لە رۆژی دووشەممەی هەفتەی رابردووەوە تائێستا ئاگرکەوتنەوە لە هەندێک دارستانی رۆژهەڵاتی کوردستان بەردەوامە، بەهۆی بێدەربەستی لایەنە حکومیەکان بەرامبەر بەو ئاگرکەوتنەوانە، ژینگەپارێزان لەهەوڵی کۆنترۆڵکردنیاندان.
بەگوێرەی هەواڵێکی تۆڕی مافەکانی مرۆڤی کوردستان لە رۆژی دووشەممەی رابردووەوە زنجیرەیەک ئاگرکەوتنەوە دارستانەکانی جوانرۆ و پاوەی لە پارێزگای کرماشان گرتووەتەوە و دامودەزگاکانی دەوڵەتی ئێران هیچ هەوڵێکیان بۆ کوژاندنەوەی ئەو ئاگرە نەخستووەتەگەڕ.
تۆڕی مافەکانی مرۆڤی کوردستان ئاگرکەوتنەوەکانی "بەئەنقەست و مەبەستدار" ناودێر کردووە و ئەوەی خستووەتەڕوو کە ئاگرەکە ناوچەکانی وەک نوئێل، لورابی، نوخان و شەسۆڵی جوانرۆ و ناوچەکانی وەک بڵبزان، وشکە و شوشمێی پاوەی گرتووەتەوە و بەخێرایی تەشەنە دەکات و رووبەرێکی فراوان لە لەوەڕگە و دارستانەکانی بەڕووی زاگرۆسی لەناوبردووە.
ئەوەش خراوەتەڕوو، کە هاووڵاتیان و چالاکوانانی ژینگەپارێز بە شێوەی خۆڕسک و بە کەمترین کەل و پەل و پێداویستیەوە لەهەوڵی کۆنتڕۆڵکردن و کوژاندنەوەی ئەو ئاگرە.
دوێنێش کۆمیتەی ئیکۆلۆژی پارتی ژیانی ئازادی کوردستان (پەژاک) لە راگەیەندراوێکدا ئاگرکەوتنەوەکانی بە مەبەستدار و بە ئەنقەست پێناسە کردبوو، داوای لە کۆمەڵانی خەڵک کردبوو خۆیان رێکبخەن و سیاسەتە دژە ژینگەیی دەوڵەتی ئێران پوچەڵ بکەنەوە.
هـ . ب
