٢٧٠ حاڵه‌تۍ ئه‌شكه‌نجه‌دای جە لاو جەمەو مافو مرۆڤو توركیایۊ تۆمارۍ کریېنۍ
نوێنه‌رو لقو ئامه‌ڎ و جەمەو مافو مرۆڤو توركیای ئەرەیاۋناش، جە شش مانگی یۋەمو ئېساڵینە ٢٧٠ حاڵه‌تۍ ئه‌شكه‌نجه‌دایشا تۆمارۍ کەرڎېنۍ.
پارێزنه‌ر موراد ئابا، نوێنه‌رو لقو ئامه‌ڎ و جەمەو مافو مرۆڤو توركیای ئاشكراش کەرڎ، جە ماوه‌و شش مانگا یۋەمو ئېساڵینە، بەمەڵامەتو په‌یڕه‌و کەرڎەی ئه‌شكه‌نجه‌یۊ جە لایەن و ده‌وڵه‌تو توركیۋە، ٢٧٠ حاڵه‌تۍ ئه‌شكه‌نجه‌دای جە جەمەکېشانە تۆمارۍ کریېنۍ.
جەمەو مافو مرۆڤو توركیای ئاماره‌كا ئه‌شكه‌نجه‌دای جە لایەنو داموده‌زگا ئه‌منیه‌كا سه‌ر به ده‌وڵه‌تو توركیۋە تۆمارۍ کەرۊ، به پاو ئاماره‌كا لقو ئامه‌ڎ و جەمەو مافو مرۆڤو توركیای جە ساڵەو ٢٠٢٢ېنە، هه‌زار و ٢٠١ كه‌سۍ ئه‌شكه‌نجه دریېنۍ، حەرپاسە جە مودەو شش مانگو سه‌ره‌تاو ئېساڵینە، ٢٧٠ حاڵه‌تۍ ئه‌شكه‌نجه‌دای تۆمارۍ کریېنۍ.
ئه‌شكه‌نجه‌دای ڕووەش جە زیاڎبیەی کەرڎەن
نوێنه‌رو ئامه‌ڎ و جەمەو مافو مرۆڤو توركیای ، پارێزنه‌ر موراڎ ئابا بە ئاژانسو هەۋاڵی فورات (ANF)یش ئەرەیاۋنا، جە كۆو هه‌زار و ٧٩ كه‌سا كه ئه‌شكه‌نجه دریېنۍ، ٥٤٧ كه‌سېشا جە ڕاوەبەری ئاشایسی، ٦١ كه‌سېشا جە بنكه‌كانە، ٦٩ كه‌سېشا بەڕەسمی گیریېنۍ جە بنکەکا جەندرمەینە ئه‌شكه‌نجه دریېنۍ. ٣٣١ كه‌سېچ دلۍ ترۊمبېلو گېرتەی و فاڕایۊینە ئه‌شكه‌نجه دریېنۍ. ئینەیچ بەرش وزۊ كه حاڵه‌ته‌كۍ ئه‌شكه‌نجه‌دای زیاڎشا کەرڎەن. ئا ئامارۍ تایبه‌ت به گرڎو لقه‌كا جەمەکەینۍ، به‌ڵام ئاماره‌كۍ فرە چانەی زیاتەرېنۍ كه تۆمارۍ کریېنۍ.
حاڵه‌ته‌كۍ ئه‌شكه‌نجه‌دای فرە چانەی زیاتەرېنۍ
پارێزنه‌ر موراڎ ئابا تەئکیدش کەرڎۊ، ئاماره‌كۍ ئه‌شكه‌نجه‌دای كه ماوەو ئېساڵینە تۆمارۍ کریېنۍ فرە زیاتەرېنۍ، چونكی بە مەڵامەتو بومه‌له‌رزه‌كه‌یۊ چن مانگێۋە حیچ حاڵه‌تێۋە ئه‌شكه‌نجه‌دای جە لقو ئامه‌ڎو جەمەکېشانە تۆمار نەکریان و ۋاتش: بومه‌له‌رزه‌كه كاریگه‌ریش سەرو نوێنه‌رایه‌تی ئامه‌ڎ و جەمەو مافو مرۆڤو توركیای کەرڎ، چوونكی ئا مەنتیقەی نوێنه‌رایه‌تیه‌كه‌ماش چنە بۍ پۍ ماوه‌و چن مانگێۋە وزیارە و لۋای پۍ دلۍ بیناو نوێنه‌رایه‌تییه‌كە‌یما قه‌ڎه‌غه كریا، ۋەرو ئی مەڵامەتیە و چن گرفتێوە تەری، نەتاۋاما حاڵه‌ته‌كا ئه‌شكه‌نجه‌دای تۆمار کەرمۍ و حه‌رپۊکەی دڵنیېنمۍ كه حاله‌ته‌كۍ فرە چانەی زیاتەرېنۍ كه تۆمارۍ کریېنۍ.
ئا كه‌سۍ کە پۍ ماوه‌و ٣٠ ساڵا ئینۍ زینڎانەنە داواكاری پێشكه‌ش کەرا
موراڎ ئابا ئاماژه‌ش پانەیچ کەرڎ، نزیكه‌و ٥٠ داواكاری و حاڵه‌تا ئه‌شكه‌نجه‌دای ئا كه‌سا کە پۍ ماوه‌و ٣٠ ساڵا جە زینڎانەنە مەنېنۍ، جە لقو ئامه‌ڎو ڕێكوزیاو مافو مرۆڤو توركیای تۆمار کەرڎەن، ۋاتیچش: ئا كه‌سۍ کە پۍ ماوه‌و ٣٠ ساڵا زینڎانەنە بیېنۍ، ده‌یان ساڵۍ مافه ته‌ندروستیه‌کېشا پاشېل کریېنۍ. ئێمه پېسە ئه‌شكه‌نجه‌دای مامه‌ڵه‌ش چنی کەرمۍ و ۋینمېش.
ئاماژه‌ش پۍ ئانەیچ کەرڎ، به پاو په‌یمانه میان نه‌ته‌وه‌یه‌كا، مشۊم زینڎانیۍ ١٠ سەعاتۍ جە ڕۋېنە ئیسراحەت کەرا، به‌ڵام به‌داخۊ جە توركیانە مەتاۋا جە حه‌فتېۋەنە ١٠ سەعاتۍ ئیسراحەت هۊرگېرا. ئێمه ئینەی پېسە ئه‌شكه‌نجەی ۋینمۍ.
هـ .ش
