ئەرەنیشتاو عەفرینی کە کەمپو سەردەمینە مژیوا، جە دژو هجومەکا دۆڵەتو ئەرەگیرو تورکی پەی سەرو سەرنیشت و وەرکەوتو سوریای بانگەوازو یەکڕیزیشا جەگردوو گەلوو کوردی کەرد و ئەرەیاوناشا، پەنەوازا گرڎ کەسۍ دژو هرووژمە ئەرەگیریەکا دۆڵەتو تورکی هەڵوێس نیشانە بڎا.
جە وێرەگاو ٢٣ۍ ئۆکتۆبەریۆ دۆڵەتو ئەرەگیرو تورکی هجومێوە وەرفراوانش پەی سەرو سەرنیشت و وەرکەوتو سوریای دەسپنە کەردەن و بەدەیان هاموڵاتیێ مەدەنیێش گەشمەردێ و بەدەیان کەسۍ تەرێچش زامڎارێ کەردێنۍ. هەرپاسە دەیان سەنتەرێ خزمەتگوزاریێ کۆمەڵایەتی و چێرخانو ئابووری مەنتیقەکەی کریێ ئامانج. یۆ چا مەنتیقا کە زەرەرێ گۆرەش وەرکۆت و دلێشەنە ژمارێوە فرە هاموڵاتیێ مەدەنیۍ گەشمەرڎێ بیێ، کانتۆنو شەهباو- عەفرینی بێ.
حەسەن حەسەن، هامسەرۆکی ئەنجوومەنو کەمپینو سەردەمی جە دیڎارێنە چنی ئاژانسوو هەواڵوو فوراتی ئەرەیاوناش؛ دماو ئەرەگیرکەردەی عەفرینی و کۆچکردەی گەلی پەی هەرێمو شەهبای، دۆڵەتو ئەرەگیرو تورکی ڕوانە بەبەردەوامی هجوم مکەرۆ سەرو هاموڵاتیا مەدەنی و واتش: "بەتایبەت جە ٢٣ۍ ئۆکتۆبەریۆ هجومێوە وەرفراوانش ئەنجامدا."
حەسەن حەسەن ئاماژەش پانەی دا، پەنەوازا گرد کەسۍ دژو ئی هجوما هەڵوێسو وێشا نیشانە بڎا و واتش: "٧ ساڵێ سەرو ئەرەگیرکەردەو عەفرینی و کۆچکەردەو گەلی پەی هەرێمو شەهبایرە موییەرۆ، چی ماوەنە گەلوو عەفرینی وەرگەو گرد جۆرە هجومێشا گێرتەن و جە سەختترین ئاژەنە بە هیواو گێڵایۆیشا پەی ماواو وێشا مدرامانشا کەردەن. جە ئەنجامو هجومەکا ئی دماییەو دۆڵەتو تورکی پەی سەرو کەمپینو سەردەمی ژمارێوە فرە جە هاموڵاتیا مەدەنی گەشمەردێ بیۍ واتش : "دۆڵەتو تورکی بەگرد نەوعۍ هجوم مکەرۆ سەرو مەنتیقەکەی و تاوانەو جەنگی ئەنجام مڎۆ، پەنەوازا گرد دژو ئی هجومەیە هەڵوێسو وێما نیشانە بڎەیمۍ."
هەرپاسە فازیلە محەمەڎە ئەرەنیشتۍ کەمپو سەردەمی و ئەکرەم بەکری ئەرەنیشتەو لادەگاو تل قەرەی سەبارەت بە هجومەکا ئاماژەش پانەیە کەرد؛ هیچ هجومێوە مدرامانیشا مەمردنۆ دۆڵەتو تورکی ساڵانە هجومی کۆمکوژیی دژو گەلو کوردی ئەنجام مڎۆ. ئارۆ وەرچەما گردو جەهانیۆ درێژە بە هجوم و کۆمکوژییەکاش مڎۆنە و کەس دەنگ نمەکەرۆ، مشۆم گرڎ کەسۍ ئانەیە بزانۆ کە ئێمە پێسەو گەلوو کوردی وەرەنگارۍ گردو ئا هجوما بیمێ و خاوەنداریی جە ڕۆڵە قارەمانەکاما مکەرمێ و دۆڵەتو تورکی سەر ئەنجامەنە وەرا وەر بە مدرامانو بەشکۆو گەلەکەیمانە مەڕیۆ، بەڵام گەلما پەنەوازا یەکڕیزی وێش قەوەتتەر بکەرۆنەو سەرکۆتەیما مسۆگەرا."
