سەعات ١٠و سەرسەعبوو ئارۊی پەنجشەممە، پارکوو گەمەو شاروو هەڵەبجەینە، بە نامونیشانوو "هەنار و پایزوو هەڵەبجە"ی و بە بەشداریی هەزاران کەسا تەماموو شارەکاو پانیشتوو کوردستانینە و چند یاگێوە وەرکەوتوو کوردستانی و  فرەو مێماناو وەڵاتە هامسایا و باڵیۊزا و کۊنسوڵاو وەڵاتاو دنیۍ نۊیەمین فێستیڤاڵوو هەناری شاروو هەڵەبجەو پانیشتوو کوردستانینە دەسش پەنە کەرد.

 قەرارا ڕوانە سەعات ٠٩:٣٠ بەیانی پەی ٠٦:٠٠وو وێرەگای فێستیڤاڵەکەنە خێرامای سەرڎایکەرا کریۊ، ئارۊ ٢ۍ مانگۍ ڤستیڤاڵەکە دەسش پەنە کەرد و ڕواو ٣ و ٤وو مانگێچ بەرڎەوام بۊ هەرمانەکاشنە، بە پاو قسۍ ئەندامێوە لوجنەو باڵاو فێستیڤاڵوو هەناروو هەڵەبجەی، نامنویسشا پەی باخەوانا و ژەنە دەسڕەنگینا کەرڎەن و ٥٠٠ یاگۍ پەی ساعیبباخا ئامادۍ کریێنۍ و ٢٠٠ ژەنۍ دەسڕەنگینێچ بە بەرهەمەکاشا بەشدارۍ  ڤستیڤاڵەکەینۍ.

 حەرچندە ڤستیڤاڵەکە بە نامۍ هەناراوەن و هەناری و تەماموو بەرهەمە وەشکریایەکا جە هەناری بابەتی سەرەکیی فێستیڤاڵەکەینۍ وەلۍ وەزی، دۊشاو، سرکە، هەچکوچی، وارڎە کورڎەوارییەکۍ و گردوو بەرهەمە وێمانەکاو هەورامانی و شارەزووری فێستیڤاڵەکەنە هەنۍ، ئینە جگە جە تەماموو هەرمانە دەسییەکاو ژەنە دەسڕەنگینا.

 یاگۍ باسینە، فێستیڤاڵوو هەناری ساڵەی ویەرڎۍ ٢٤ و ٢٥وو ئۊکتۊبەرینە کریا، سەبارەت بەدماوستەیش ئێساڵ، پێسە لوجنەو باڵاو ڤستیڤاڵەکەی واتەنشا،  گەرەکشا بییەن هەناری خاستەر بیاوا پەنە، کەشوهەوا زیاتەر فێنک بۊ کە هەردووە هۊکارەکۍ فێستیڤاڵەکەو ساڵۍ وەڵینێنە یاگۍ ڕەخنەو بەشداربییا بیێنۍ.

 هەناری پانیشتوو کوردستانینە ساڵانە ئەوەڵوو مانگەو ئەیلوولینە یاوا پەنە و تا دلێڕاسەو مانگەو ١٢مەنا، وەختوو یاوایپەنەیشنە باجێوە ڕەمزییش وزیۊ سەر، بە ئامانجوو ساقبیەیوە بەرهەموو دلۍ.