جە ٢٠و ئایاریوە سوپاو عێراقی حۊل مڎۊ چواردەورو کەمپو پەنابەرا گەشمەرڎە رۊسەم جودی (مەخمور)ینە خەندەق بڎۊۋنە، تەلبەنش کەرۊ و بورجی سەروازی چەمڎاری وەش کەرۊ. ئارۊ ١٥ ڕوېن، دژ پا حۊلەیە پەنابەرەکۍ مەخموری جە مدرامانی وەردەوامېنۍ.

 جەلاو ۋېشۊ، "محەمەڎ نەسڕەدین" چەمڎاری سیاسی و سیاسەڎمەدار جە شارو کەرکوکی سەبارەڎ بە جموجوڵە سەروازییەکا حکومەتو عێراقی دژ بە پەنابەرا کەمپو مەخموری، وە مەڵامەتو پەشتەو ئا فشارە فرەو وەرپەرسا عێراقی پۍ سەرو کەمپەکەی و چن پەرسېوە تایبەت پا مژاریە، جە چەمپنەکۊتەیۍ تایبەتەنە پۍ ئاژانسو هەواڵی فوراتی قسېش کەرڎۍ.

 گەمارۊدای کەمپو مەخموری نیا مەسڵەحەتو حکومەت و گەلوو عێراقینە

 سەبارەڎ بە جموجوڵە سەروازییەکا عێراقی پۍ گەمارۊدای کەمپو پەنابەرا مەخموری، محەمەد نەسڕەدین سیاسەڎمەدار و چەمڎاری سیاسی ئەرەیاۋناش: "جموجوڵەکۍ حکومەتو عیراقی دژ بە کامپو گەشمەرڎە ڕۆسەم جودی و حۊلو تەلبەنکەرڎەی کامپەکەی حیچ پەنەوازیۍ سەروازی عێراقی نیا بەڵکم ئی حۊلە داواو حکومەتو تورکیاین، ئی هەنگامۍ هێزەکا عێراقی پۍ گەمارۊدای کەمپو پەنابەرا جە مەخمور نیا مەسڵەحەتو گەلوو عێراقی و حکومەتو عێراقینە چونکی کەمپو مەخموری حیچ تەرسېوەش سەرو ئەمنیەتو عێراقیوە نیا، کەمپو مەخموری بە قوڵای ١٨٠کم دوورا جە سنورو تورکیای کەواتە حیچ تەرسېوەیچش سەرو ئەمنیەتو تورکیایچ نیا".

 ئی حۊلەو سوپاوعێراقی حۊلېوەن پۍ جاسوسی کەرڎەی سەرو خەڵکو کامپەکەیوە

 محەمەڎ نەسڕەدین سیاسەڎمەدار و چەمڎاری سیاسی ئەرەیاۋناش: "جموجوڵەکۍ حکومەتو تورکیای جە چوارچیوەو جابەجېکەرڎەو داواو حکومەتو تورکیاین پۍ ئانەی فشار وزیۊ سەرو کامپو گەشمەرڎە رۊسەم جودی حەتا کامپەکە چۊڵ کریۊ ئەگەر نا ئا ڕېککارۍ کە حکومەتو عێراقی باسش کەرڎېنۍ جە نیایرەو کامیرۍ چەمڎاری و تەلەبەنکەرڎەی، ئی ڕېککارۍ حکومەتو عێراقی بەرمشا جە چوارچېوەو پارېزناو ئەمنیەتو کامپەکەی بەڵکم ئینە حۊلېوەن کە ملۊنە مەجال و جاسوسی کەردةی سەرو خەڵکو کامپەکەیوە، کە ئینەیچ حیچ سەردەمېوەنە ڕوۋەش نەڎان".

'هەڵسوکۊتو حکومەتو عێراقی دژبە کامپو مەخموری مەگونجیۊ چنی یاسای میان نەتەوەیی'

 محەمەد نەسڕەدین سیاسەڎمەدار و چەمڎاری سیاسی ئەرەیاۋناش: " ساڵەو (٢٠١١)یوە حکومەتو عێراقی دڎانش نیان کامپو پەنابەرا گەشمەرڎە ڕۆسەم جودینە جە مەخمور کە ئی کامپە ئینا چېرو دەسەڵاتو نەتەوەیۊگېرتەکانە، وە حکومەتو عێراقیچ دڎان پانەیرە منیۊ و سەرو ئا بنەمۍ کە خەڵکو کامپەکەی ئاوارۍ نەتەوەیۊگېرتەکانۍ و پا جۊرە هەڵسوکۊت چنی خەڵکەکەی مکەرا، ئی هەڵسوکۊتەو حکومەتو عێراقی مەگونجیۊ چنی یاسا میان نەتەوەییەکا تایبەت بە کامپێوە کە چېرو دەسەڵاتو هەیمەنەو نەتەوە یۊگېرتەکانە بۊ ".

 جموجوڵە سەروازییەکۍ عێراقی خزمەڎ بە مافو مرۆڤی مەکەرا

 محەمەڎ نەسرەدین ۋاتش: "ئی جموجوڵە سەروازییەو عێراقی خزمەڎ بە گەلوو عێراقی و ئەمنیەتەکەیش و مافو مرۆڤی و پەناهەنڎەکا مەکەرۊ کە ئارۊ ئینۍ خاکو عێراقینە، پۊکەی مەبۊ حکومەتو عێراقی چېرو حیچ فشار و ئاژېوەنە بلۊنە چېرو داواکارییەکا دەوڵەتێوە پېسە تورکیای و فشار وزۊنە سەرو خەڵکېوە مەڎەنی.

 لایەنېوە سیاسی کورڎی دەسش هەن جە فشارەکا سەرو کامپو مەخمورینە

 محەمەڎ نەسرەدین ئاشکراش کەرڎ: "جە فشار وستەی سەرو کامپو پەنابەرا مەخمورینە بڕۍ لایەنۍ سیاسی کورڎی دەسەڵاتو پانیشتی دەسشا بۊ بەتایبەتی کە جە ۋیەرڎەنە حۊلدېنۍ کە کێشە پۍ کامپەکەی وەش کەرا، ئانەی عال مزانمۍ کە دلۍ حکومەتو هەرێمو کورڎسانینە لایەنی سیاسی بیەن کە گرڎ وەختۍ حۊلشدان قۊرتۍ پۍ ئا کامپەیە وەش کەرۊ، پاسە بزانو ئیراڎېوە دلۍ پانیشتو کورڎسانینە هەن کە گەرەکشا قۊرتۍ پۍ کامپەکەی وەش کەرۊ،

 حیچچ پەنەوازیۍ ئەمنی نیا حەتا پا جۊرە فشار جە کەمپو مەخموری کریۊ

 جە دما دماینە محەمەد نەسڕەدین تەئکیدش چانەی کەرڎۊ: "کە حەر لایەنێوە چ دلۍ هەرێمو کورڎسانینە یا عێراقینە حۊلو ئانەی بڎۊ کە قورتە پۍ کەمپو پەنابەرا مەخموری وەشکەرۊ چېرو فشارو دەوڵەتێوە هەرێمی پېسە تورکیاینە، ئینە خزمەت بە خەڵکو عێراقی مەکەرۊ وە حیچ پەنەوازیۍ سەروازی و ئەمنی عێراقی نیا حەتا پا جۊرە هەڵسوکۊت چنی کەمپو پەنابەرا مەخموری کریۊ".

هـ . ش