ماوەو ٢٥ ساڵان گۊشەگیریێوە سەخت سەروو ڕابەروو گەلوو کوردی عەبدوڵا ئۊجالانیوە بەرڎەواما. هێزە میاننەتەوەییەکۍ وەرپەرسۍ یوەمێنۍ چی گۊشەگیرییەنە، ئینە ڕاسیین. عەبدوڵا ئۊجالان، کە ٩و تشرینوو یوەموو  ١٩٩٨ پەی وەڵیوەبەرڎەی قۊناغوو ئاشتی و پەیماننامێوە سوریانە بەرشییەبۍ، پانۊرامایی سیاسی ئا وەختی تا ١٥ شوباتوو ١٩٩٩ پێسە "پیلانگێڵنیی خاچ"یش ورسەنگنابێ.  

ڕابەروو گەلوو کوردی ٩ کانوونوو تشرینوو یوەموو ١٩٩٨ینە یاوا مۊسکۊ، جە ١٢و تشرینوو ١٩٩٨  فڕۊکەی عاسمانیی ڕوسیای فڕۊکەخانەو لیونارڎۊ داڤینچیینە ڕۊمایی پایتەختنە نیشتۊ. عەبدوڵا ئۊجالان ئیتالیاش پێسە بەختێوە دی پەی چارەسەرکەرەی کێشەکاو کوردی، وەلۍ ڕۊمانە قۊناغێوە زەحمەتی ٦٦ ڕوە چەمەڕوانش بێ.

چا ڕوەوە کە عەبدوڵا ئۊجالان گیریا، دەوروو ئیتالیای چی پرۊسەنە یەدا بە پاو پێویسی باس کریان. بڕۍ ماچا حکومەتوو ئاوەختوو ئیتالیای بە سەرۊکایەتیی ماسیمۊ دالەمای، چی پیلانگێڵنییەنە  دەورش نەبیەن. بڕێچ ڕەخنەو بێهەڵوێستی ئا وەختوو حکومەتوو ئیتالیای کەرا، کە نەتاواش مەنەیۊ عەبدوڵا ئۊجالانی چاگە فەراهەم کەرۊ. جە ١٦ کانوونوو دووەمینە بەرشییەی عەبدوڵا ئۊجالانی ئیتالیانە، ڕۊو ئەوەڵوو پیلانگێڵنییەکەین.

پەڕلەمانتاروو پارتوو کۊمۊنیستوو ئاوەدانکەرڎەیۊ ئیتالیای و ئەنداموو کۊمیسۊنوو هەرمانوکاروو ئا وەختوو ئیتالیایە ڕامۊن مانتۊڤانی یۊ جە شایەتەکاو ئا ڕوا ڕابەروو گەلوو کوردی عەبدوڵا ئۊجالانین ڕۊمانە. ١٢ تشرینوو دووەموو ١٩٩٨گەشتوو مۊسکۊ-ڕۊماینە  چەنی عەبدوڵا ئۊجالانی بییەن، تا ئۊجالان لە ئیتالیانە مەنۊوەخەباتێوە فرەش کەرد. پێوەس پی بابەتیوە چەنی ڕامۊن مانتۊناڤی قسێما کەردی.

بەڕێز مانتۊڤانی چا وەختنە ڕابەروو گەلوو کوردی ڕوسیاوە ئۍ ئیتالیا تۊ پێسە دۊسێوە کوردا چا گەشتەنە چەنیش بێنێ. ئەنداموو کۊمیسۊنوو هەرمانوکاروو بەروو ئیتالیای بێنی. پڕۊسەو مەنەیۊ ئۊجالانی فرۊکەخانەنە، چەنی گوزەریۍ و پلانەو بەشداریکەرڎەی ئا قۊناغەیە چەنین بێ؟

پارتوو بونیادنیایۊ کۊمەنیستی، کە ساڵەو ١٩٩١ ئەرەمەرزیان، تا ئارۊیچ  پەشتیوانی وەنەو کۊشیای گەلوو کوردی کەرۊ. وەڵۍ ئانەینە سەرۊک ئۊجالان بۍ ئیتالیا، پەکەکە داواش وەنەکەردا دلۍ پەڕلەمانینە دەسوەڵێوستەیۍ کەروو، کە گەرەکشانە ئاویربەسی یەکلایەنە بۊ بە پرۊسەو ئاشتی چارەسەروو جەنگی کەرا.  

