گەلی کۆبانێ ڕوویانکردە ئەو وێستگەی ئاوەی کە١ ی شوبات لە ئەنجامی هێرشی دەوڵەتی داگیرکەری تورک بە تەواوی وێران بوو، بوون بە قەڵغانی مرۆیی تا ئەوکاتەی تیمە تایبەتەکە کارەکانیان بۆ چاککردنی وێستگەکە تەواوکرد.
دەوڵەتی داگیرکەری تورک لە ٨ی کانوونی دووەمی ٢٠٢٤ەوە بە شێوەیەکی دڕندانە هێرشی کردە سەر ژێرخانی هەرێمی باکوور و ڕۆژهەڵاتی سوریا و بەتایبەت وێستگەکانی کارەبا و ئاو و خزمەتگوزاری لە کانتۆنی فورات کردە ئامانج و لە ئەنجامدا گەل بێ کارەبا و ئاو دەمایەوە.
ڕۆژی ١ی شوبات، دەوڵەتی تورک بە فڕۆکەی جەنگی هێرشی کردە سەر وێستگەی ئاوی گوندی شێخلەرەی سەروو، لە ئەنجامدا وێستگەکە بە تەواوەتی وێران بوو، کۆبانێ و کۆبانێ و گوندەکانی دەوروبەری ٤ مانگ بێ ئاو مانەوە.
هەرکات تیمەکان هەوڵیاندەدا وێستگەکە چاک بکەنەوە و ئاو بگەیەنن بە گەلی کۆبانێ، دەبوون ئامانجی هێرشی دەوڵەتی داگیرکەری تورک.
هەروەها چەتەکانیش بە چەکی مامناوەندی هێرشیان دەکرد و لە ئەنجامدا تیمەکان ناچاردەبوون پاشەکشە بکەن.
ئەمڕۆش خەڵکی کۆبانێ و گوندەکانی دەوروبەری وەک قەڵغانی مرۆیی ڕوویانکردە وێستگەکە، تاوەکو تیمەکە بتوانن وێستگەکە چاک بکەنەوە و ئاو بگەیەنرێت بە کۆبانێ و دەوروبەری. لەوێدا دیسانەوە ڕۆحی بەرخۆدانی بەنداوی تشرین نیشاندرایەوە.
پاش ئەوەی تیمەکان کارەکانیان تەواوکرد و ئاوەکە بەردرایەوە بۆ شار و گوندەکان. گەل گەڕانەوە بۆ کۆبانێ.
بەشێک لە بەشداربووانی چالاکییەکە قسەیان بۆ ئاژانسی هەواڵی فورات (ANF) کرد.
'ئاو و خاک و کارەباکەمان دەپارێزین'
دایکێک بە ناوی بەدیعە ئیبراهیم ڕایگەیاند هاوشێوەی بەنداوی تشرین، لەوێش ئاو و کارەباکەیان دەپارێزن، گوتی: "ئێمە وەک قەڵغانی مرۆییی بەرامبەر دوژمن دەوەستین، ئاو و خاک و کارەباکەمان دەپارێزین".
'کەس ناتوانێت بەرامبەر ئیرادەمان بوەستێتەوە'
دایکێک بە ناوی نازێ محەمەد ڕایگەیاند دەبینە قەڵغانێکی مرۆیی و دەست لە ئاوەکەمان هەڵناگرین، گوتی: "بە منداڵ و گەورەمان لێرەین. ئاوەکەمان دەپارێزین. کەس ناتوانێت بەرامبەر ئیرادەمان بوەستێت".
'تا کۆتایی بەرخۆدان دەکەین'
هاوسەرۆکی شارەوانی شارەوانی قنایە، عومەر سلێمان گوتی: "بانگەواز لە ڕێکخراوەکانی مافی مرۆڤ دەکەین، با بزانن ئێمە بێ ئاوین. دوژمن هێرش دەکات. بەڵام ئێمە تا کۆتایی بەرخۆدان دەکەین".
