سەرم لە وەراوەر بەژن و باڵاێ گشت شەهیدەیل جمشت شووڕشگەرانەێ “ژن، ژیان، ئازادی” چەمنم و سڵام گەرم هنارم ئەڕا گرد گەلان ئێران و وەتایبەت ئەڕا خەڵک شووڕشگەر رووژهەڵات کوردستان “لە سەقز و سنە و بانە و مەهاباد تا خورماوە و کرماشان و قەسر و شاباد، لە ئورمیە و بۆکان تا ئیلام و ئاودانان” ک وە پاوەگەزدان خوەێان نیشان دان ک بێوچان دریژە وە جمشت شووڕشگەرانەێ “ژن، ژیان، ئازادی” دەن و بەرجد رەسننەێ وە سەرکەفتن. چلەێ شەهید ژینا، وەڕاسی پەیام بەردەوامیی شووڕش وەگەرد خوەێ ئاورد و مزگانیدەر سەرکەفتن بی و هەرکەسیش ئی پەیامە گرت.

خاڵەیل بنەڕەتی ک توەنێمن لەی قۆناخە ئاماژە وە پێیان بکەرێمن:

١- هیچ چەکێ چەنە دروشم “ژن، ژیان، ئازادی” نیەتوەنێ جمهووریی ئسڵامی ئێران بێ‌هاز بکەێ و ئەڵشکنێ. پێشەنگەیل گەل، وەتایبەت ژنەیل و دتەیل ک وەناو خێاوان و دەبستان لە وەراوەر هێزەیل سەرکۆتکەر و دڕندەێ کوومار ئسڵامی وسیانە، توەنن هەناس ئێ رژیمە ئەڕا هەمیشە بوڕن. هیچ دروشمی چەنە “ژن، ژیان، ئازادی” شۆڕشگەرانە، رادیکاڵ و دمۆکراتیک نییە. سەرکەفتن شووڕش ژنان، گەوراترین دەسەوەریی (زهمانت) ئەڕا وەدیهاتن دمۆکراسی و ئازادی و یەکسانی لە ڕووژهەڵات کوردستان و ئێرانە. دڵنیا بوون ک زاڕووەل، لە بانان، دەناو پرتووکەل خوەێان خوەنن ک: جەهان و وەتایبەت رووژهەڵات ناوڕاس، فرە چشت دەیندار شووڕش ژنەل ئێران و رووژهەڵات کوردستانە.

٢- جمشت شووڕشگەرانەێ “ژن، ژیان، ئازادی” ک گشت ئێران گرتێیەسە وەر، سەروتەپ ئەڵ سەران کوومار ئسڵامی و دەمودزگایل سەرکوتکەرێ شێوانێیە و سەرکوتکەرەیل شەکەت کردێیە. پێشەنگەیل و لیدرەیل ئێ شووڕشە (لە کوڵان و مەحەلەێ شارەیل)، تا ئێسکە وە خاسی توەنسنە وە شێواز خوەێڕێڤەبەری (یا وژگەردان)، جمشت شووڕشگەرانەێ “ژن، ژیان، ئازادی” وەرەو نوا بوەن و دیمەن پێشکەفتنخواز و پڕ ئمێد شووڕش بپارێزن. ئەڕا یە، گشت پیلانەل نگریس دەزگاێ ئتڵاعات و پۆلیس و سپا بێکاریگەر بینە. جمشت شووڕشگەرانەێ “ژن، ژیان، ئازادی”، شووڕش گەل لە وەراوەر ترۆر دەوڵتییە. جمشت شووڕشگەرانەێ “ژن، ژیان، ئازادی” پاشخوان چل‌وسێ ساڵ ملهوڕی و بێعداڵەتی و ستەمە. ئێ جمشت شووڕشگەرانە وە هیچ هاز (هێز) دەرەکیێ پشت نەوەسییە و رادیکاڵترین ئرادەێ خەڵک ئازادیخوازە ئەڕا لابردن دیکتاتۆر و وەسەرکارهاوردن سیستەم دمۆکراتیک گەل. پشتێوانی کردن لەی جمشت شووڕشگەرانە و جیگرتن وەناوێ، خەسپەن (وەزیفەێ) ئەخڵاقیی هەر ئازادیخوازێکە.

٣- یەێ گلێ ترەک دیمن ک رێبەر ئاپۆ، چنەو فەڵسەفەێ بتەوێک ئەڕا ئازادیی ژنەیل، گەل کورد و گشت ئنسانییەت ئافراندێیە ک هەرکەس بخوازێ ئنکارێ بکەێ یا لە وەراوەرێ بووسێ، تەنیا زەنگ‌زڕیان دووە بەشێ. کەسان درووزنێ ک وە بێشەرمی سەرچەوەێ دروشم “ژن، ژیان، ئازادی”، ئنکار ئەکەن تا شووڕش وەرەو لاڕێ بووەن یا بکەنەێ مڵک خوەێان، خزمەتکار دەربار پەهڵەوی و دیوەخان بارزانی‌ین؛ داوڵ سیاسی‌ین! بەڵام ئێ پەلەقاژە ئەنجامێ ئەڕاێان نەێرێ. جمشت شووڕشگەرانەێ “ژن، ژیان، ئازادی”، چنەو لافاوێکە ک گشت داوڵەیل شڕ و بەدماژەێ سیاسی، بنبڕ کەرێ و وەگەرد خوەێ دەرێ.