جە ١٠ کانوونوو دووەمینە ١٩٩٧ کۊمیسیۊنوو کاروباروو بەروو ئەنجومەنوو نوێنەراو ئیتاڵیای سیاونویسوو قەرارێوە وزیا دەنگدایۊ، کە لاو پەرلەمانتارای تەروو گرووپە سیاسییە جیاوازەکاوە قسێش بارەوە کریا و مۊرە کریا، چەنی قەرارێوە جیای گرووپوو ئەلیانزا نازیۊنال یۊ وزیۍ و ڕازی بیا، کە دماخاڵە سەبارەت بە ئەگەروو دەوڵەتی سەربەوۍ کوردی زیاد کریۊ.  

وەختۍ ئینسان جە دیای دەستوورییوە مدیۊ، ئیتاڵیانە قەرارێوە کە لاو کۊمیسیۊنێوە یا ئەنجوومەنوو نوێنەرا یا ئەنجوومەنوو  پیراوە پەسەند کریۊ، ئا قەرارە بەڵگەنامێوەن، کە نوێنەرایەتیی هەڵوێستوو پەرلەمانی کەرۊ، پێسە بەرزتەرین ئەرەمەرزیاو سەروەریی گەلی. حکومەت ناچارا بڕگەکاو قەرارەکەی پێسە وێش بیاونۊ یاگێ.  

چەنی ئی قەرارا، پەی ئەوەڵ  جاری وەڵاتێوە یۊبییەی ئەورووپای هەڵوێستش سەبارەت بە پەرسەو کوردی نیشانە دا و ئامایدلۍ سوپاو تورکیایش پەی دلۍ عێراقی پێسە پاشێلکەرڎەی یاسا میاننەتەوەییەکا پێناسە کەرد، پاشێلکەرڎەی مافەکاو ئینسانوو گەلوو کوردیش شەرمەزارۍ کەرڎۍ و  حکومەتەکەش ئەرەسپارا چارەسەرێوە سیاسی وێزۊوە پەی ئا جەنگی.  

دماو چند حەفتێوە قبووڵکەرڎەی  قەرارەکەی، وەزیروو دلۍ ئا وەختەیە، جۊرجیۊ ناپۊلیتانۊ، جوابوو ناڕەزایەتیی وەرپەرساو گرووپوو فۊرزا ئیتالیایش داوە و سەبارەت بە پەنەدای ستاتۊی کۊچبەری بە هاموەڵاتاو کوردی ساعیبوو پاسەپۊرتی تورکی، واتەبێش جە ئەنجاموو ئا ڕەزامەندییەو کۊمیسیۊنوو هەرمانەو بەری، بە ناچاری ئی هەرمانێشە کەرڎێنە.

دماو ئی هەوڵا لاو پەکەکەیوە پێسە سەرکەوتەێوە گەورەی ستایش کریا، سەرۊک ئۊجەلان پەنەش واتا، کە گەرەکشا چەنی شاندێوە پارتەکەیما کۊ بۊوە. مانگەو ئەیلوولوو ساڵەو ١٩٩٨ وەفدێوە، کە من و پەرلەمانتار واڵتەر دی سێزاریس و سەرۊکوو پرۊسەکاو ئاشتی  بەشوو پەیوەندییەکاو بەروو پارتەکەیما ئەلفیۊ نیکۊترای چەنی سەرۊک ئۊجالانی وەرکەوتوو دلێڕاسەینە کوۍ بییەیمێوە.  

ئی کۊبیەیوە پەی ئێمە و ئۊجالانی گرنگ بۍ، چونکوم ئێمە زاناما، کە پەیوەندییەکێما زیاتەر جە پشتیوانیی نەریتیی بەینوو هێزە سیاسییە چەپەکا وەڵۍ گنا. وەراوەروو ئارڎەینە نەرێنییەکاو گڵۊباڵیزموو سەرمایەداریینە، پەیما بەرکەوت  هەمان بەرژەوەندی و نیگەرانی کۊما کەرۊوە، مشۊم هێزە شۊڕشگێڵنەکاو جیهانی بە یۊگێرتانە ویرۍ کەراوە و ورسونیشت کەرا، نەک وێشا سنووردار کەرا پەی پەشتیوانیکەرڎەی جە پەیوەندییە ئاساییەکانە و ئینەیچ چا وەڵاتانە کە ددان مەنیا کەمینە نەتەوەییەکارە، تاکە چارەسەر دایوسانایا پەی دماییئارڎەی بە جەنگی و وەرقەرارکەرڎەی ئاشتیی.

