ناوەندی ڕاگەیاندن و چاپەمەنی هێزەکانی سوریای دیموکراتیک (قەسەدە) بە ڕاگەیاندراوێک دووپاتی کردەوە، یەکینەکانی ئەنتی تیرۆر بە هاوکاری هێزەکانی هاوپەیمانی نێونەتەوەیی، دوێنێ (دووشەممە ١٦ ی تشرینی یەکەم) دوو ئۆپەراسیۆنی ئەمنیان لە شارۆچکەی شحێل لە گوندەواری باشوری دەیرەزۆر ئەنجامداوە.

قەسەدە ڕایگەیاند، لە ئۆپەراسیۆنەکەدا، ٤ چەتەی داعشیان دەستگیر کردووە، چەک و تەقەمەنییەکانیان دەستی بەسەردا گیراوە.

قەسەدە بە ڕاگەیاندراوێک ئەم زانیارییانەی بڵاوکردەوە: "لە هەردوو ئۆپەراسیۆنەکەدا، ٤ ئەندامی شانەکەی داعش دەستگیرکراون. ئەندامانی شانەکە لە کاری قاچاخچێتی چەکدا چالاک بوون. چەک و تەقەمەنی و مینی چێنراویان گەیاندۆتە ڕێکخراوی تیرۆریستی داعش بۆ ئەنجامدانی کاری تیرۆریستی دژی هێزەکانمان و دامەزراوە مەدەنییەکان و تێکدانی سەقامگیریی هەرێمەکە".

بەگوێرەی ڕاگەیاندراوەکە ئەم چەک و کەرەستە سەربازییانە دەستیان بەسەردا گیراوە:

کڵاشینکۆف: ١

بۆمبی دەستی: ٢

بۆمبی چێنراو: ١

مۆبایل: ٨

تەلەفۆنی نۆرماڵ: ١

ئامێری پەخشی ئینتەرنێت: ٢

بەڵگەنامەی کەسی

چەندین کەرەستەی سەربازی تر.