ئێوارەی ئەمڕۆ دووشەممە، لە پارکی خەیام لە شاری کەرکوکی باشوری کوردستان، بەسەرپەرشتی 'ڕێبوار تەها' پارێزگاری کەرکوک و لەژێر ناونیشانی "پێکەوەژیان لەنێوان پێکهاتەکان"، فیستیڤاڵی پاریس بۆ کاری دەستی و بەرهەمە ناوخۆییەکان لە شاری کەرکوک سازکرا، بڕیارە فیستیڤاڵەکە تاوەکو کاتژمێر ١٢ی شەو کراوە دەبێت.

جێگای باسە، فیستیڤاڵەکە بەمەبەستی گرنگیدان و بەبازاڕکردنی بەرهەمی خۆماڵی و پیشەی تایبەت و کاری دەستی بوو، لە ڤستیڤاڵەکەدا بەشداربووانی سەرجەم پێکهاتەکانی شارەکە بەشداربوو بوون، لەنێوان بەشداربووانیش کاک ئازاد جووتیارە نموونەیەکەی شاری هەڵەبجە وەکو میوان سەردانی ڤستیڤاڵەکەی کردبوو، هەروەها دەیان کەس بەرهەم و کارە دەستییەکانی خۆیان نمایش دەکرد، جگە لەوەش ژمارەیەکی زۆر لە ژنان بەشداری ڤستیڤاڵەکە بوون و تێیدا بەرهەمەکانیان نمایش کردبوو کە پێکهاتووە لە بەرهەمە خۆراکییە ناوخۆییەکان و کاری دەستی ژنان وەکو دەست بەند و ملوانکەی ڕەنگاو ڕەنگ، دەرمانی جوانکاری، گوڵ و نەمام، چنین و چەندین کاری دیکەی دەستی ژنان، هەروەها بەشێکی دیکەی ڤستیڤاڵەکە پێکهاتبوو لە خواردنی میللی گەلی کورد لەنێوانیاندا کەلانە و چەندین خواردنی دیکەی کوردەواری.

کاک ئازاد جووتیارە نموونەیەکەی شاری هەڵەبجە کە وەکو میوان سەردانی ڤستیڤاڵەکەی کردبوو، بۆ ئاژانسی هەواڵی فوڕات (ANF) دوا و گوتی: "ئەو فیستیڤاڵانەی کە ئەیبینم بەشێکە لە بازاڕکردنی بەروومەکانی هەرێمی کوردستان، لە هەمووی گرنگتریش ئەو خانمە دەستڕەنگینانە و ئەو گەنجانەی کوردستانن کە تائێستا بەهرە و تواناکانیان ونە بەڵام لەم جۆرە فیستیڤاڵانە دەرئەکەوێت کە میللەتی کورد چەند دەست ڕەنگینە، من وەکو جووتیارێک حەزئەکەم هەموو گوندەکانی هەرێمی کوردستان فیستیڤاڵی تێدا ساز بکرێت بۆ بەرهەمی گوندەکان و شارەکان، لە هەر شوێنێکیش فیستیڤاڵ هەبێت من زۆر خۆشحاڵم کە وەک جووتیارێک ئامادەم بەشداری تێدا بکەم".

ئایا کەرکوکی کچێکی دەست ڕەنگین و دیزاینەری گوڵی سروشتییە، سەبارەت بە ڤستیڤاڵەکە  بۆ ئاژانسی هەواڵی فوڕات (ANF) گوتی: "من وەکو کچێکی کورد توانیم بەشداری بکەم لەم فێستیڤاڵە گەورەیە کە فیستیڤاڵی 'پاریس'ە تاوەکو بتوانم وەکو کچێکی کورد بەهرە و بەرهەمەکانم نمایش بکەم، لەم فیستیڤاڵەدا کاری دەستڕەنگینی من بریتییە لە دزاینەری و ڕازاندنەوەی گوڵی سروشتی و گوڵی سروشتی ئەفرۆشم، حەزم بەم کارە هەیە چونکە گوڵی سروشتی وەکو نەتەوەکانی کەرکوک جوان و فرە ڕەنگە".

ئایا کەرکوکی، لە درێژەی قسەکانیدا، گوتی "لەم فیستیڤاڵە بەشداریم کرد تاوەکو بەهرەی خۆم پیشان بدەم و خەڵکی ببینێت کە هەموو بەشداربووان خاوەن بەهرەیەکی تایبەت بەخۆیانن و هەر یەکەیان دەستڕەنگینییەکی خۆی هەیە لە کاری دەستی و پیشەی تایبەت بەخۆی، ئێمەی کچانی دەست ڕەنگین کە بەشداری ئەم فیستیڤاڵە بووینە تاوەکو نیشانی بدەین کە کچان بێهێز نین و خاوەن بەهرەی تایبەت بەخۆیانن".