٤- ژنەیل و جوانەیلێ ک جمشت شووڕشگەرانەێ “ژن، ژیان، ئازادی” خستن ئەوڕێ، ماف (حەق) رەواێ خوەێانە ک لە وەراوەر هێرشەیل دڕندانەێ هێزەیل رژیم، وەرگری ئەژ خوەێان بکەن. ئێجوور پاراستنێک، مەدەنی و دمۆکراتیکە و هیچ‌کەس نیەتوەنێ یە وە ناڕەوا بزانێ. هەرچی رژیم ئێران وەسەر کوشتن و گرتن و سەرکوتکردن پامل بکەێ، جمشت شووڕشگەرانەێ “ژن، ژیان، ئازادی”یش وەناچار توندترەو بوود. هەر گولەێ ک رژیم ئێران تەقنێ ئەڵ خەڵک، گامێ ترەک خوەێ وە کەن (هەڵدێر) داڕمان نزیک‌تر ئەکا. هەناێ رژیم ئێران گشت بنەمایل ئنسانی پاماڵ کەێ و وەحشیانە هێرش کەێدە سەر خەڵک و کوشت‌وبڕ دکەێ، بێگومان گەلیش دەس‌ئەوبان‌دەس نەێمینێ. هیچ گەلێ، نەێچووە ژێر بار یە ک تەماشاوان مەرگ خوەێ و رووڵەیلێ بوو. گەل، پاشخوان هێرەشەگان رژیم دەێد و یە رەواترین ماف (حەق) گەلە ئەڕا پاراستن گیان و ژیان خوەێ. بێگومان کوومەڵگەێ جەهانی، پشتگیری لە داخوازییەگان کوومەڵگەێ ئێران و خوەێپارێزین گەل کورد و بەلووچ و تورک و عەرەب و گەلان ترەک ئیران دکەێ. رژیم ئێران، هەرچەنیش سناریۆسازی بکەێ، وە دڵنیایی خەڵک فرێو نیەخوەێ و خێاوان چووڵ نیەکەێ. چۆن ک دی خوارترین ئاست داخوازی (کەف موتاڵبات) و بانترین ئاست داخوازیی (سەقف موتاڵبات) گەل، یەکەوگرتنە و بینە وە یەێ چشت: ژە بەێن بردن دیکتاتۆری و دامەزرانن سیستەم دمۆکراتیک گەل. یە داتەک (قانوون) ژیانە ك ئەگەر خوەت گووڕانکاری نەکەی، وە زوورەملێ گوەڕننەت. ئەڕا یە، گەلان ئێران بڕیار گوەڕانن جمهووریی ئسڵامی دانە. هرچشت ئەژ جاێ خوەێ ئەڵترازیاێە و دی کەس وەرەو دما گل نیەخوەێ.

٥ـ فرە حەوەجەس ک وەختێ شارێگ کەفێیە وەردەم هێرش و پەلامار هێزەیل دڕندەێ جمهووری ئسڵامی، شار و مەڵوەنەیل ترەک ئەڵسنە سەرپا و ئەو شارە وە تەنیا نەیلن. ئەڕا یە ک ئێ جمشت شووڕشگەرانە، چارەنڤیس گشت گەل کورد و خەڵک ئێران دیار کەرێ.

٦ـ ژنەیل و جوانەیل ڕێبەریل ئێ جمشت شووڕشگەرانەسەن و یە دی حەقیقەتێکە ک کوومەڵگەێ ئێران و رووژهەڵات وە گیان و دڵ قەبوولێ کردێیە. رێبەرەیل و لیدرەل هەر شار و خێاوان و کۆڵان، خەسپەن فرە گەپێ کەفتێیە وە سەر شانێیان. وە هووشیاری و رووح شووڕشگەرانە توەنن خەڵک ئاراستە بکەن. ئوو ئێجوورە سەرهەڵدانەیل بڕەسننە ئاست گشتگیرتر و فرەترێ.

٧ـ زانکۆەگان بینەسە مەێدان گەوراێ شووڕش و بێگومان جوانەیل ئاگا توەنن دە بانان نزیکێ ک جمشت شووڕشگەرانەێ “ژن، ژیان، ئازادی” سەرکەفێد، نواێ وەدیهاتن هەر جوور دیکتاتۆر و سیستەم ناوەندگەرا (مەرکەزگەرا) و فاشیستیێ بگرن. گەلان ئێران هەم زانن چە نەێخوازن و پێویستە چە داڕمنن و هەمیش زانن چە تووان و چە دامەزرنن. لە ئێران و کوردستان دماێ سەرکەفتن شووڕش “ژن، ژیان، ئازادی”، نە ئەڕا ئسڵام سیاسیی دەسڵاتخواز جیێگ هەس، نە ئەڕا دیکتاتۆریی سەڵتەنەتی و نە ئەڕا دیکتاتۆرییەێل خێڵەکی (ک ئاوەخت بڕیگ لە سەران ئەحزاب کڵاسیک کوردە). تەنیا چشتێ ک شایان “ژن، ژیان، ئازادی”یە، دامەزرانن دمۆکراسیی گەلانە.

جمشت شووڕشگەرانەێ “ژن، ژیان، ئازادی” وە رەنج و خەبات ژنەیل و گەل، وەپرتاف وەرەو سەرکەفتن دچوو. هەر دڵێگ ک کەمێ ئشق و ئەڤین ئازادی وەناوێ بوو، ئمڕوو ئەڕا رووژهەڵات کوردستان و ئێران رپەڕپ کەێ.

ژ.ت