سوڵتان یارای-ە: "پەی ئازادیی ئێژا ئۆجالانی ئەرەکۆشای هەمە لایەنە مکەرمۍ، گلېرۆبیەیچ یۆ چا شۆنانە کە متاومۍ بە عالی ئا ئەرەکۆشایشە چنە بکەرمۍ. پۊکەی گرڎوو گەلەکەیما پەی گلێرۆبیەی خوڵقە مکەرمۍ ".
قەرارا سەبای ١٣و ئارگای(ئۆکتۆبەر)ی سەرو داواو دەم پارتی جە شارو ئامەدینە گلێرۆبیەیۍ ئازادیی بلۆڕاوە. سەرەڕاو قەرارو قەڎەغەیچ کە جە لایەنو والی دۆڵەتیۆ بەرشیەن، ئاماڎەکارییەکۍ پەی لوای ڕاوەو گلېرۆبیەی جە فرەو شارا تەریچەنە بەردەواما و دلۍ ئامەدیچەنە بەجۆش و خرۆشۆ دمایین ئاماڎەکارییەکۍ ئەنجام مڎریا.
هامسەرۆکەو پارتو هەرێمە دیموکراتیکەکا (دەبەپە)ی ئامەدەنە، سوڵتان یارای-ە سەبارەت سەبارەت پا مژارییە واتش، سەرەڕاو قەرارو قەدەغەیچ ڕۆو ١٣و ئارگای(ئۆکتۆبەر)ی گرڎوو گەلی مېنە مېڎان. یارای-ە سەرنجش وست سەرو جەنگی جە ۋەرکۆتوو مېیامینینە و واتش، ئانەی ئاشتی مارۆنە دی عەبدوڵا ئۆجالانا.
سوڵتان یارای-ە باسش جە قەڎەغە پەنج رۆییەکەو والیگەری کەرد و واتش"ئیجازە پەی گلێرۆبیەکەی هۆرگیریان و هەرمانەکێچش کریێنۍ. ئا قەرارو قەڎەغەیە دریان هەڕەمەکی و سیاسییا، هیج پاساو و بنەمێوە یاساییش نییا. قبوڵش نمەکەرمۍ کە مافی دیموکراتیکی ئێمە کۆسپش پەی وەش بکریۆ. ١٣و ئارگای(ئۆکتۆبەر)ی هەرچێوێچ ڕووە بڎۆ ئێمە مێڎانەنە بیمۍ، یووەم داواکاریچما دمایی ئاردەین بە گۆشەگیری".
ئەرەکۊشای هەمەلایەنە جە دژو گۆشەگیری
سوڵتان یارای-ە باسش چانەیچ کەرڎ، "دەسەڵات ڕێبازۍ فرێش پېسە تاونایۆ کولتوری و زۋانی، مادەی هۆشبەری و لەش ورەشی، تاڵانکەردەی ئیکۆلۆژی و هرووژم پەی سەرو تاریخی هەوڵ مڎۆ دەسکۆت و بەهاکاما دلێنەبەرۆ. هەر کە گۆشەگیری تنتەر مکریۆوە، وڕایرەی کۆمەڵایەتی قووڵتەر مەبۆوە. دژو ئانەیچ ئێمە ۋێما ڕێکوزمۍ و پەی ئازادیی ئێژا ئۆجالانی، ئەرەکۊشایۍ هەمەلایەنە ئەنجام مڎەیمۍ. یۆ چا مېڎانا ئێمە بەکارش بەرمۍ و بە عالتەرین شێوە ئا ئەرەکۊشایشە چنە وزمۍ ڕووە، ئی گلێرۆبیەیە مەبۆ، داوا جە گرڎوو گەلەکەیما مکەرمۍ بەشداری چی گلېرۆبیەیەنە بکەرا".
