لەسەر ئاستی باکوور و ڕۆژهەڵاتی سووریا 'دەستپێشخەری سووریای ئازادی بۆ ڕێبەر ئاپۆ' لە شاری قامیشلۆ و حەلەب ناوەندی هەیە. ئەمڕۆ ناوەندی سێهەم لەسەر ئاستی کانتۆنی فورات لە شاری کۆبانێ کرایەوە.

بە سەدان دانیشتووی کانتۆنەکە، ئەندامانی دامودەزگاکانی ئیدارەی خۆبەڕێوەبەری و ڕێکخستنەکانی ژنان بەشداری کردنەوەی ناوەندی دەستپێشخەری سووریای ئازادی ڕێبەر ئاپۆ بوون.

مەڕاسیمی کردنەوەکە بە خولەکێک ڕێزگرتن دەستیپێکرد، پاش ڕێزگرتنەکە وتەبێژی دەستپێشخەری ئازادی ڕێبەر ئاپۆی کانتۆنی فورات عیسا ئەفەندی قسەی کرد و گوتی: "٢٦ساڵە لە ناوخۆدا ئەم تێکۆشان و بەرخۆدانە بۆ ئازادی ڕێبەر ئاپۆ بەڕێوەدەبەین. هیوادارین وەک چۆن چەتەکانی داعشمان لە کۆبانێ لە ناوبرد، بە تێکۆشان و بەرخۆدانمان ئازادی جەستەیی ڕێبەر ئاپۆش مسۆگەر بکەین."

هەروەها فەرزەندە مونزور، وتەبێژی دەستپێشخەری سووریایی ئازادی بۆ ڕێبەر ئاپۆ ، ڕایگەیاند، دامەزراندنی دەستپێشخەری ئازادی بۆ ڕێبەر ئاپۆ لە سووریا لە شاری بەرخۆدان شاری کۆبانی، لە ڕێبەر ئاپۆ و گەلی کۆبانی و شەهیدانی ئازادی پیرۆز کرد و وتی: "ئەم هەنگاوە، دەستپێشخەری سووریایی ئازادی بۆ ڕێبەر عەبدوڵا ئۆجالان ، لە ڕۆژێکی پیرۆز لە ڕۆژی شەهیدانی ١٨ی ئایار پیرۆز دەکەین".

پاشان شریتی کردنەوەی ناوەوەندەکە لەلایەن دایە حەلیمە ڕەشۆ، دایکی سێ شەهید (شەهید بارین، بوتان، و باران) بڕدرا و ناوەندەکە کرایەوە.

دواتر گەل بەجۆشەوە چوونە نێو ناوەندەکە و وێنەی ڕێبەر ئاپو و شەهیدانیان پێشکەش بە ئەندامانی دەستپێشخەرییەکە کرد.