بۆردومانەکانی ئیسرائیل بۆسەر غەززە بەردەوامە. ناوەندی بەرگری مەدەنی غەززە ڕایگەیاند کە لە هێرشەکەی ئیسرائیل بۆ سەر قوتابخانەی فەهمی ئەل جارجاوی شاری غەززە بەلانی کەمەوە ٣٣کەس ژیانیان لەدەستدا و دەیان کەسی دیکەش کە زۆربەیان منداڵ و ژنن، بریندار بوون.

هەروەها سوپای ئیسرائیل ڕایگەیاند کە ناوەندێکی فەرماندەیی حەماس و جیهادی ئیسلامییان کردووەتە ئامانج و بانگەشەی ئەوەی کرد کە: "ئێمە تیرۆریستانمان کردووەتە ئامانج."

بەرگری مەدەنی غەززە ئەوەشی ڕایگەیاند کە لە بوردومانکردنی ماڵێک لە جبالیە  ١٩کەس کوژراون و ڕایگەیاند لە هێڕشەکەی ڕۆژی یەکشەممەدا ژنێکی دووگیان و منداڵێکی بە گشتی  ٢٢کەس ژیانیان لەدەستداوە.

شایانی باسە ئیسرائیل لە ناوەڕاستی مانگی ئاداردا جارێکی تر هێرشی کردە سەر غەززە و کۆتایی بە ئاگربەستی دوو مانگەی هێنا و بە تایبەتی لە ١٧ی ئایارەوە هێرشەکانی زیادکردووە. بە بیانووی ئەوەی بە یەکجارەکی حەماس لەناو ببات و دیلەکانی ئازاد بکات و ئەم ئۆپەراسیۆنی کۆنترۆڵکردنی غەززەی دەستپێکردووە.

هەروەها غەززە بە هۆی هێرشەکانی ئیسرائیلەوە ڕووبەڕووی گەمارۆیەکی قورس بووەتەوە. ئەوەش بووەتە هۆی کەمی کەلوپەل و پێداویستیە سەرەتاییەکان. هاوکات ئەم دۆخە لەسەر ئاستی کۆمەڵگەی نێونەتەوەییەوە ناڕەزایەتی لێدەکەوێتەوە. لەو چوارچێوەدا یەکێتی ئەوروپا ڕایگەیاندووە که پێویستە پێداچوونەوە بە پەیماننامە هاوکارییەکانی له گەڵ ئیسرائیلدا بکات.