ڕاپیماو ڕېزگېرتەی جە ئیراڎەو پارتوو یەکسانی و دیموکراسیی گەلا (دەم پارتی) دژوو دەسسەرەرەگېرتەی ئیراڎەی یاوا ئەنقەرە. ڕاپیماییکەرا بە مەبەسوو لوای پەی جولەمێرگی، جە ئیستەنبوڵ و ئەزمیرۆ کۊتۍ ڕا، جە ئەنقەرەنە یاوۍ بە یۆی. بەشێوێوە جەماوەری پێشوازی جە ڕاپیمایکەرا کریا، درووشمەکاو "بژیۋۆ مڎرامانوو جولەمێرگی" و "شانبەشان دژوو فاشیزمی" و "جولەمێرگ مڎرامان بکەرە، ئەنقەرە ئینا چنیت" بەرزۍ کریێوە.

واتەواچەو مەجلیسوو ژەنا دەم پارتی ئەنقەرەی نەباهەت چاپلانە ئەرەیاۋناش ۋەرا ۋەر بە دەسسەرەرەگېرتەی ئیراڎەی سەرە مەنامنارە و درێژە بە ئەرەکۊشای مڎا.

چاپلانە ئەرەیاۋناش سیاسەتوو قەیومی و گۆشەگیری، گەلی ڕووبەڕوو جەنگی و کارەساتی مکەرۆوە، واتش: "دەس جە سیاسەتوو جەنگی و تاڵانی و زۆرداری هۊربگێردۍ. گۆشەگیری دمایی پنە باردۍ. بەرەو دیالۆگی و کۆبیەیۆ بکەردێوە و قەراروو مەجلیسو شارەوانی جولەمێرگی پەی نیایرەو ڤیان تەکچەی پېسە سەرۆکەو شارەوانی جە یاگۍ محەمەد سدیق ئاکیشینە قبووڵ بکەردۍ".

دماتەر پەرلەمانتارو دەم پارتی مەحمود دیندار ئەرەیاۋناش سەرەڕاو فێڵ و ساختەکارییەکا دەسەڵاتوو ئاکەپە-مەهەپەی جە کورڎەسانەنە گورزێوە گۊرێس واردە، تەئکیدش کەردۆ کە قەیوم جوگرافیاو کورڎەسانی تاڵان مکەرا، واتش: "ئارۆ جە ئەنقەرەنە دەنگوو ۋێما هۊربڕمۍ. ئێمە دڎان نمەنیەیمۍ قەیومیرە ، تا ئی نادادییە نەکیشیۆوە، ئەرەکۊشایما بەردەوام مبۆ".

ڕاپیماییکەرا ئێشەو جە ئەنقەرەنە مەناوە و سەوای بەرەو ئەدەنە ملا. درێژە بە ڕاپیماکەیشا مڎا و ٣ ۍ تەمموزی میاوا وان، ٨ و تەمموزیچ میاوا جولەمێرگ.