سەرچەمێوە جە وەزارەتوو جبەروو توركیایۊ ئەرەیاوناش، حەرچندە قەرار بۍ ئارۊ یاگەگێرا و وەزیروو جبەروو حەر چوار وڵاتا ڕووسیای، ئێرانی، توركیای و سووریای كوۍ باوە، وەلێم ئا كۊبییەیۊ چوارقۊڵییە بە هۊكارێوە تەكنیكی پەی وەختێوە نادیاری دما وزیا.
ئاژانسوو ڕۊیتەرز-ی جە زوانوو سەرچەمێوەج وەزارەتوو جبەروو توركیایۊ ئەرەیاوناش، قەرار بۍ چی حەفتەیەنە كۊبییەیۊ یاگەگێرا وەزیراو جبەروو توركیای "ڕووسیای، ئێرانی و سووریای" کریۊ، وەلێم پەی واڎێوە نادیاری دما وزیا.
ئا سەرچەمە ئانەیچشە وات، كۊبییەیۊ چوارقۊڵییەكە بە سەبەبی تەكنیكی دما وزیان، بۍ ئانەی ورڎەكاریی زیاڎتەر وزۊ ڕووە.
وەڵتەر" بەشار ئەسەد" سەرۊكوو سووریای ئەرەیاونابێش، شەرتەو كۊبییەیۊ چەنی هامتا توركەكەیش، كێشیایۊ هێزەكاو توركیاین خاكوو سووریاینە، حەرپاسە مردنای هامكارییەكاو توركیاین پەی گرووپە تیرۊرستییەكا.
"مەولووڎ چاوش ئۊغڵو" وەزیروو جبەروو توركیای حەفتەی وەڵین ئەرەیاوناش، دلێڕاسەو ئی مانگێنە یاگەگێروو وەزیروو جبەروو حەرچوار وڵاتاو ڕووسیای و ئێرانی، توركیای و سووریای مۊسكۊنە كوۍ باوە، ئا کۊبییەییۊیچە پەی دیاریكەرڎەی یاگۍ و ڕێكوستەی كۊبییەیۊکەی بۍ، پەی وەزیراو جبەروو ئا چوار وڵاتەیە.
س.ز