کۊوەبییەکەی لاو ڕۊنامەو پارتەکە ی"لیبەرازیۊن" پەی ڕای گردینی وەڵا کریاوە و بەشێوە فراوانوو ڕۊنامەکەیش گێرت.  

متاویۊ چێگەوە قەراری نامێبریاو پەرلەمانوو ئیتاڵیای جە ١٠ کانوونوو یوەموو ١٩٩٧بوینیۊ:

https://leg13.camera.it/_dati/leg13/lavori/bollet/199712/1210/pdf/03.pdf

یانۍ حکومەتوو ئا وەختوو ئیتاڵیای زانۍ کە عەبدوڵا ئۊجالان مۍ ئیتاڵیا؟ کۊبییەیۊشنە  چەنی ئۊجالانی چێش ڕووەش دا و فڕۊکەکەنە  چەنی ئۊجەلانی باسوو چێشیتا کەرد؟ بە ڕاو شمە ئۊجالان چی ئیتاڵیاش ورچنی؟

ڕۊنامە میاننەتەوەییەکاوە زانام، کە سەرۊک ئۊجالان ناچارا سوریای جیا بازۊ، دماو ماوێوە کوڵی زانیاریم جە حزبوو کۊمۊنیستی فیدراسیۊنوو ڕووسیایۊ ورگێرت، کە ئۊجالان ئینا ڕوسیا و متاویۊ ئی بابەتە دۊمانە قسێش سەر  کریۊ و بارەو پەنەدای مافوو پەنابەری سیاسییوە قەرار بدریۊ.  

لاێوە تەرۊ تا وێرەگاو ١٠ تشرینوو دووەموو ١٩٩٨ لاو سەرکرڎە کورڎەکاوە ئیتاڵیانە هاگادار کریانۍ، کە سەرۊک ئۊجالان ڕوسیانە تەرسیش ئینا سەرۊ، چونکوم بەشێوە جە حکومەتی و دەزگاو هەواڵگێری پلانیشا نیێبێرە بداش دەسوو تورکیایۊ، حیچی تەری نەزانێنا. حەرپاسە پەنەشا واتا کە سەرۊک قەرارش دان بۍ ئیتاڵیا حەرچندە ئەڵتەرناتیڤی تەرش بۍ، وەروو ئانەی پەرلەمانوو ئیتالیای خاستەرین  هەڵوێستش سەروو پەرسەو کوردی بۍ و هەم وەروو ئانەی گەرەکش بۍ وەڵاتێوە یۊبییەی ئەورووپاینە و ناتۊنە، کە داراو نەریتوو پەشتگیریکەرڎەین و بەشداریێوە گرنگا جە پڕۊسەکاو ئاشتی، بانگەواز و پێشنیازوو کۊبییەیۊی ئاشتییانەی دەس پەنە کەرۊ.

تا سەرۊک ئۊجالان بیاوۊ ئیتالیا و مافوو پەنابەری سیاسی بەدەس بارۊ، یەکسەر دەسما بە هەرمانۍ کەرد.  ڕاسیینە تا گرد چێوۍ بەئاسانی و ڕێکی بلۊ، ئەوەکۊڵیای و ڕاوێژما بە گردوو ئەرەمەرزیای و ڕێکوزیایەکا کەرد. نمەتاوو بارەو پەیوەندیما چەنی ئەرەمەرزیایەکاو ئیتاڵیای و وەڵاتای تەری زانیاریی وردتەر وزوو وەرڎەستا.

