واننە سیمپۆزیۆموو زوانی کوردیی دەسش پەنە کەرد
بە سەرمەشقایەتیی لەقوو وانوو ئەیتەم سەنی، یوەمین سیمپۆزیۆموو زوانی کوردیی دەسش پەنە کەرد.
بە سەرمەشقایەتیی لەقوو وانوو سەندیکاو کرێکاراو پەروەردەی و زانستی (ئەیتەم سەن)ی و بە هامکاریی وەقفوو میزۆپۆتامیای و کۆمیسیۆنوو زوانو نویسگەو پارێزنەراو وانی سەروو "سیاسەت، پلانسازی، پەروەردە و ستاتۆی یاسایی" یوەمین سیمپۆزیۆموو زوانی کوردی دەسش پەنە کەرد و ٢ ڕوێ بەردەوام مبۆنێ. بەشێوی فرە جە ئەنداماو پارت و ڕێکوزیایەکا و هامسەرۆکاو شارەوانیی وانی نەزلیهان شەدالە و عەبدوڵا زەیدان و هامسەرۆکاو شارەوانیی یاگەکا و چندین کەسای تەری بەشدارێ بێنێ.
دماو قسێ ئەوەڵی، ئەرەنیشتەێو بە نامونیشانوو سیاسەتی و زوانیوە کریا، مەزڵوم کانیوا پێسەو ڕاوەبەروو ئەرەنیشتەکەی، ئەوەکۆڵەر د. نادرە گونتاش و زوانناس سامی تان و ئەکادیمیسیان د. میکایل بولبول پێسەو قسەکەری بەشدارێ بێنێ.
ئەوەڵ ڕاوەبەروو لەقو وانوو ئەیتەم سەنی، لوقمان بابات تیشکەش وستە سەروو دۆزوو کۆبانێ و قەرارەکەش شەرمەزار کەرد، واتش ساڵانێوا گەلوو کوردی پەی زوانەکەیش مکۆشیۆ و تا زوانی کوردی بۆ بە زوانی ڕسمی و پەروەردەی درێژە بە کۆشیای مدانێ.
هەرپاسە جە لوجنەو ئامادەکاری ساڵەح هێزل واتش، هەوڵێ مدانێ بە دیدگاو وەرفراوان ئی بەرنامەیە دۆڵەمەند بکەرا، ئەوەخوایش کەردەوە پێویسا گرد وەختێو زوانی کوردی پەرسەی سەرەکییەما بۆ، چونکوم زوان ئایندەو گەلەکەیمانە.
نویسەر ئیبراهیم سونگور واتش، ئا گلێرگە بە زوانوو وێش نەدوۆ، نمەتاوۆنێ سەربەوێ بۆ، مشۆم گلێرگە وێش خاوەنداری وەنەو زوانەکەیش بکەرۆ، زوانوو ئەدێ بۆ بە زوانوو سیاسەتی.
دمایی ئەرەنیشتەی ئەوەڵ دەسش پەنە کەرد، سەرەتا زوانناس سامی تان دەربارەو "خەباتوو ژیوایوە زوانی و ڕەوشوو زوانی کوردی قسێش کەردێ" و واتش کە نەمەنەی زوانێو لکی دریان بە سیاسەتوو قڕکەردەی زوانەوانییوە و واتش: "چارەنویسوو زوانەکەیما ئینا دەسوو وێمانە".
میکایل بولبول سەروو "خەباتوو بەستانداردکەردەی کوردیی کورمانجی" قسێش کەردێ و واتش ڕەوشوو وەڵاتەکەیما لکی دریان بە ڕەوشوو زوانەکەیماوە.
دماتەر ئەوەکۆڵەر نادرە گونتاش ئاڵداتماز بە کورمانجکی دەربارەو "خەبات پەی بەستانداردکەردەی کورمانجکی" قسێش کەردێ و واتش مەکتەب و ناوەندەکاو پەروەردەکەردەی پەی ستانداردکەردەی زوانی پێویسێنێ، ئاماژەش پانەیە کەرد زازاکی چی دەرفەتا بێبەشا، هاموەخت تیشکەش وستە سەروو گرنگیی کەناڵە تەلەفزیۆنییەکا جە پرۆسەو بەستانداردکەردەی زوانینە، واوەی ئاماژەش پانەیە کەرد زازاکی ئی دەرفەتەیچش وەروو دەسینە نییا.
سیمپۆزیۆمەکە ٢ ڕوێ بە واتەواچ و ئەرەنیشتەی جیاواز بەردەوام مبۆنێ.
