ڕێپێوانەکە لە چوارچێوەی هەڵمەتی "ئازادی بۆ عەبدوڵا ئۆجالان، چارەسەری بۆ پرسی کورد"دا لە ١٣ شوباتەوە لە پێش شارەوانی مارتیگێسەوە دەستیپێکردووە. لە دووەم ڕۆژی چالاکیەکەدا لە چەندین شار و هەرێمی دیکەی فەرەنساوە ١٢٣ کەس بەشداری ڕێپێوانەکە بوون.

ئەمڕۆی ڕێپێوانەکە دوای خولەکێک ڕێزگرتن لە شەهیدان دەستپێکرد، دواتر ڕاگەیاندراوێک خویندرایەوە و باس لە ئامانجی ڕێپێوانەکە کرا.

لە بەردەوامی ڕێپێوانەکەدا چالاکوانان بە زمانەکانی کوردی و فەرەنسی زانیاری و بڵاکراوەیان دەربارەی پیلانگێڕی نێونەتەوەیی و چارەسەری پرسی کورد بەخشییەوە.

لە ڕێپێوانەکەدا پانکارت و وێنەکانی ڕێبەر ئاپۆ بەرزکرانەوە و بە بەردەوامی درووشمی "ئازادی بۆ ڕێبەر ئاپۆ" گوترایەوە.

ڕێپێوانەکە بە جۆشێکی گەرمەوە بەردەوام بوو، وە ئامانجی ڕێپێوانەکە ئەوەیە لە سێهەم ڕۆژ و کۆتایی چالاکیەکەدا بگەن بە هەرێمی لا ڤیستی مارسیلیا.

بڕیارە لە سێهەم ڕۆژی چالاکییەکەدا بە بە شداربوونی هەزاران کەس بە ڕێپێوان لە ناوەندی شاری مارسیلیا ئەنجام بدەن و کۆتایی بەڕێپێوانەکە بهێنن.