ژنانی ئازادیخوازی ڕۆژهەلاتی کوردستان، لە لێدوانەکەیاندا وێڕای شەرمەزارکردنی پیلانگێڕی نێودەوڵەتی سەر ڕێبەر ئاپۆ، سڵاوی خۆشیان ئاراستەی سەرهەڵدانەکانی گەلی کورد لە ڕۆژهەڵاتی کوردستان دەکەن.

ژنان ئازادیخوازی شاری شنۆ-ی ڕۆژهەڵاتی کوردستان، هەڵمەتی داگیرکاریی دەوڵەتی تورکیا لە دژی عەفرین شەرمەزار دەکەن و پشتگیری خۆشیان بۆ نەبەردی کچان و کوڕانی عەفرین دەردەبڕن. ژنانی شاری شنۆ ئەو بێدەنگییە نێودەوڵەتییەش ڕیسوا دەکەن کە لەسەر هێرش وپەلاماری دەوڵەتی تورکیا بۆ سەر عەفرین لە ئارادایە و دەڵێن کە هەرکەسێک خاوەنی شەرافەت و کەرامەتی ئینسانی بێت دەبێ بەرامبەر بەو هێرشە ناڕوایە بوەستێتەوە و هەڵوێستی هەبێت.

"بیر و فەلسەفەی ڕێبەر ئاپۆ کەسایەتیی و ئیرادەیەکی وای لە ژناندا ئافراندووە کە لە هەموو جیهاندا بناسرێت و شانازی پێوە بکرێت. پێویستە ئێمە وەکوو ژنانی کورد بەیەکەوە بەشداری بکەین لە تێکۆشانی ڕزگاریخوازانەی گەلەکەمان و لەسەر فکری ڕێبەر ئاپۆ، ئاستی خەباتی خۆمان بۆ ئازادی ژن و کۆمەڵگایەکی یەکسان و دێموکراتیک بەرزتر بکەینەوە''.

لە کۆتایی لێدوانەکەی ژنانی ئازادیخوازی شری شنۆدا، داوای یەکڕێزی کۆمەڵانی گەلی کوردستان و بە تایبەت ژنان دەکرێت و دەوترێت کە عەفرین جارێکی دیکە بەوێنەی کۆبانی سەری کوردی بەرز کردەوە، هەر بۆیە پێویستە بە یەکگرتن و تێکۆشانی خۆمان، وەڵامی ئەو قارەمانیەتییەی گەلی خۆمان لە عەفرین بدەینەوە.

لێدوانەکە بە درووشمەکانی 'بژی سەرۆک ئاپۆ''، ''بژی بەرخۆدانی عەفرین'' و ''ئێمەی ژنانی شنۆ، پشتیوانی عەفرینین''، کۆتایی پێدەهێنرێت.