بە سەدان دانیشتووی شارەکانی دێرک، گەرک لەگی و چلاغای سەر بە کانتۆنی جەزیرە، بۆ بەخاک سپاردنی تەرمی شەڕڤانی هێزەکانی سوریای دیموکراتیک عەگید سرێکانی (محەمەد ئەحمەد) کە لە ٢٦ ی کانوونی یەکەم لە قەرەقۆزاق شەهید بوو، چوونە گۆڕستانی شەهید خەبات دێرک.

مەراسیمەکە بە خولەکێک ڕێزگرتن دەستی پێکرد، پاشان هاوسەرۆکی دەستەی بنەماڵەی شەهیدان، زیندانیان و بریندارانی شەڕ لە کانتۆنی جەزیرە، محەمەد جەمیل قسەی کرد و وتی: "لەم کاتەدا پێویستە لە دەوری هێزەکانمان یەکبگرین، هێزەکانی سوریای دیموکراتیک و دامەزراوەکانمان، دەستکەوتەکانی شەهیدان بپارێزین و شەڕی گەلی شۆڕشگێڕ بکەین. ئەگەر وانەبێت ڕێگە بۆ لۆزانێکی نوێ دەکەینەوە".

جەمیل لە درێژەی قسەکانیدا وتی: "بەرخۆدان تاکە ڕێگایە بۆ سەرکەوتن لە باکوور و ڕۆژهەڵاتی سووریا و پاراستنی ئارامی کۆمەڵگەکەمانە".

شەڕڤانی هێزەکانی سوریای دیموکراتیک سەعید کۆچەر قسەی کرد و باسی لە تێکۆشانی شەهید عەگید سرێکانی کرد. سەعید کۆچەر ئاماژەی بەوە کرد کە بەشداری لە هەموو بەرەکانی شەڕی باکوور و ڕۆژهەڵاتی سووریا کردووە و وتی: "پێویستە بگەینە ئامانجی شەهید عەگید و هەرێمەکەمان بپارێزین".

پاشان ناسنامەی شەهید خوێندرایەوە و ڕادەستی بنەماڵەکەی کرا.

تەرمی شەهید عەگید سرێکانی بە دروشمی "شەهید نامرن" بەخاک سپێردرا.