پارتو هەرێمە دیموکراتیکەکا (دەبەپە)ی وەڵێ ئانەی حۆتەمین کۆنگرەو ئاسایی وێش سازکەرۆ کە قەرارا ١٢و کانونو دووەمی ٢٠٢٥ جە ئەنقەرە بینیۆنە، بە دروشمۊو "ئێمە بە سەرمەشقایەتی ئیرادێوە تیۆریک و پراتیک گلێرگەی ئازاد بنیاڎ منیەیمێ" کۆنفڕانسێوەش جە ئامەدەنە ساز کەرد.

کۆنفڕانسەکەنە هامسەرۆکا دەبەپەی چیدەم کلیچگون ئوچارە و کەسکین بایندر، هامسەرۆکو کۆنگرەو گلێرگەی دیموکراتیکی (کەجەدە) بەردان ئۆزتورک، هامسەرۆکو گردی پارتو دیموکراسی و یەکسانی گەلا (دەم پارتی) تونجەر باقرخان و هامسەرۆکا شارەوانی، پەرلەمانتارێ و ژمارێوە فرە جە نوێنەرا پارتی و رێکوزییا مەدەنییەکا ئاماڎێ بێنۍ.

تەلارەو کۆنفڕانسەکەینە چڼین لافیتێ هۆرواسیێبێنێ چانیشا "ڕاو ئاشتی شکۆمەندانەی ئازادی بەڕێز ئۆجالانیا".

کۆنفڕانسەکەنە کەسکین بایندر قسێش کەردێ و ئاماژەش بە هرووژمە ئەرەگیرییەکا چەتەکا پەی سەرو سەرنیشتوو و وەرکەوتوو سوریای کەرد "پارێزناو وەرنیشتی بە ماناو پارێزناو دەستکەوتەکا گەلو کوردین، کە ئا دەستکەوتێ بە قوربانیدای جە دژو عەقڵەیەتو داعشی بەدەسئامێنێ. گەلو کوردی سەرو خاکو وێش، چنی هامسا و دۆساش و چنی مرۆڤە ئازادەکا ژیوایێ شکۆمەندانەشا گەرەکا. گەلو کوردی گەرەکشا ئاتێکۆشانا پارێزنۆ، بەڵام تورکیا و هێزە مییانەتەوەییەکا گەرەکشانە ئا نمونە و قەوارا سەرکوت کەرا. هەرپۆکەی ئێمە ئا دەستکەوتێ جە هەر یاگێنە با، جە هەر چوار پارچەو کوردەسانی و جیهانی پارێزنمێ. ئەر پرسو کوردی جە تورکیانە چارەسەر کریۆ، مشۆم شمە قەوارەو سەرنیشتوو و وەرکەوتوو سوریای بە ڕەسمی بشناسدێ. جاکە بە هجوم و قڕکەردەی مەتاوتێنە یاودێ ئەنجام".

'چارەسەری بە ئازادی ئۆجالانی مسۆگەر بۆنە'

لاو وێشۆ چیدەم کلیچگون ئوچارە هامسەرۆکەو دەبەپەی جە قسەکاشەنە باسش چانەیە کەرد، کە پرسو کوردی و چارەسەری شکۆمەندانەی بە ئازادی ڕابەر ئاپۆی مسۆگەر بۆنە و واتش: " پرسو کوردی پرسو سەرەکی تورکیاین و هەنگامەی یووەمەنە پەی دیموکراتیککەردەی تورکیای چارەسەری شکۆمەندانە و ئاشتیانەو ئا پرسەیا. چارەسەرو دیموکراتیکی پرسو کوردیچ بە ئازادی ڕابەرو گەلو کوردی عەبدوڵا ئۆجالانی مسۆگەر کریۆ.  چی ئەرەکۆشاینە تەنیۍ نەبیێنمێ. پەی ئازادی بەڕێز ئۆجالانی و چەسپنای دیموکراسی چی وڵاتەنە ئانەی پنەما کریۆ و جەدەسمانە بێ، کەرمێش".

دماتەر کۆنفڕانسەکە بە شێوێوە وزیایرە ڕووەو ئەرەیاوییاکارە بەردەوام بی.