لە کەرتی غەززە قەیرانی مرۆیی لە هەڵکشاندایە و ڕاگەیاندراوە هێزەکانی ئیسرائیل گولـلەبارانی ئەو مەدەنییانەی کردوە کە بەرەو ناوەندی هاوکاری دەڕۆشتن و لە ئەنجامدا لانیکەم ٢٢ کەس کوژراون، زیاتر لە ١٢٠ کەسیش بریندار بوون.
ڕووداوەکە بەرەبەیانی ڕۆژی شەممە لە ڕۆژئاوای رەفحا ڕوویداوە. هەروەها ئاماژەش بەوەکراوە کاتێک خەڵکەکە بەرەو ناوەندی هاوکاری ئەمریکی دەڕۆشتن، لە لایەن ئۆتۆمبێلە زرێپۆشەکانی ئیسرائیلەوە گولـلەباران کراون و کۆمەڵکووژی لێ کەوتووەتەوە.
وتەبێژی پاراستنی مەدەنییەکانی غەززە مەحمود باسڵ بۆ ئاژانسی فرانس پرێس (AFP) قسەی کرد و ئاماژەی بەوەدا بەهۆی گولـلەبارانەوەکەوە لانیکەم ٢٢ کەس کوژراون و زیاتر لە ١٢٠ کەسیش بریندار بوون و ژمارەیەکی زۆر لەوانە منداڵن.
کەرتی غەززە زیاتر لە دوو مانگە گەمارۆ دراوە، هەفتەی ڕابردوو لە هەندێک ناوچە گەمارۆکە لاواز کرا. لەگەڵ ئەمەشدا لە لایەنی خۆراک، دەرمان و پێداویستییە سەرەتاییەکانەوە کێشەی زۆر گەورەی هەیە و قەیرانێکی مرۆی سەخت دەگوزەرێت
ئیسرائیل ئۆپەراسیۆنە سەربازییەکانی چڕکردووەتەوە بە ئامانجی لەناوبردنی حەماس و ڕزگارکردنی ئەو بارمتانەی کە لە ٧ی تشرینی یەکەمی ٢٠٢٣ ڕفێندراون.
