لییان شیندا ئەندامەو کۆمیتەو پەروەردەیی (کژار)ی جە چەمپنەکۆتەیێنە چنی ئاژانسوو هەواڵوو فوراتی (ANF)ی پی جۆرە ئەرەیاۋناش:

"ئانەی ژیۋای ڕۆشن مکەرۆوە، ۋەر نیا ئامانجی ڕۆشن و دیارا"

 ئا چالاکیۍ بە ئامانجێوە ڕۆشنۆ ئەنجامدریۍ، قسێوە هەنە ماچۆ "ئانەی ژیۋای ڕۆشن مکەرۆوە، ۋەر نیا ئامانجی ڕۆشن و دیارا"، ئا کاتیچە گەل مەرامو ۋێش دیاریکەردەبۍ ژەنا، جوانا و بەتەمەنەکۍ و گرڎو بەشەکا گلېرگەی بەشداریشا چا چالاکیانە کەرد. ئانەی رۆحو ئینسانی ڕۆشن مکەرۆوە، جەهانی ڕۆشن مکەرۆوە، ئاوەزو ئازادیی ساز مکەرۆ، مەرامش دیارا، رابەر ئاپۆ ئازادی ئێمە، مەرام و بیەو ئێمەن، ۋەرو ئانەیچ هەڵمەتەو 'شمە نمەتاودۍ ڕۆما تاریک بکەردۍ' دەسشپنەکەرڎ."

 "بی بە هومێڎێوە "

 لییان شیندا، جە بەردەوامی قسەکاشەنە واتش:" پیلانگێڵنی بە تەنیا سەرو کەسێوە پێکناما، بەڵکم کەردەی ئامانجو ۋەرکۊتوو مېیامینی و تەماموو مرۆڤایەتیی بۍ کە بە سەرمەشقی ئەمریکا، بەریتانیا، ئیسرائیلی و بەشداری بەشێوە فرە جە دۆڵەتا، بۆنەو مەسڵەحەتەکاشاوە ئەنجامدریا. ئا پیلانگێڵنییە جە کەسایەتی ڕابەر ئاپۆینە مەڕیا و بە پاڕادیگمای تازە، سیستمو نەتەوەی دیمۆکراتیکی، کۆنفێدرالیزمی دیمۆکراتیکی ڕاش نەڎا ئا پیلانگێڵنییەو سیستەمو سەرمایەداری جەهانیی سەرگێرۆ. هەرپاسە پا پارادیگما تازۆ، بە تایبەتی سیستەمو کۆنفیدڕاڵیزمی دیمۆکراتیکی پەی ژەنا پەی گەلا بی بە هیواو هومێڎۍ ."

 "ئازادی و دماڕۆو ۋێشا چانەینە دیۆ"

ئەندامەو کومیتەو پەروەردەیی (کژار)ی لییان شیندا ئەرەیاۋناش:''جە کاتو پیلانگێڵنینە شۊنێوە کە فرە ناڕەزایی ۋێش نیشانەدا ۋەرکۊتوو کورڎەسانی بۍ جە کاتێنە، کە پېسە پارچەکا تەری ڕبەرایەتی و (پەکەکە)ی  نەشناسێنۍ، بەڵام تاریخێوە قەڎیمیشا هەن، چکۆ و چنی ناڕەزایی ۋێشا نیشانە مڎا، مزانا بە چ شێوێوە خاوەنداری جە بیەو ۋێشا بکەرا، جە کاتو پیلانگێڵنینە چالاکی جۆراو جۆرشا کەرد، گەل گەشمەرڎێش دۍ و زامڎارۍ بیۍ، کە دلېشانە چالاکی زەهرای تەمەن ١٢ ساڵانۍ بۍ کە بیەی و شناسنامە، ئازادی ۋێش جە ڕابەر ئاپۆینە ویناوە.

گەلوو ۋەرکۊتوو کورڎەسانی و ئێرانی خاوەن تاریخێوە کۆنەنۍ، خاوەن چاندێوە مڎرامانینۍ جە ۋەرا ۋەرو ستەمینە سەرەشا نەنامنانەرە ناڕەزایی ۋێشا نیشانە دان و پەنەوازا چێگە بەدمایچۆ بێدەنگۍ نەبا."

 "شۆڕشو ژەنۍ ژیۋای ئازادی مڎرامانێوە تاریخی بۍ"

لییان شیندا باسش چانەیچ کەرد کە:'' شۆرشو ژەنۍ، ژیۋای، ئازادی چالاکیێوە نەبۍ مڎرامانێوە تاریخی بۍ، ڕابەر ئاپۆ واتش تا ژەنی ئازادە نەبۆ، گلېرگە و ژیۋای ئازادۍ نمەبا چونکی ژەنی ژیۋاینە. ژەنۍ، ژیۋای، ئازادی تەنیا درووشمێوە نەبۍ تەقایۆ ڕازێوە بۍ کە ٥ هەزار ساڵێن قڕ و بێدەنگ مکریۆ و سەرش هۆردان.

شۆرشو ژەنۍ، ژیۋای، ئازادی سەرەتێوە بۍ و کۆتایی نییا، گرڎ ڕوۍ ۋێش تازە مکەرۆوە و گۆرەتەر مەبۆ و یۆگێرتەیی ژەنا و گەلا ساز مکەرۆ، ئازادی و دیموکراسی گەلا وەش مکەرۆ، یەکڕیزیی ژەنا گۆشەگیری ماڕۆنە و ئەرەگیری وڕنۆنە."

 لییان شیندا، جە دمادمایی قسەکاشەنە واتش:"داواو ئێمە پەی تەمامو گەلوو کوردی ئانەنە دەس دلۍ دەسی، بە یۆگێرتەیی متاومۍ ۋێما بە رێکوستەی بکەرمۍ و ئا جەنگەیە مردنمۍ، کۆمکوژی سەرو گەلا مردنمۍ و ئازادیی جەسەیی رابەر ئاپۆی مسۆگەر بکەرمۍ و رزگاری و بیەی و ئشناسنامەو ۋێما بەدەس بارمۍ. ئێساڵی بکەرمۍ بە ساڵەو سەرهۊردای، ساڵەو مڎرامانی و یۆبیەی و جە ڕاو ئازادی جەسەیی ڕابەر ئاپۆیۆ دیموکراسی گەلا، ئازادی ژەنا و گلېرگەی بەدی بارمۍ".