ر شت له‌چاوی ئه‌واندا ببینێت، ئه‌وا له‌كاتێكدایه كه ئاستی ناڕه‌زایه‌تیه‌كان له‌تاران و شاره‌كانی تری ئێران هیچیان كه‌متر له‌شاره‌كانی كوردان و به‌لووچستان نییه. هه‌ر له‌دوو هه‌فته‌ی رابردوودا هێزه‌كانی سه‌ركۆتكه‌ری رژێم كۆشت و بڕی خه‌ڵكی به‌لووچیان كرد. ده‌بێت گه‌لان و پێكهاته‌كانی دیكه ئه‌و دووبه‌ره‌كیه سیاسیه‌ی رژێم به‌باشی لێكبداته‌وه. ده‌بێت رێگه نه‌ده‌ن رژێم سه‌رهه‌ڵدان و راپه‌ڕێنی گه‌لان پارچه بكات. گه‌لی به‌لووچ ده‌بێت زیاتر خۆیان به‌رێكخستن بكه‌ن و خاوه‌نداری له‌یه‌كدی بكه‌ن. رژێم ده‌یه‌وێـت زه‌مینه‌ی كۆمه‌ڵكۆژی خۆش بكات، ده‌بێت گه‌ل ریزه‌كانی خۆیان پته‌وتر بكه‌ن.
له‌هه‌مانكاتیشدا، كوردان رووبه‌رووی هه‌ڕه‌شه‌ن. چونكه كوردان خاوه‌ن بیروباوه‌ڕی و فه‌لسه‌فه‌یه‌كه. به‌تایبه‌تی فه‌لسه‌فه‌ی ژن، ژیان، ئازادی رژێم به‌باشی ده‌زانێت له‌كوێیوه سه‌رچاوه گرتوه. تاكی كورد و ژنی كورد خاوه‌ن ئه‌و فه‌لسه‌فه‌یه‌ن. و ده‌یانه‌وێت له‌گه‌ڵ گه‌لانی ئێرانیدا ئه‌م تێكۆشان تا سه‌ركه‌وتن به‌رده‌وام بكه‌ن. كوردانیش ده‌بێت یه‌كگرتوویی بوونی خۆیان له‌گه‌ڵ گه‌لانی ئازه‌ری و عه‌ره‌ب و فارسدا زیاتر پێشبخات. ده‌بێت خۆپیشاندانه به‌هه‌ندێ شوێندا سنوردار نه‌مێنن. ته‌واوكه‌ری یه‌كدی بن و هه‌موو بار له‌سه‌ر ئه‌ستۆی شارێكدا نه‌بێت. ده‌بێت لۆرستان و كوردانی خۆراسانیش بێده‌نگ نه‌مێنن و پێشه‌نگایه‌تی راپه‌ڕین و سه‌رهه‌ڵدانه‌كان بكه‌ن.
