لە گۆڕستانی شەهید دەلیل سارۆخانی شاری قامیشلۆ، بۆ شەڕڤانی قەسەدە زولفەقار قامیشلۆ (محەمەد محەمەد) کە ٢٥ ی کانوونی دووەم لە عەین عیسا شەهیدبوو، مەراسیمی بەخاکسپاردن بەڕێوەچوو؛ بۆ گەریلای هەپەگە مەزڵوم یەکتا (محەمەد شێخ حەمدی) کە ١٥ ی شوباتی ئەمساڵ لە قەندیل شەهیدبوو، مەراسیمی غیابی بەڕێوەچوو. سەدان دانیشتووی شارەکە و گوندەکانی دەوروبەری قامیشلۆ، ئەندامانی ئەنجوومەنە سەربازییەکان و نوێنەرانی ئیدارەی خۆبەڕێوەبەری کانتۆنی جەزیرە و بنەماڵەی شەهیدان بەشداری مەراسیمەکە بوون.  

پاش خولەکێک ڕێزگرتن لە شەهیدان، ئەندامی ئەنجوومەنی بنەماڵەی شەهیدان، فاتمە ئەلجاسم قسەی کرد و جەختی کردەوە لەسەر درێژەدان بە تێکۆشان لەسەر ڕێچکەی شەهیدان.

فەرماندە لە ئەنجوومەنی سەربازیی قامیشلۆ نەزیر سۆفی تیشکی خستەسەر بەرخۆدانی تشرین، گوتی: "ناوی بەنداوی تشرین بووەتە بەنداوی شەهیدان".

ئەندامی کۆنگرەی ئیسلامی دیموکراتیک، عومەر ئەل حەمید باسی تێکۆشانی شەهید زولفەقار قامیشلۆی کرد و گوتی: "جێگەی شەهیدان بەرزە، ئەوان لە دڵی ئێمەدان".

پاشان بەشداربووان گوێبیستی دەنگی شەهید مەزڵوم یەکتا بوون، کە تێیدا باسی تێکۆشانی خۆی دەکات. دواتر ناسنامەی هەردوو شەهید خوێنرایەوە و ڕادەستی بنەماڵەکانیان کرا. تەرمی شەهید زولفەقار بە درووشمی "شەهید نامرن" بەخاکسپێردرا.