بە چند سەبەبۍ، ئی پرۊسە ئاسان نەبێ. تورکیا پێسە دماو قەرارەکەو پەرلەمانی کاردایۊش وەراوەروو چالاکییەکاماوە بێ. بەروو تورکیایچۊ، ئەڵمانیانە ئەمرەو گێرتەی میاننەتەوەیی پەی ئۊجالانی بۍ، گرد ئەوەڵۊ ڕۊشن بۍ بۊنەو قەرارەکەو ئەڵمانیایۊ وەختوو یاوایش ئیتاڵیای گیریۊ، ئیتاڵیا مشۊم جوابی ئەرێیی بدۊوە پەی داواکاریێوە ئەڵمانیای پێوەست بە تەسلیمکەرڎەی ئۊجالانی.

سەرەڕاو زەحمەتی و ئاستەنگە فرەکا، هەلومەرجەکێما ڕەخسنۍ تا سەرۆک ئۆجالان بلۊ پۍ ئیتاڵیای. چنی ڕاوەبەرۍ کوردی لووانی مۆسکۆ و جە چێرزەمینوو ئا فەرمانگە سەروازییانەی کە هەواڵگری ڕووسیای پاسەوانیش کەرێنە جە هەمان فڕگەخانەنە چنی سەرۆک ئۆجالانی کۊبیاوە.

باسوو ئاژەو ئیتاڵیای و ئاژەو وەختوو یاوایما بە ئیتاڵیای کەرد. گیریۆ، بەڵام مەوزیۆ زینڎان، بەڵکم بە مەڵامەتوو قۊرتەو تەندروستییوە جە خەسەخانەنە مەنۆوە. دماتەر جە ماوەو چن ڕووێنە، پېسە ئانەی کە هەن، دادوەر چەمەڕاو ئەگەروو داواکاری ڕادەسکەردەیۆ بە ئەڵمانیا کەرۍ و ئازاڎش کەرۍ.

ڕاسییەکەی پنەم وات ئەگەر گێرتەکا تەریچ وەرچەم گێرا، چونکی سەرەڕاو حۊڵەکاما، بەڵام پا مەڵامەتەی کە ئیتاڵیا وڵاتێوە خاوەن سەروەریی دیفاکتۆیی سنووردارا، فشاروو تورکیای سەروو ئەمریکای و ئیتاڵیای پېسە مزانیۆ پەیوەسا بە ئەمریکایۆ، پۊکاتی ڕەنگە هەروەختۍ بۆ ئاژێوە نادیار بێنە ئاراوە.

پنەش واتا، ئەگەر ئەڵتەرناتیڤی تەریچ بۆ، ئاڎ قەرارش دا بلۆ ئیتاڵیا، چونکی گەرەکشا کەرۊش بە دەرفەتێوە پۍ دەسپنەکەردەو پێشنیارەکەیش پۍ گفتووگۆکا ئاشتی، ئامایش پۍ وڵاتێوە پېسە ئیتالیای، کە هاموەخت ناوەنڎوو ڤاتیکانیا و جە گرڎوو جەهانینە فرە ئشناسیان.

هاموەخت ئاماژەش پانەیچ کەرد، ئا تۆمەتۍ ئاراسەش کریێنۍ هیچ بنەڕەتێوەشا نیا و ۋەروو ئانەی تەسەورش پاسە بۍ کە گرڎ دادگێوە حەق پاڎیی بەخشۆ، پۊکەی کێشەو ڕادەسکەردەیۊیش بە ئەڵمانیای نمۍ دی.

پی جۆرە سواروو یووەم فڕۆکەی بیەیمۍ بەرەو ڕۆما.

جە فڕۆکەکەنە بڕۍ باسوو سیاسەتیما کەرد. باسوو ئاژەو تازەو ئیتاڵیایم پۍ کەرد، ئا حکومەتەی کە دی ئالێما سەرۆکایەتیش کەرۍ دماو ئانەی حکومەتی وەڵین بە سەرۆکایەتی پرۆدی وڕا بەمەڵامەتوو پڕچیای بەینوو ئێمە و حکومەتی و دژایەتیما چنی حکومەتی تازەی. هاموەخت باسوو بڕۍ چێوی ناگرنگ و وەشما کەرد، پېسە تۆپەو پەیا ئیتاڵیای و تورکیای.

