بە سەرمەشقایەتی لقوو وان و سەندیکاو کرێکارا پەروەردە و زانستی (ئەیتەم سەن)ی و بە هامکاری وەقفوو میزۆپۆتامیای و کۆمیسیۆن و زوانی نووسینگەو پارێزنەرا وانی سەروو "سیاسەتی، پلانسازی، پەروەردە و ستاتۆی یاسایی" یووەمین سیمپۆزیۆمی زوانی کوردی دەسش پنە کەرد و ٢ ڕووۍ بەردەوام بۆ. بەشێوە فرە جە ئەنداما پارت و ڕێکوزیاکا و هامسەرۆکاو شارەوانی وانی نەزلیهان شەدالە و عەبدوڵا زەیدان و هامسەرۆکاو شارەوانی مەنتیقەکەی و چندین کەسێ تەرێ بەشداربێنێ.

دماو قسۍ سەرەتای، ئەرەنیشتێوە بە نامونیشان و سیاسەتی و زوانی لوواڕاوە، مەزڵوم کانیوا پێسە ڕاوەبەروو ئەرەنیشتەی، ئەوەکۆڵیەر د. نادرە گونتاشە و زوانشناس سامی تان و ئەکادیمیسیان د. میکایل بولبول پێسە قسەکەری بەشداربێنێ.

سەرەتا ڕاوەبەروو لقوو وان و ئەیتەم سەنی، لوقمان بابات سەرنجش وست سەروو دۆزوو کۆبانێ و قەرارەکەش شەرمەزارکەرد، ئەرەیاوناش ساڵانێوەن گەلو کوردی پەی زوانەکەیش ئەرەکۆشۆ و پەی ئانەی زوانی کوردی بۆ بە زوانی ڕسمی و پەروەردەی درێژە بە کۆشیای مدا.

حەرپاسە جە لوجنەو ئامادەکاری ساڵەح هێزل ئەرەیاوناش هەوڵ مڎا بە دیدگای وەرفراوان ئی بەرنامەیە دەوڵەمەند بکەرا، تەئکیدش کەردۆ پێویسا گرد وەختێ زوانی کوردی ڕۆژەڤی سەرەکیما بۆ چونکی زوان و ئایندەو گەلەکەیمانە.

نوویسەر ئیبراهیم سونگور ئەرەیاوناش ئا گلێرگەی بە زوان و وێش قسێ نەکەرۆ، مەتاوۆ سەربەخۆیی دەس وزۆ، مشۆم گلێرگە خاوەنداری جە زوانەکەیش بکەرۆ، زوان و ئەڎێ بۆ بە زوان و سیاسەتی.

دماتەر ئەرەنیشتەی یووەم دەسش پنە کەرد، سەرەتا زوانشناس سامی تان دەربارەو "خەبات و ژیونایۆ زوانی و ڕەوشوو زوانی کوردی قسێش کەردێ و ئەرەیاوناش نەمەنەی زوانێوە لکە دریا بە سیاسەتوو قڕکەردەی زوانەوانییوە و واتش: "چارەنوویس و زوانەکەیما ئینا دەسوو وێمانە".

میکایل بولبول سەروو "خەبات و بەستانداردکەردەی کوردی کورمانجی" قسێش کەردێ و ئەرەیاوناش ڕەوشوو وڵاتەکەیما لکەدریان بە ڕەوشوو زوانەکەیماوە.

دماتەر ئەوەکۆڵیەرە نادرە گونتاش ئاڵداتمازە بە کورمانجکی دەربارەو "خەبات پەی بەستانداردکەردەی کورمانجکی" قسێس کەردێ و ئەرەیاوناش وەننگە و ناوەندەکێ پەروەردەکەردەی پەی ستانداردکەردەی زوانی پێویستێنێ، ئاماژەش پانەی کەرد زازاکی چی دەرفەتا بێبەشا، هاموەخت سەرنجش وست سەروو گرنگی کەناڵە تەلەفزیۆنییەکا جە پرۆسەو بەستانداردکەردەی زوانینە، واوەی ئاماژەش پانەی کەرد زازاکی ئی دەرفەتەیچشە نیا وەروو دەسینە.

سیمپۆزیۆمەکە ٢ ڕووێ بە گفتوگۆ و ئەرەنیشتەی جیاواز بەردەوام بۆ.