" کاتێک کورد ناتوانن پێناسەکی یەکگرتویان بۆ (تورکیا،ئێران و ئیسرائیل) هەبێ، چۆن دەتوانن جۆری مامەڵەیان لەگەڵی دیاری بکەن.فەلەستینی و عەرەبەکانیش بە هەمان شێوە. دەیان ساڵە ئیمە باجی ئەو مامەڵە پەرتەوازەیەمان دەدەین!"
تەنها چەند مانگێک بەسەر هەڵبژاردنەکانی تورکیادا تێپەڕیوە و مێژویەکی ئەوەندە دور نیە کە خەڵک بیری چوبێتەوە،نە کورد نە تورک و نە گەلانی ناوچەکە بیرمان نەچوەتەوە، کورد لە تورکیا بە هەردوو باسکی سیاسی و سەربازیەوە بڕیارێکی شارستانیانە و سەردەمیانەی وەرگرت، باسکە سەربازیەکەی بڕیاری ئاگربەستی یەک لایەنەی دا بە هەڵپەساردنی شەڕ و جوڵەی چەکداری هەتا دوای هەڵبژاردنەکان، لە لایەک بۆ فەراهەمکردنی زەمینەیەکی شیاو و ئارام بۆ ئەنجامدانی پڕۆسەیەکی دیموکراتی پاک و بێ کێشە کە هەڵبژاردنە، لە لایەکی تریش وەک نامەیەکی سیاسی بۆ دوای پڕۆسەکە کە لە ئەگەری گۆڕانکاری لە بڕیاری سیاسی تورکیادا زەمینەی بەردەوامی ئاگربەست لەبار بێ بۆ درێژەدان و گۆڕینی بۆ پڕۆسەیەکی ئاشتی درێژخایەن لەگەڵ باسکی سیاسی کورد لە ناو تورکیا، گواستنەوەی چارەسەری قەزیەی کورد لە گۆڕەپانی پێکدادانی چەکداریەوە بۆ هۆڵی پارلەمان و سیاسەت.
بەداخەوە ئەردۆغان و حیزبەکەی هاوشێوەی کۆی دەسەڵاتدارانی ئەم ناوچەیە نەیانتوانیوە کەلتوری بەکارهێنانی هێز و دەسەڵات تێپەڕێنن، نەیانتوانیوە کەلتوری داگیرکاری و سڕینەوەی ئەوانی تر تێپەڕێنن.
هەروەک چۆن دەسەڵاتدارانی ئیسرائیل نەیانتوانیوە ئەو کەلتورە تێپەڕێنن.
تەکنۆلۆجیای سەربازی و گەورەیی قەبارەی ئابوری هەر وڵاتێک تەنها پێنوێنی پێشکەوتنی ئەو وڵاتە نین،دیدی بڕیار بەدەستان و بڕیاردەارانی بۆ گەلانی تر، بۆ مرۆڤ، بۆ ژینگە،بۆ مێژوو، بۆ ئاین، بۆ کەلتور و فەرهەنگ، ڕوی دەرەوە و کاریگەر و تەواوکەری ئەو شارستانیەت و پێشکەوتنەن.
مەگەر ئیسرائیل،تورکیا و ئێران لە هەرە سێ گەورەترین دەسەڵاتدارەکانی ئەم ناوچەیە نین؟
لە هەمان کاتیشدا لە ناشیرینترین و دڕەندەترین دەسەڵاتدارانی ناوچەکەشن!
دەسەڵاتدارانی ئیسرائیل بە فەلەستینیەکان دەڵێن (مرۆڤە ئاژەڵەکان).
دەسەڵاتدارانی تورکیا بە کورد دەڵێن (تورکی کێوی).
دەسەڵاتدارانی ئێران بەهەر مرۆڤێکی غەیرە شیعە دەڵێن (کافر)
ئەم سێ ئەقڵیەتە لە ناوەرۆکدا یەک ئەقڵیەتی چەقبەستوی (دۆگما) ی چەندین سەدە لەمەوبەرن.
دەسەڵاتدارانی ئیسرائیل بە فەلەستینیەکانی غەزە دەڵێن بڕۆنە دەرەوە لە غەزە،بچن بۆ مصر لەوێ بە سڵامەتی بژین،غەزەمان بۆ چۆڵ بکەن هەتا کاول و تەختی زەوی دەکەین و گروپەکەی حەماس لە ناو دەبەین،دواتر بگەڕێنەوە بۆ خۆتان ئاوەدانی بکەنەوە(ئەوە دوا سۆز و بەزەیی دەسەڵاتدارانی ئیسرائیلە،بە حساب زۆریش خاتری فەلەستینیەکان دەگرن،مۆڵەتی دەربازبونیان پێ دەدەن).
ئێران چەند هەفتەیەک مۆڵەتی دایە کوردە ئاوارەکانی کامپەکان لە باشوری کوردستان و کەمپەکانی پێ چۆڵ کردن، ئێستاش داوای ڕادەستکردنەوەیان دەکات بۆ ئەوەی لە سێدارەیان بدات، ئەوە دوای ئەوەی چەندین جار لە ساڵانی ڕابوردودا بۆمبا بارانی کردون یان هێرشی ڕاستەوخۆی سەربازی کردوەتە سەریان.
