هامسەرۆکو دەم پارتی تونجەر باقرخان واتش: "ئەر یۆگێرمێ، وەرنیشت بۆ بەخاوەنو ستاتۆی، عەلەوییەکێ بەشێوێوە ئازادێ بانە، بەرەکێ ئیمراڵی کریاوە ئێژا ئۆجالان و گەلا تورکیای یۆگێرا. ناچارێنمێ دەنگو وێما هوربڕمێ".
هامسەرۆکا گرڏی پارتو یەکسانی و دیموکراسیی گەلا (دەم پارتی) تولای حاتەم ئۆغۆللارییە و تونجەر باقرخان وەردەمو بیناو دەم پارتینە جە هاتاینە گلێرێ بیێوە. نوێنەرو ڕێکوزیاکا بەشداری گلێرۆبییەی گەلی بیێ.
هامسەرۆکو چەمو عەلەوییە دیموکراتیکەکا (داد) زەینەل کەتە، ئەندامو ڕاوەبەرو ناوەندو پارتی ڕەنج (ئەمەپە) خەلیل ئەمرەک، هامسەرۆکو پارتو سۆسیالیستو چێردەسا (ئەسەپە) دەنیز ئاکتاش، ئەندامو فیدراسیۆنو ئەنجوومەنە سۆسیالیستییەکا ئۆیا نوری قسێشا کەردە.
"ناچارێنێ ستاتۆو کوردا قەبول کەرا
دماتەر هامسەرۆکو دەم پارتی تونجەر باقرخان قسێش کەردێ، واتش: "سەدێوەن کورد جە وەرنیشتەنە بێ شناسنامە بییەن. بەڵام ئەر هەڵای بێ شناسنامە بییەی سەپنا، ئێمە قەبوڵش نمەکەرمێ. ڕژێم جە سوریانە فاڕیا، بەڵام ئیسە مشۆم سیستەمێوە دیموکراتیک ئەرەمەزنمێرە. کورد جە وەرنیشتەنە وەراوەر دڕندەیی داعش ینە مڏرامانشا کەرد و ئیسە بە ئازادی ژیوا. ڕژێمو ئایندەی ناچار کەرا بە ستاتۆو وەرنیشتیوو گەلو کوردی بنیا. ناچارا دان بە گەلارە بنیۆ. ئەر ئا هەرمانی نەکەرۆ جەنگی سەد ساڵە بەردەوام بۆنە".
"متاومێنە بە ئەرەکۆشای بەهێز ئەنجامی خاس بەدەس بارمێنە"
باقرخان جەختش وست سەرو دیدارەکا چنی ڕابەر ئاپۆی، واتش: "متاومێنە ئاشتی بەدی بارمێنە. مەڵامەتو هەژاری جە وڵاتەنە ئا داهاتەنە کە پەی جەنگی خەرج کریۆنە. بە ئەرەکۆشای بەهێز، متاومێنە دەسەڵاتی ناچارکەرمێ بە ئاشتی. ئەر چی پرۆسەنە بێدەنگێ بیمێ، دۆڵەت سیاسەتو وێش سەرمارە سەپنۆ، پۆکەی ئا ئەرک و وەرپرسیارەتییە چی پرۆسەنە گنۆ سەرو شاناما بە ڕاو گرڏی ئەرەیاونمێش".
ناڕەزایەتی وەراوەر هرووژمکەردەی سەرو عەلەوییەکا
باقرخان جەختش وست سەرو هرووژم کەردەی سەرو عەلەوییەکا جە سوریانە، داواش جە دەسەڵاتی کەرد پەیوەندییەکاشا چنی ئیدارەو تازەی سوریانە بەکاربارانە و کۆمکوژی عەلەوییەکا مدرنا، تا کورد و عەلەویەکێ و گرڏو پێکئاماکا پێسەو هاموڵاتی یەکسان تەماشە کریا، واتش: "ئەر یۆیگێرمێ وەرنیشت ستاتۆیێ بەدەس مارۆ، عەلەوییەکێ بە ئازادی ژیوا، بەرەکێ ئیمراڵی کریاوە، ئێژا ئۆجالان و گەلا تورکیای یۆگێرا".