هیچ كام له‌هێزه ئۆپۆزسیۆنه كوردی و ئێرانی خاوه‌ن رێكخستن بوونی تایبه‌ت به‌ژنان نین
هاوسه‌رۆكی پارتی ژیانی ئازادی كوردستان"په‌ژاك"، زیلان ڤه‌ژین تیشك ده‌خات سه‌ر رۆڵ و پێگه‌ی هێزه ئۆپۆزسیۆنه كوردی و ئێرانیه‌كان و ده‌ڵێت؛ داواكاری گه‌ل چی بێ، ده‌بێت ئه‌و هێز و لایه‌نانه‌ش به‌گوێره‌ی داواكاریه‌كانی گه‌لان نزیكی شۆڕش و راپه‌ڕینی گه‌ل ببنه‌وه. ئێمه ده‌توانین هه‌م وه‌كو هێزه ئۆپۆزسیۆنه كوردیه‌كان و هه‌میش وه‌كو هێزه ئۆپۆزسیۆنه ئێرانیه‌كان به‌ره‌یه‌كی هاوبه‌ش له‌به‌رامبه‌ر به‌رژێم دامه‌زرێنین، ئه‌مه‌ش پێویستیه‌كی ئه‌م قۆناخه‌كه و پێویستیه‌كه كه ده‌توانێت له‌م قۆناخه خزمه‌ت به‌به‌رژه‌وه‌ندیه باڵاكانی گشت كۆمه‌ڵگه و سه‌رهه‌ڵدان و راپه‌ڕینی گه‌لان بكات. گه‌ل له‌و قه‌ناعه‌ت و باوه‌ڕیه‌دایه كه ئه‌م رژێمه ئێدی ناتوانێت به‌رده‌وام بكات. گه‌ل پێویستی به‌سیسته‌مێكی دیموكراتیك كه هه‌موو باوه‌ڕی، دینی، ره‌گه‌زی، مه‌زهه‌بی، ئه‌تنیكی و نه‌ته‌وه‌یی له‌خۆ بگرێت، سیسته‌مێكی وه‌ها كه بتوانێت وه‌ڵامده‌ره‌وه‌ی هه‌موو ئه‌و داواكاریانه‌ی گه‌لان بێت، شتێكی وه‌هایان ده‌وێت.
هه‌م وه‌كو ئۆپۆزسیۆنی كوردی و هه‌میش وه‌كو ئۆپۆزسیۆنی ئێرانی هه‌ر كه‌س و لایه‌نێك خاوه‌ن پلان و پرۆژه‌ی خۆیانن، هه‌ر كه‌س هه‌وڵده‌دات له‌ئاست ئه‌و تێكۆشان و به‌رخۆدانه‌ی گه‌لان ببنه وه‌ڵامده‌ره‌وه. ئه‌وه‌ش راستیه‌كه له‌گه‌ڵ ئه‌وه‌ی به‌ساڵانه له‌تێكۆشاندان به‌ڵام نه ئۆپۆزسیۆنی كوردی و نه‌ش ئۆپۆزسیۆنی ئێران خاوه‌ن ئه‌و تێڕوانین و هزر و لۆژیكه نین كه گه‌ل داواكارن، بۆیه‌ش ئه‌م شۆڕشه‌ی ئێستا ده‌ستی پێكردوه، راسته راست شۆڕشی ژنان. به‌ڵام هیچ كات له‌و هێز و رێكخستنانه خاوه‌ن هێزی پاراستنی ژنان، هێزی به‌رێكخستن كردنی ژنان خۆیی نین. كام هێز خاوه‌ن پرۆژه‌یه‌كی دیموكراتیك و هاوچه‌رخه. ته‌نیا كه‌ژاره"كۆمه‌ڵگه‌ی ژنانی ئازادی رۆژهه‌ڵاتی كوردستان"ه كه ئه‌و ئیراده‌یه‌ی له‌خۆی نیشانداوه و له‌ئاستێكی هه‌ره بەرزدا خۆی بۆنیادناوه و خۆی به‌رێكخستن كردوه. ئه‌مه‌ش له‌رۆژێكدا پێكنه‌هاتووه، ئه‌وه ماوه‌ی بیست ساڵه به‌پێشه‌نگایه‌تی كژار خۆی له‌رۆژهه‌ڵات به‌رێكخستن كردوه. ئه‌وه‌ش نیشانی ده‌دات كه كێ ده‌توانێت پێشه‌نگایه‌تی ئه‌م قۆناخه بكات و خاوه‌ن ئه‌و هێز و بیركردنه‌وه‌یه، ئه‌وه‌ش به‌ئاشكرا و روون له‌به‌رچاوانه.