دماتەر باسما چانەی کەرد، دماو یاوایما چێش کەرمۍ. واتم عالتەرین چێو ئانەن کە ئی هەرمانۍ کەرمۍ: سەرۆک و سکرتێرەکەش و کوردێوە کە چنی ئێمە سەفەرش کەردەن و بە زۋانی ئیتاڵی قسۍ کەرۍ، لودۍ پۍ ئا دەروازە سنوورییەی کە تایبەتا بە دیپلۆماتکارا و بە داواو مافوو پەنابەری سیاسی ۋێش بشناسۆ. من و ئا کەسای تەریچ کە چنیش بێنمۍ (بەگرڎیی ٤ یان ٥ کەسۍ) بە شێوێوە ئاسایی بە دەروازەو سنوورینە ویەردیمۍ. حەرچنە پاسپۆرتوو هەرمانوو کاری پەرلەمانیم پنە بۍ، بەڵام چنی سەرۆکی نەلانی سنووری دیپلۆماسی، حەتا بیەو سەرۆکی جە ئیتاڵیا و پەیاموو ئاشتییەکەیش چێروو سەیەو ئا مشتومڕە وچکلاو سیاسەتوو ئیتالیاینە نەمەنۊوە، پێمان پاسەما بە خاس زانا کە دەوروو لایەنگریما بە پەنهانی مەنۊوە.

گرڎ چێوۍ بەپاو پلانەکۍ لوواڕاوە. سەرۆک داواو مافوو پەنابەریش کەرد، لەشکرێوە پۆلیسی ۋێش و سکرتێرەکەش و هۊرگێڵنەرە کوردەکەشا گێرتۍ و بەردێشا. یاوناشا بە خەسەخانێوە بەروو ڕۆمای. دووۍ پارێزنەرۍ نامڎارۍ جیولیانۆ پیساپیا و لویجی ساراجێنی هامکاریشا کەرد و دماو چن ڕووێوە ئازاڎ کریا. نووسینگەو کوردی جە ئیتاڵیا بە هامکاری دەزگاو هەواڵگری ئیتاڵیای، کێشە ئەمنییەکێشا ۋەرووچەما گێرتۍ، ڤێلێوە گولانێشا جە کۊڵانێوە بەروو ڕۆمای بە کرێ گرت، پۍ ئانەی بۆ بە شۊنماو مەنەیۆ ئۆجالانی تا وەختوو لوایش. حەرپاسە ئی ڤێلۍ ساحیبو ئامرازوو ۋەرپەرچدایۆ هجومی موشەکی بۍ.

سەرۆک وەزیرانوو ئا وەختەو ئیتاڵیای، ماسیمۆ دی ئالیما هەڵوێسش ۋەران ۋەر بە ئامای ئۆجالانی چێش بۍ؟ ۋەرووئانەی چنی ئۆجالانی بێندۍ، دۆسیێوە سەروو شمە کریاوە، مەڵامەتەکەش چێش بۍ؟

متاومۍ واچمۍ سەرۆکوو ئا وەختەو ئیتاڵیای ۋەران ۋەر بە ئۆجالانی و قەزیەو کوردی سەرد بۍ و ۋێش چنە دوردارا. وەختۍ تەماشەو پێگەو میان نەتەوەیی ئیتالیای و بازرگانییە گۊرەکەیش چنی تورکیای کەرمۍ، بەتایبەتی جە بواری سەروازینە، میاومێنە کە پەیوەندییەکۍ ئیتالیای چنی تورکیای چی ڕوۆ بەقوەتۍ بیێنۍ.

جە مشتومڕێوە پەرلەمانینە، ڕێکوزیاکۍ ئیتاڵیای جوابوو هجومېوە پارتە ڕاسڕەوەکاشا داوە، ڕەوایەتی و یاسایی بیەی هەرمانەکاشا نیشانەدا، ئۆجالان بە مەڵامەتوو ئەمرەو گێرتەی ئەڵمانیایۆ گیریابۍ، داواو مافوو پەنابەریشا ۋەرووچەما گێرت و وەرگریشا چنە کەرد.

