ناوەندی راگەیاندنی هێزەکانی سوریای دیموکراتیک (قەسەدە) بە راگەیەندراوێک ناسنامەی رۆنی وڵات یەک لە فەرماندەکانی خۆی ئاشکرا کردووە کە لە دێرەزور شەهید بووە.

لە راگەیەندراوەکەدا هاتووە:

"بە سەربەرزی و بڕوامەندبوون بە سەرکەوتن، فەرماندەیی گشتیی قەسەدە شەهیدبوونی ئەندامی ئەنجومەنی سەربازی و ئەندامی فەرماندەیی ئەنجومەنی سەربازی دێرەزور فەرماندە رۆنی وڵات/ شێروان حەسەن رادەگەیەنێت.

ئاماژە بەوەشکراوە، کە فەرماندە رۆنی وڵات لە ئەنجامی هێرشێکی تیرۆریستی ترسنۆکانە لە رۆژهەڵاتی دێرەزور و لە کاتی راپەڕاندنی ئەرکە نەتەوەیی و ئەخلاقیەکەیدا شەهیدکرا.

هەر لە راگەیەندراوەکەدا هاتووە، شەهید رۆنی لە یەکەمین فەرماندەکان بووە کە بەشداربووە لە دامەزراندن و پێکهێنای هێزەکانی ئەرکی خۆپاراستن و رۆڵی کارای لە پەروەردەکردنی شەڕڤانان و رێکخستنی ئەو هێزە گێڕاوە. مێژوویەکی پڕ لە گیانبازی هەیە و لە گۆڕەپانەکانی بەرخودان بە قارەمانێتی، زانابوون و دەستپێشخەرییەکانی دەناسرا و رۆڵی لە پەرەپێدان بە گیان و بنەماکانی برایەتی گەلان و پوچەڵکردنەوەی فیتنە و ئاژاوەی هەندێک لایەن لە دێرەزور هەبووە.  

بەو بۆنەوە فەرماندەیی گشتیی قەسەدە سەرەخۆشی لەسەرجەم شەڕڤانان، گەلی باکوور و رۆژهەڵاتی سوریا و بنەماڵەی شەهید کردووە.

قەسەدە بەڵێنی وەفاداری و پابەندبوون بە ئامانجەکانی شەهیدانی دوپاتکردووەتەوە و جەختیکردووەتەوە، کە ئەو تیرۆریستانەی شەهید رۆنی وڵاتیان تیرۆرکردووە لە سزا قوتاریان نابێت و بە سزا دەگەیەندرێن.

زانیاری لە سەر ناسنامەی شەهید بەم جۆرەیە:

ناوی بزوتنەوە: رۆنی وڵات

ناو و پاشناو: شێروان حەسەن

ناوی باوک: حسێن

ناوی دایک: هەدیە

شوێن و کاتی لەدایکبوون: قامیشلۆ/ ١٩٧٩

شوێن و کاتی شەهیدبوون: دێرەزور/ ٥ی کانونی یەکەمی ٢٠٢٣".

هـ .ب