فەرماندەی گشتیی قەسەدە، مەزڵوم عەبدی ڕایگەیاند کە ئەو هەنگاوە نوێیەی لەلایەن پەکەکەوە نراوە، دەرگای پرۆسەی سیاسی و ئاشتییانە لە هەرێمەکە دەکاتەوە، گوتی: "هیوامان وایە کە هەموو لایەنە پەیوەندیدارەکان، لەگەڵ ئەم پێشهاتەدا، هەنگاوی پێویست بنێن".
فەرماندەی گشتی هێزەکانی سوریای دیموکراتیک (قەسەدە) مەزڵوم عەبدی دەربارەی بڕیارەکەی پەکەکە لە هەژماری خۆی لە میدیای دیجیتاڵ ڕاگەیاندراوێکی بڵاوکردەوە، دەڵێت: "بڕیارەکەی پەکەکە بۆ هەڵوەشاندنەوەی ڕێکخستنەکەی و کۆتاییهێنان بە خەباتی چەکداری و دەسپێکردنی پرۆسەی سیاسەتی دیموکراتیک، ڕێزگرتنە لە بانگەوازەکەی سەرۆک ئۆجالان. پەکەکە لە تێکۆشانە درێژخایەنەکەی لە ڕۆژهەڵاتی ناوەڕاستدا ڕۆڵێکی مێژوویی و گرنگی گرتووەتەئەستۆ. بڕوامان وایە، ئەم هەنگاوە نوێیە دەرگای پرۆسەی سیاسی و ئاشتییانە لە هەرێمەکە دەکاتەوە.
هیواخوازین لەگەڵ ئەم پێشهاتەدا، هەموو لایەنە پەیوەندیدارەکان هەنگاوی پێویست بنێن و هەموو دۆستان پشتگیری لەم پرۆسەیە بکەن".