تورکیا پاشای تاوانەکانە لەو بوارەدا، هەموو توانا جاسوسی و سەربازیەکانی، هەموو تەکنۆلۆجیا سەربازیەکەی، هەموو هزری دەسەڵاتداری ئاراستەی سەرکوت و لە ناوبردنی کورد کردوە لەم ناوچەیە، دەیان جار بۆردومانی کەمپی مەخموری ئاوارە کوردەکانی کردوە، کورد لە سێ پارچەی کوردستان لە ئێستادا ڕۆژانە دەبنە قوربانی هێز و جاسوسەکانی تورکیا.
جاسوسەکانی بە ئاشکرا هەڕەشە لە کوردانی باشور دەکەن (یان دەبیە جاسوسمان یان تیرۆرت دەکەین).
ئەم سێ کوچکەی یەک بنەچە لە دەسەڵاتداری،کە یەک هزری توندڕەوی کۆنەپەرستانەی دژە مرۆڤایەتی و دیموکراسی و بەیەکەوە ژیانی مرۆڤایەتی ئاوی ئاشی ئایدیۆلۆجیانە،هەسێکیان یەکتری تەواو دەکەن،بۆ ئەو مەبەستەش هەردوو گەلی ستەمدیدەی کورد و فەلەستینیان کردوەتە سوتەمەنی بەردەوامی دەسەڵاتەکانیان، بەردەوامی هەردوو کێشەی کورد و فەلەستین وەک بیانوی بەردەوامی بە خەونە خلافەتیەکانیان بەکاردێنن.
لەوەتەی ئەم دەسەڵاتدارانە هەن گەلانی ئێمە بۆ بەرژەوەندی خۆیان بەرامبەر بەیەکتر بەکار دێنن،ڕۆڵەکانمان لە شەڕی بەردەوامی ئەم ناوچەیەدا دەکەنە قوربانی.
وڵاتەکانمان کاول دەکەن، سەرەوت سامانە سروشتی مرۆییەکانمان بە تاڵان دەبەن.
شەڕیان لە ناو ماڵی خۆیان دورخستوەتەوە و وڵاتی ئێمەیان کردوە بە گۆڕەپانی ڕاهێنان و شەڕەکانیان.
ئەوەش کە ئاسانکاری بەردەوامیان بۆ دەکات، ناهوشیاری و بێ ئاگایی خۆمانە هەم لە پێناسە کردنی خۆمان، هەمیش لە ناسین و پێناسەکردنی ئەوان.
کاتێک کورد ناتوانن پێناسەکی یەکگرتویان بۆ (تورکیا،ئێران و ئیسرائیل) هەبێ، چۆن دەتوانن جۆری مامەڵەیان لەگەڵی دیاری بکەن.
فەلەستینی و عەرەبەکانیش بە هەمان شێوە.
دەیان ساڵە ئیمە باجی ئەو مامەڵە پەرتەوازەیەمان دەدەین!
با دەساڵیش تاقی بکەینەوە، بزانین بەرهەمی یەکگرتویی و یەک بڕیاری چی دەبێ؟
لە لایەکی تریشەوە ئەو سێ لایەنە شەڕی بەوەکالەتی خۆشیان و هەموو دونیایان لە ناو ماڵی خۆیان گواستووەتەوە ناو ماڵی کورد و عەرەب (کوردستانی باشور، کوردستانی ڕۆژئاوا، عراق،سوریا، فەلەستین، لوبنان، یەمەن..هتد).
ئایا ئەو پیلانەی ئیسرائیل، تورکیا و ئێران مایەی هەڵویستەی عەرەب و کورد نیە؟
کاتی ئەوە نەهاتوە ئاقڵمەندانی کورد و عەرەب شفرەکانی ئەو پیلانە سێ قۆڵیە لەسەریان شی بکەنەوە؟
کاتی ئەوە نەهاتوە لەم چرکە ساتە مێژوییە هەستیارەدا بڕیاری لێکتێگەیشتنێکی هاوبەشی کوردی-عەرەبی بێتە گۆڕێ،بەتایبەتیش لە هەردوو پارچەی کوردستانی ڕۆژئاوا و باشور دەستپێبکەن، لەم دوو پارچە کورد لە گەڵ خۆتان ئاشت بکەنەوە و قوڵاییەکی ستراتیجی بۆ خۆشتان دروست بکەن؟
ڕاستە دەسەڵاتدارانی کورد هەڵەی ستراتیجیان کردوە کاتێ لە ڕقی دەسەڵاتدارانی عەرەبی عراقی و سوری، پاڵیان داوەتە دەسەڵاتدارانی تورکی و ئێرانی،بەڵام مامەڵەی دڕندانەی دەسەڵاتدارانی ئەو دوو وڵاتە لە ڕابوردودا هاوبەش و هاوکاری ناچارکردنی دەسەڵاتدارانی کورد بوە و کردونیە نێچیری ئاسانی پلانەکانی تورکیا و ئێران و زۆرجاریش ئیسرائیل.