بەڵام دماو چن حەفتێوە داوێوەم جە دادگاوە پنەیاوا و تۆمەڎبار کریابێنا بە یاردی دای و هامکاریکەردەی پەنابەریی نایاسایی، چی بارۆ باس جە زانیارییەکا ئێمە نەکریابۍ. گوزارشتەو پۆلیسی سەبارەڎ بە ئامای ئۆجالانی غەڵەتە بۍ. جە گوزارشتەکێنە نوویسیان ئۆجالان بە بەڵگەنامێوە ساختۆ حۊڵش دان سنووری ویەرنۆ، دماو ئاشکرابیەیش گیریان.

دماتەر بێتاوان بەرشیا، چونکی واتم ئۆجالان چنی سکرتێرەکەیش و کوردێوە لووان فڕۆکەخانە پۍ بەرکەردەی پاسپۆرتی دیپلۆماسی جە ئیتاڵیا و ئینەیچ مەبۆ پېسە هەرمانێوە نایاساییۍ تەماشە کریۆ.

داوام جە دادوەرەکا کەرد تەماشەو دیمەنوو کامێراکا فڕۆکەخانەی بکەرا و ئینەی پەشتڕاس کەراوە. ئانەی یاگۍ تەعاجوبیا ئانەن کە دادوەروو دادگاییکەردەکەی ئەرەیاۋناش کە دیمەنەکۍ یاوایما بە فڕۆکەخانەی گومۍ بیێنۍ و واتش کە باوەڕ بە قسەکام کەرۆ و پی جۊرە دمایش ئارڎەن بە پەیجوریەکەی.

ئینۍ گرڎ ئانەی بەر وزا کە ماسیمۆ دی ئالێما هەرمانەی نایاساییەش کەردێنە و حەرچنڎە بە ڕسمی ئەمرەو فاڕای تۆمارەکا ئامای ئۆجالانی نییا، بەڵام محاڵا ئاگاش چینەی نەبیەبۆ.

ئەگەر سەرۆکوو حکومەتی ئاگاڎاروو ئی هەرمانە نایاساییۍ نەبیۍ، وەختۍ ڕاسییەکەش پۍ بەرکۊت، ئشیۍ گرڎوو ئا کارمەندە حکومیا کە بە شێوێوە نایاسایی دژوو کۆماروو ئیتاڵیای جمێنێوە و هەرمانە پۍ بیانییەکا کەرا، بۍ زۊوە و دادگاییشا کەرۆ. بەڵام ئینەما نەڎیی.

وەختۍ عەبدوڵا ئۆجالان ئیتاڵیانە بۍ جە ڕوو دیپلۆماسییوە چێش ڕووەشدا؟ ئاخۆ فشاری گۊرە سەروو حکومەتوو ئیتاڵیای بۍ پۍ بەرکەردەو ئۆجالانی؟ یان کام وڵات ڕاسەو ڕاس فشاری سیاسی کەرۍ سەروو ئیتاڵیای؟

ئا وەختە حکومەتوو تورکیای چێروو سەرۆکایەتی ئەجاویدینە بۍ، فرێوە جە گرێبەسە سەروازی و مەدەنییەکاش بە بەهاو ملیارەها یۆرۆی هۊرشاناوە و باڵیۆزش پۍ گلېرۊبیەکا گێڵناوە و کەمپینێوەش دژوو ئیتاڵیا و حکومەتوو ئیتاڵیای دەسشپنەکەرد و داواو ڕادەسکەردەیۆ ئۆجالانیش کەرد.

بەپەیلواو من دی ئالێما چ بە پەنهانی و چ ۋەروودەم و ڕای گرڎینە، بە ئاشکرا فشارش وستەن سەروو ئەڵمانیای حەتا داواو ڕادەسکەردەیۆ ئۆجالانی کەرۆ. ئەڵمانیا حەجگیز ئینەش نەکەرد.

حکومەتوو ئەمریکای جە ڕاو وەزیرەو بەریشۆ مادلین ئۆلبرایتێوە بە ئاشکرا گەرەکش بۍ ئیتاڵیا ئۆجالانی ڕادەسوو تورکیای کەرۆ. ئی داوۍ نەک هەر پۍ ئەمریکای، بەڵکم پۍ ئیتاڵیا و تورکیایچ دەسوەردایۍ جدی بۍ، حەرپاسە پاشێلکەردەی یاساکاو حکومەتوو ئیتالیای ئاژێوە جدی بۍ.