گه‌ل بۆ دواوه ناگه‌ڕێنه‌وه، ئه‌وه‌ی تاقی كرابێته‌وه گه‌لی تاقی ناكاته‌وه
ئه‌و هێز و ئۆپۆزسیۆنانه‌ی ده‌یانه‌وێت خۆیان وه‌كو ئه‌ڵته‌رناتیڤ"جێگره‌وه"نیشان بده‌ن، ئێدی چانسی بوونه‌وه‌ی به‌دیلی ئه‌م رژێمه‌یان له‌ده‌ستداوه، ئه‌وان بۆ خۆیان زه‌بر و زه‌ره‌ری هه‌ره مه‌زنیان له‌كاتی خۆیدا له‌گه‌ڵدا داوه. كۆشت و بڕی هه‌ره مه‌زنیان له‌سه‌ر كوردان به‌رێوه برد. چل و چوار ساڵ پێش ئێستا ئه‌و گه‌ل، سیسته‌مێكیان هه‌ڵوه‌شاند، ئێدی جارێكی تر بۆ دواوه ناگه‌ڕێنه‌وه و ئه‌وه‌ی تاقی كراوه‌ته‌وه، تاقی ناكاته‌وه. كۆماری كوردستان له‌مه‌هاباد به‌ده‌ستی ئه‌و هێزانه رووخا. بیركردنه‌وه‌ی ناوه‌ندگه‌رایی و ده‌سه‌ڵاتخوازی و تاكپه‌ره‌ستی و ده‌وڵه‌تگه‌رایی مایەپووچ بووە و شکستی هێناوە، كه‌س ناتوانێت به‌پشت به‌ستن به‌و زیهنیه‌تانه كۆمه‌ڵگه به‌رێوه ببات، یا داواكاریه‌كانی گه‌لان جێبه‌جێ بكه‌ن، راسته داوكاری ئازادی هه‌یه، به‌ڵام گۆڕانكاری هزری و زیهنی پێكنه‌یه‌ت، موممكن نییه، گه‌ل ئه‌و هێز و لایه‌نانه وه‌كو رابردوو قه‌بوڵ بكات.
هاوسه‌رۆكی پارتی ژیانی ئازادی كوردستان"زیلان ڤه‌ژین"، له‌سه‌ر هه‌وڵه‌كانی په‌ژاك له‌پێناو دامه‌زراندنی به‌ره‌یه‌كی یه‌كگرتوو بۆ تێكۆشان ده‌ڵێت؛ له‌ئێستادا بۆنیادنانی به‌ره‌یه‌كی دیموكراتیك مه‌رجه. ئێمه پێشتریش له‌یازده خاڵدا پێشنیارنامه‌یه‌كمان بۆ هه‌موو لایه‌ك بڵاوكرده‌وه، بۆ ئه‌وه‌ی له‌سه‌ر ئه‌و خاڵانه تێكۆشانێكی هاوبه‌ش و به‌ره‌یه‌كی هاوبه‌ش نه‌ته‌وه‌یی دامه‌زرێنین كه هه‌م له‌به‌رژه‌وه‌ندی گه‌لی كورد و گه‌لانی تری ئێراندا بێت. ئه‌گه‌ر ئێمه یه‌كگرتوو نه‌بین، ئه‌وا گه‌ل پێشه‌نگایه‌تی خۆی دامه‌زرێنێت.
وه‌كو په‌ژاكیش پرۆژه و پلان و به‌رنامه‌كانمان كه پشت به‌فه‌لسه‌فه و بیروهزری رێبه‌ر ئاپۆوه ده‌به‌ستێت، به‌هۆی گه‌ردوونی بوونی هزر و فه‌لسه‌فه‌كه‌مانه‌وه، ده‌توانێت هه‌م وه‌كو سیسته‌م و هه‌میش وه‌كو بیروهزر هه‌ر كه‌س له‌نێوخۆیدا به‌جێ بكات و كۆمه‌ڵگه به‌هه‌موو ره‌نگ و جیاوازیه‌كانیه‌وه تێدا به‌شدار بن.
هـ . ب
