جە ئەنداماو کۆنگرەو ١٢ـەمینو پەکەکەی سەیفی زۆرگورلوو ئاماژەش بە ئەوەکۊشای سەردەمی تازەی کەرڎ سەرو بنەماو پارادایمو ڕابەرایەتی و واتش: "ئا ئەوەکۊشایەی جە سەردەمی تازەنە مکەرمېش سەختتەرا. پەنەوازا پا جۊرە ۋێماش پەی ئاماڎە بکەرمۍ و ستراتیجماش پەی مجمېراوە."
جە ٥-٧و ئایارینە پەکەکە کۆنگرەو ١٢ـەمینو ۋێش جە هەرێمەکاو پارېزنای مەدیاینە بینا و دماتەر جە ١٢و ئایارینە قەرارەکێش پەی ڕای گرڎیی وەڵا کەرڎێوە و چنەشەنە جەخت جە ئامای ئارای سەردەمێوە تازەو ئەوەکۊشای کەردۆ بە مەبەسو بنیاڎنیای ئاشتی و گلېرگەی دیموکراتیکی. یۆ جە ئەنداماو کۆنگرەکەی؛ سەیفی زۆگورلوو جە کۆنگرەکنەا قسێش کەردۍ و ئی هۊرسەنگنایێشە کەرڎۍ:
"سەرەتا ڕێز و سڵامم ئاڕاسەو ڕابەر ئاپۆی مکەر و گرڎو گەشمەرڎا بەڕێز و پنەزانایۆ یاڎ مکەرووە. ڕابەرایەتی گەلێوەش جە مەردەیۆ زیڼە کەردۆ و یاوناش پی ئاستیە. ڕابەرایەتی گرڎو پلانڕێژییەکا و پیلانگێڵنی مېیاننەتەوەیی دلێنە بەردۍ. ڕابەرایەتی گرڎ کاتۍ ئی ئاستەو ئیساتێش کەرڎ بە بناغەو گەشەکەردەی ئەوەکۊشای و نزیکۍ سەرکۊتەیش کەردیمېوە.
ڕەنگە بڕۍ کەسۍ و لایەنۍ بەپاو ۋێشا شرۆڤەو چێوەکا بکەرا و هۊرشا سەنگنا، کاتێ تەماشەو میدیای تورکی مکەرمې پاسە نیشانەش مڎا کە پەکەکە شکسش واردەن و ئیتر هەرەکەتو جەنگکەردەیشا نەمەنەن. پی جۊرە گەرەکشانە پرۆسەکەی پێچەوانە بکەراوە و نیشانەش بڎا.
حەقیقەتێوە هەن و چەسپیان، چ حەقیقەتێوەن؟ حەقیقەتو ئانەی بە کۊششو ڕابەر ئاپۆی و ئەوەکۊشای پەکەکەی گەلو کوردی بی بە خاوەنو ئیرادەی. گرەنتی تەڤگەرو ئازادی، ئازادی گەلو کوردی و گرڎ کەسێ ئا چەکەنە کە ئینا دەسمانە، ئی هێزە بە پارادیگماو ڕابەرایەتی بە ڕیکوستەی کریان. مژارو چەکنیایرەیچما هەوڵێوەمابۍ چی چوارچێوەنە.
پەنەوازا مژارو یاسا و یاسایی بنەڕەتی فاڕیانە. پەنەوازا هەنگامەی پی جۊرە سەپنمۍ. ڕابەرایەتی ئەڵتەرناتیڤش وستەن وەردەمما. پرۆسێوە تازەش وستەن وەردەمما و دەسش پنەکەرڎەن. ئا ئەوەکۊشایەی جە ئیساتێنە ڕاوەبەر مکریۆ فرە سەختتەرا. جە ڕوو سیاسی، ئایدۆلۆژی، دیبلۆماسی و کۊششو بنیاڎنیاینە جە ئیساتێنە پرۆسێوە فرە زەحمەتتەرما ئینا ۋەردەمەنە. پنەوازا پی جۊرە پلانڕێژی و ستراتیجما مجمېراوە و ۋێماش پەی ئاماڎە بکەرمۍ.
ڕاسا ئینە کۆنگرەو دمایئاردەین بە هەرمان و چالاکییەکا چېرو نامۍ پەکەکەینە، بەڵام بە دڵنیاییوە پەرە بە بەهاکاما مڎەیمۍ و ئەوەکۊشایما زیاتەر مکەرمۍ. بە ئایدیاو ڕابەرایەتیوە پەروەردۍ بیێنمۍ، وەڵۍ ئەرەمەرزنای پەکەکەینە ئێمە ئاپۆیۍ بێنمۍ و ئیساتێچ هەر ئاپۆیێنمۍ. هەڵبەتە تا دمایی باوەڕیم پینەی هەن. هێز و زانستو ڕابەر ئاپۆی، فرەو وەختی پەکەکەش جە تەنگاوییەکانە ڕزگار کەردەن، بێگومان ئی جارەیچ بە سەرکۊتەی گۊرەتەرۆ پەکەکەی تاجدار مکەرۆ."
