تۆپباران، ناتوانێ پێش لە فێربوونی زمانی دایک بگرێت
مامۆستایانی کانتۆنی حەسەکە، ڕایانگەیاند کە تۆپبارانەکانی دەوڵەتی تورکیا ئێمە لە ئەرکەکانمان دوور ناخاتەوە
مامۆستایانی کانتۆنی حەسەکە، ڕایانگەیاند کە تۆپبارانەکانی دەوڵەتی تورکیا ئێمە لە ئەرکەکانمان دوور ناخاتەوە
مامۆستایانی پەیمانگەی ''شەهید ڕۆزا جودی"، لە ناوچەی دربێسیە-ی سەربەکانتۆنی حەسەکە، تۆپبارانی سوپای تورکیای داگیرکەریان لەسەر ناوەند و ڕێکخراوەکانی پەروەردە شەرمەزار کرد و وتیان بە تۆپباران ناتوانن پێش لە فێربوونی زمانی دایک بگرن.
سوپای تورکیای داگیرکەر و چەتەکانی هاوپەیمانی، لە ٢٠کانوونی دووهەم / ٣٠ی بەفرانبارەوە بەهەموو جۆرە چەکێکی قورس و تەنانەت چەکی قەدەخەکراویش، پەلاماری عەفرین دەدەن. لەو هێرشانەدا، خەڵکی مەدەنی، شوێنەواری مێژوویی، گۆڕستانی شەهیدان، شوێنە پیرۆز و ئایینیەکان، قوتابخانە و هەروەها ڕێکخراوە خزمەتگوزارییەکان، کراونەتە ئامانج.
مامۆستایانی ناوچەی دربێسیە-ی سەر بە کانتۆنی حەسەکە، لەوبارەوە ناڕەزایەتیان پێشاندا.
ژیان حەمۆ، ئیدانەی هێرش دەوڵەتی تورکیای داگیرکەری بۆ سەر ڕێکخراوەکانی پەروەردە کرد و ڕایگەیاند: لە باکووری سووریا ئەوە ماوەی ٧ساڵە سیستەمی پەروەردە بە زمانی دایکییە. دەوڵەتی تورکیا لە دژی ئەوەیە کە گەل فێری زمانی دایکی ببێت. ئێمە وەکوو مامۆستایانی دربێسسە-ی حەسەکە، پشتیوانی مامۆستایانی عەفرین دەکەین و لەبەر ئەوەی ''هەم مامۆستا و هەمیش شەڕڤانن''، دەستخۆشیان لێدەکەین.
جوان برۆ، مامۆستایەکی دیکەی دربێسی، ڕایگەیاند: دەوڵەتی تورکیا بە هێرش کردنە سەر قوتابخانە و ڕێکخراوەکانی ڕاهێنان، دەیەوێ ئاستەنگی لەبەردەم سیستەمی پەروەردە و دەرکەوتنی نەوەیەکی زانا، درووست بکات. جوان برۆ، هەر وەها وتیشی: ''ئەو هێرشانە ناتوانێ لەبەردەم ڕاهێنان و بارهێنان ببێتە ئاستەنگ. ئەگەر پێویست بکات ئێمە لە ژێر چادر دا ئەرکەکانی خۆمان پێک دێنین و خوێندکاران فێری زمانی دایکیان دەکەین".