هامسەرۆکەو پارتوو یەکسانی و دیموکراسیی گەلا (دەم پارتی) تولای حاتەم ئۆغۆللارییە جە کۆبییەوەی هەفتانەو فراکسیۆنوو پارتەکەیشەنە پەرلەمانەنە، نرخنانیش پەی پەرسەکا کەرد، ئەدێ  تا دژوو گۆشیریی وەردەموو دادگای دەستووریینە ئەرەیاوناێوە بدانە ئامێ ئەنقەرە، جە کۆبییەیۆکەینە بەشدارێ بیێ و بەردەوام درووشموو "بێ سەرۆکی ژیوای نمەبۆ" و "بژیوۆ مدرامانوو زیندان"یشا بەرز کەردۆ.

حاتەم ئۆغۆللارییە تیشکەش وستە سەروو هەوڵەکاو ئەردۆگانی پی نزیکبییەیۆ جە حکومەتوو سوریای و واتش: "ماچۆ ئێمە سووریانە حیچ هەرمانێوەما نییەنە، ماچۆ ئێمە دەس مەوزمێنە هەرمانەو دلێ سووریایوە، ئەسەدی دۆس کتوپڕنە بی بە ئەسەدی دوژمن و ئیساتێ گەرەکشانە واوەی بگێڵانێوە پەی لاو ئەسەدی دۆسی. ساڵانیوا هەوڵی کۆبییەیوە مدانە، ئینە هەڵوێستیوی تازە نییەن، خاسا بەڵام ئەگەر پەیوەندییت بە هەرمانوکاروو دلێوە نییەن، ئەی چی قایمقامت عەفرینەنە نیانەرە، چی لەقێوی زانکۆو دیلۆکیتا کەردەنۆ، چی پۆستەخانەو تورکیایتا کەردەنۆ، چی مووچەو ئۆسۆی بە لیرەی تورکیی مدەیدێ؟ ئەگەر ئینە دەسوستەینە هەرمانەو سووریای نەبۆنە ئی چێشەن؟"

حاتەم ئۆغۆللارییە واتش: " پێویسا تورکیا بەڕسمی چەنی سووریای کۆبۆوە، پەنەوازا چەنی ئەسەدی کۆ بۆوە، وەختێو ئی کۆبییەیوێ مکریا، مشۆم چا چەنی ئیرادەو گەلوو کوردی کوێ بانێوە، ئێمە خاس مزانمێ ئەهەر پەرسەو کوردی چارەسەرە نەکریۆ، تورکیا نمەتاوۆن جە سیاسەتوو بەریشنە سەرکەوتە بۆ. واوەی هۆشداریی مدەیمێوە، کە تورکیا جیاتی گفتوگۆ و دیپلۆماسییەتی ڕاو وەزارەتوو بەریوە، راو میتیوە، ئی هەرمانا مکەرۆ و هەرمانێ هەواڵگیریێنێ، نمەبۆ سیاسەتوو بەری پێسەو هەرمانێ هەواڵگێریێ بکریۆ، دماقسێ سەروو ئی بابەتەی ئانێنە ڕاو ڕێککەوتەی  چەنی حکوومەتوو دیمەشقی بە چارەسەری ئاشتییانە و دیموکراسیانەو پەرسەو کوردی مێ دی.  ڕای هەقەتینە بە قامیشلۆ و کۆبانێرە مویەرۆ".

 درێژەنە حاتەم ئۆغۆللارییە تیشکەش وستە سەروو پەرسەو دەسملەرەگێرتەی شارەوانیی جولەمێرگی و مدرامانوو گەلی دژوو دەسملەرەگێرتەی ئیرادەی، سڵامیچش کەرد وەنەو چالاکییەکاو ئەدایاو ئاشتی.