بەمەبەسو شەرمەزارکەردەی هرووژمەکا دۆڵەتو تورکی ئەرەگیری پەی سەرو هەرێمەکاو سەرنیشت  و ۋەرکۆتوو سوریای، کۆنگرە ستار و هێزەکۍ پارێزنای کۆمەڵایەتی (هەپەجە) جە ناوچەو چەلەبی کۆبانێ، ڕاپیمایشا کەرڎ.

بەسەڎان هاموڵاتیۍ ۋەردەمو مەجلیسو گەلوو چەلەبینە کوۍ بیێوە و چالاکیشا کەرڎ.

جە ڕاپیماکەینە وێنەو زاوڵە گەشمەرڎەکا و زامڎار هرووژمەکا و وێنەو ڕابەر ئاپۆی، ئاڵاکاو کۆنگرە ستاری و هێزەکاو پارێزنای کۆمەڵایەتی، لافیتەو "هرووژمەکا دۆڵەتو تورکی شەرمەزار مکەرمۍ"، "هەتا گۆشەگیری بەردەوام بۆ، ئەرەکۆشایما بەردەوام مەبۆ" بەرزکریۍ بێنێوە.

جە میانو ڕاپیماکەینە گەل دروشمەکا "نا پەی هرووژمەکا دۆڵەتو تورکی ئەرەگیری"، "بژیۋۆ مڎرامانوو گەریلای" و "بژیۋۆ سەرۆک ئاپۆ"یشا واچێنێوە.

ڕاپیماکەی تا ۋەردەم و مېیانو کۆنگرە ستاری جە ناوچەو چەلەبینە بەردەوام بی، چا بە دەیەقێوە بێدەنگی چالاکیی گلێرۆبیەی لواڕاوە.

دماتەر ڕاوەبەرو ناوچەو چەلەبی کۆنگرە ستاری، زەلال عەلی، هرووژمەکۍ دۆڵەتو ئەرەگیرو تورکیش پەی سەرو هەرێمەکا سەرنیشت و ۋەرکۆتوو سوریای شەرمەزارۍ کەردۍ.

زەلال جە قسەکاشەنە ئەرەیاۋناش؛ دۆڵەتو تورکی بە بوردوومانەکاش قەد نمەتاوۆ ئیرادەو گەلەکەیما ماڕۆنە و واتش، چێوە بە گرڎو دنیۍ ماچمۍ ئەرەکۆشایما هەمیشە بەردەوام بۆ و سەرو ڕاو ڕێبازو گەشمەرڎەاماوە ڕووبەڕوو هرووژمەکا بیمێوە."

'بێ ڕابەر ئاپۆی ئاشتی نمەبۆ'

زەلال جە دما دمایی قسەکاشەنە واتش: "چارەسەرو گرڎو کێشەکا ئینا ئیمراڵیی، بەبێ ڕابەر ئاپۆی هیچ چارەسەریێوە نمۍ دی. پېسە گەلوو کوردی جە گرڎو دنیێنە درێژە بە ئەرەکۆشایما مڎەیمۍ، مڎرامان ئیرادە و ئەرەکۆشایمانە. گەلوو کوردی چکۆ بۆ، جە لایەنو دۆڵەتو تورکیوە مکریۆ ئامانج. بەبێ ئانەی زاوڵە و پیر و نەوەش ۋەرو چەما گێرۆ گرڎ کەسێ مکەرۆ ئامانج. هەڵوێسو ئێمە پېسە گەلوو ۋەرنیشتی دیارا، تامسۆگەر کەردەی ئازادیی ڕابەر ئاپۆی بەردەوامێنمۍ جە ئەرەکۆشای."

ڕاپیماکەی بە دروشمەو "مڎرامان ژیۋاین" دمایش پنە ئاما.