کۆنگرەی کۆمەڵگای دیموکراتیکی کوردانی ئەوروپا (کەجەدەکە-ئە) جەژنی قوربان لە هەموو گەلانی بندەست و بەتایبەتی گەلی کورد پیرۆز کرد.

لە بەیاننامەکەدا ئاماژە بە چەوسانەوەکان، گەمارۆ و هێرشەکان لە هەر چوار بەشی کوردستان کراوە و ڕایگەیاندووە بە تایبەت مەخموور و شەنگال ڕووبەڕووی هەڕەشەی جددی بوونەتەوە.

کەجەدەکە-ئە ڕایگەیاند کە ئەم هێرشانە لەلایەن هێز و حکومەتەکانی خاوەن عەقڵیەتی داعشەوە بۆ ڕێگریکردن لە ئاشتی و ئارامی گەل ئەنجامدراون و ئاماژەی بەوەدا کە هاوڵاتیانی مەدەنی، ژنان، منداڵان، گەنجان و بەساڵاچووان کراونەتە ئامانج.

کەجەدە ئەوروپا ڕایگەیاند کە هەموو ئەم هێرشانە لە بەرامبەر بەرخۆدانی گەل و لایەنی دیموکراتیک شکست دەهێنن.

کەجەدەکە- ئەوروپا ئاماژەی بە بانگەوازی ڕێبەر ئاپۆ بۆ "ئاشتی و کۆمەڵگەی دیموکراتیک"دا و ڕایگەیاند: "مانیفێستێکی مێژووییە بۆ سەدەی ٢١، ئەم بانگەوازییە بۆ گەلانی ڕۆژهەڵاتی ناوەڕاست دەرفەتێکی گرنگی ڕەخساندووە و دەبێت خاوەنداری لێبکرێت."

هەروەها ڕاگەیەندراوە کە گەلی کورد بە ڕۆحی یەکێتی، هاوبەشی و تێکۆشانەوە جەژن پیرۆز بکەن، گەل بە هاوکاری ماددی و مەعنەویەوە یەکێتی نەتەوەیی خۆیان  بەهێزتر بکەن.

کەجەدەکە ئەوروپا هیوادارە ئەم جەژنە ببێتە دەرفەتێک بۆ بنیاتنانی ئازادی، یەکسانی، دیموکراسی، دادپەروەری، خوشک و برایەتی لە نێوان گەلان.