وەختۍ ئی فشارۍ بە ئاشکرا پۍ ڕای گرڎیی ئاشکرا کریا، ئایا متاودۍ تەسەوروو ئانەی کەرا کە بە پەنهانی چێش کریۆ، یۊچانیشا وەڵابیەیۆ هەواڵوو من بۍ سەبارەڎ بە سەرداکەو سەرۆک ئۆجالانی پۍ ئیتاڵیای. دەزگاو هەواڵگریی ئەمریکای ئاشکراش کەرد پەرلەمانتارێوە ئیتاڵی و دووۍ پەرلەمانتارۍ یۆنانی دلۍ فڕۆکەکەینە چنی ئۆجالانی جە یۆنانە بیێنۍ. هەواڵێوە ڕاس نەبۍ چونکی من چا بێنا، بەڵام وەس بۍ پۍ ئانەی ڕۆنامەکا ئیتاڵیای توڕە کەرۆ و حۊڵوو ئێستەیۆ تاوانباری بڎۆ. چن مانگێوە وەڵۍ ئانەی ڕۆنامەو پارتەکەیم وێنەو ئا دیڎاراشە جە ۋەرکەوتوو دلېڕاسەی چنی ئۆجەلانی ئەنجامما دۍ بێنۍ وەڵاکەردەبێوە و فرێوە جە ڕۆنامەنوویسا حۊڵشادا ئا گومانا سەروو من و پارتەکەیم پەشتڕاس کەراوە.

حەرپاسە ئاگاڎار کریانیۆ کە کۆنفرانسێوە ڕۆنامەوانی جە لایەنوو ئەنداموو ڕاستڕەوو پەرلەمانی، سیلڤیۆ بێرلۆسکۆنی، سەبارەڎ بە پرسە سیاسییە دلېینیەکا سازکریۆ و چی کۆبیەیۊینە، من تۆمەڎبار کەرۆ بە ئاردەی تیرۆریستێوە پۍ ئیتاڵیای و تاوانبارم کەرۆ بە زەرەر یاونای بە پەیوەندییەکا بەینوو تورکیای و ئیتالیای (تەنانەت ئا وەختە پەکەکە جە لیستوو ڕێکوزیا تیرۆریستییەکا یۊبیەی ئەوروپاینە نەبۍ).

جە ٢٥و تشرینوو دووەموو ١٩٩٨ینە ناچار بیا بە ئاماڎەبیەی بێرلۆسکۆنی کۆنفرانسێوە ڕۆنامەوانی سازکەر و واتم سەروو داواو ئۆجالانی یاردەیم دا کە بۍ ئیتالیا و داواو مافوو پەنابەری کەرۆ، حەتا ئاگربەسێوە یەکلایەنە ئەرەیاۋنۆ و داواو کۊبیەیۆ ئاشتی چنی تورکیای کەرۆ.

پېسە چەمەڕا کریۍ، جەنگی سیاسی دەسش پنەکەرد و فرەو ڕۆنامە و کەناڵە تەلەفزیۆنییەکۍ واچێنۍ پۍ زەرەر یاۋنای بە حکومەتی، ئۆجالانم ئاردەن ئیتاڵیا. پۍ یووەمجاری دی ئالێما چێوۍ پەسەنڎکریاش بەربڕی و واتش 'ئۆجالان ئا کەسە نییا کە مشۊم پێم بۍ'، چنی متاودۍ پی هەڵوێستەیە جە ئۆجالانی نزیکۍ بیدێوە! ئا سەرۆکوو ملۋێنان کەسان، جە سەرەتاو هەشتاکا سەڎەی ویەردەیۆ، دماو سوپاو ئەمریکای، دژوو بەقوەتتەرین سوپاو ناتۆی مردانۆ و سەرۆکوو جەنگی گەریلاییا. بەڵام بە پاو فرێوە جە ڕۆنامەنویسا ئیتاڵیای و نوێنەروو پارتە ڕاسڕەوەکا و تەنانەڎ بڕۍ چەپڕەوۍ نەژاڎپەرستۍ و نەزانۍ، من پۍ لوایۆ گژۍ حکومەتیرە ئۆجالانم ئاردەن ئیتاڵیا!