سەرو داوا و وەسیەتوو ویٛش ئەشوٙم گرد کوردێوە ڕوٙوانە تف و لەعنەت کەروٙ قەبرەکێش...

حەسەن خەیری نموونەو ئا کەسایەتییە زەڕەتاڵەینە، هەکە دلیٛ کوردینە هەمیشە چەکەرە کەروٙوە و زەحمەتا بنبڕ کریوٙ.

حەسەن خەیری ئا کەسەبیٛ هەکە بە فیتوو ئەتاتورکی خەڵەتییا و بە سەرجلی کوردیۆ لوا دلیٛ پەرلەمانوو تورکیای، گوایا پیٛسەو نویٛنەروو کوردی واتش: ئیٛمە ڕازییٛ نییەنمیٛ جە برا تورکەکاما جیێ بیمیٛوە و پەنەما وەشا چیٛروو سەیەو ئاڎیشانە ژیومیٛ.

دماتەر بە وینای و ئەژنەویەی ئا قسا حەسەن خەیری، پیٛسەو نویٛنەروو کوردی و بە سەرجلی کوردیۆ، ئەورووپییەکیٛ ڕازییٛ بییٛ و دەوڵەتی نەتەوەیی تورکیای مەرزیارە و پەی هەتا هەتاینە نامیٛ کوردی لوا کوٙرەگاو ئاساویرە.

دمایی حەر هەمان دەوڵەت بە تاوانەو پوٙشای پوٙشاکی کوردیۆ پەرلەمانەنە، دەوڵەتوو تورکیای حەسەن خەیریش قەنارە دا، حەسەن خەیریچ دما قسەشەنە و وەڵیٛ قەنارەدایەکەیشەنە واتش: داوا کەروو قەبرەکیٛم سەروو ڕاو کوردەسانیۆ بوٙنە و حەر کوردێوە لاو قەبرەکیٛمەرە ڕەڎ بی، تفولەعنەتوو ویٛش کەروٙ ئەو قەبرەکیٛم.

حەسەن خەیری پەوچی ئا وەسیەتە قورسەشە کەرد، چوون دماجار زاناش خیانەتش کەردەن و واتش: بەشکوم ئانە بوٙ بە بایسوو ئانەی نەوەکیٛ دمای ئاڎی دەرس هوٙرگیٛرانە و ئیٛتر کەس بە نامیٛ نەتەوەکەیشۆ خیانەت نەکەروٙ، وەلێم داخەی سەختە ئانیٛنە هەکە:  ١٠٠ ساڵیٛ ویەرد سەروو مەردەیشەرە و حەسەن خەیریی بیبە نموونێوە قەبیٛح و گرد سەردەمێوەنە خاینەکیٛ چەمش بڕانە.

س.ز