٤١ساڵۍ سەرو مدرامانو ڕۊچۍ مەرڎەی گۊرېرە ۋیەرۊ کە جە ١٤و تەمووزو ١٩٨٢ جە زینڎانو ئامەڎی جە لایەنو کادرە سەرمەشقەکا پەکەکەیۊ دەسشپنەکریا و بە گەشمەرڎەبیەو 'محەمەد خەیری دورموش، کەمال پیر، عاکیف یەڵماز و عەلی چیچەک'ی دمایش ئاما. بۆنەو ئا ڕۋەیۊ کە پۍ کۊشیای ئازاڎیی کورڎی فرە گرنگا، هامسەرۊکو دەسەی ڕاۋەبەری کەجەکەی جەمیل بایک وتارێۋەش نۋیستېنە.

وتارەکۍ جەمیل بایکی پی جۊرەنە:

"مدرامانو ١٤و تەمووزی جە دژوو ستەم و زوڵمی و ئەشکەنجەی چالاکیېۋە یەکجار گۊرەن کە کاریگەرییەکەش هەڵای ۋەردەواما. ئنڎەو گۊرەییەکەیش پۍ گەلەکەیما و پارتەکەیما، جە هەمان وەختەنە پۍ تاریخو مرۆڤایەتیچ یۊ جە گۊرەتەرین چالاکییەکان. ۋېڕاگرا ١٤و تەمووزی گۊرەی بە ئێمەی گەل و جمیەری هەڵۋێسی راسشا جە دژوو کۆلۆنیالیزمی و فاشیزمی نیشانەدا و ڕاو سەرکۊتەیشا دەسنیشان کەرڎ، چېرو وەحشیانەتەرین و قورستەرین ئەشکەنجەینە نمونەو رەسەنی پارېزناو بەهاکا مرۆڤایەتی و بە مرۆڤم مەنەیۊیشا وست ۋەرو چەما. ۋەرو ئی تایبەتمەنڎیەینە مدرامانو ١٤و تەمووزی پۍ مرۆڤایەتی بەهېۋە گۊرەش هەن. کادرە سەرمەشقەکۍ پارتیما 'محەمەد خەیری دورموش، کەمال پیر، عاکیف یەڵماز و عەلی چیچەک' کە ئا مدرامانە گۊرەشا خوڵقنا، جە ساڵیاڎو چالاکیەکەیشانە جارێۋەتەر بە رێز و پنەزانایۊ ۋیرشا ماروە و ۋەرودەمو چالاکییە تاریخیەکەیشانە سەرەو ۋېم منامنورە. جە کەسایەتی ئاڎیشانە گرڎو گەشمەرڎا دیموکراسی و ئاخېزی یاڎ کەروە. وەعدو سەرکۊتەی کە بە گەشمەرڎاما دان چی بۆنەنە سەر جەنۊ واوەیش کەروە. ئا هامڕېما کە بە گیانو ڕۊحیەتو ١٤و تەمووزیۊ جە زینڎانەکا کۆلۆنیالیستینە ۋېڕاگری مکەرا بە ڕێزۊ سڵامشا پۍ کیان و ۋەشەویسی ۋېمشا پێشکەش کەرو.. حەرپاسە سڵام چا گەریلایایچە کەرو کە بە گیانو ١٤و تەمووزیۊ جە دژوو دوژمنی ئەرەگیری جەنگ کەرا، بۊنەو مدرامانی گۊرەی و چالاکیە سەرکەوتوەکاشاۋە مبارەک بایشا ۋنەکەرو. راسی بنچینەیی و حەرە گرنگ کە مدرامانو ١٤و تەمووزی بە ئێمەش نیشانەدا ئانە بۍ کە هەلومەرج چنڎەیچ دژوار بۊ بە مدرامان ئینسان متاۋۊ شکۆو مرۆڤایەتی پارېزنۊ و شکس بە دوژمنی بارۊ.

دلۍ قورستەرین هەلومەرجینە دۆزی ئازاڎی و سەربەخۆیی کورڎسانیشا پارېزنا

مدرامانو ١٤و تەمووزی مشۊم جە گرڎ ڕۋېۋە درکش پنەکریۊ و پەسەنڎ کریۊ. ئی چالاکیە نمونەو گیانبازی، قارەمانی و ئازایەتیا. جە دژوو ستەم، دڕندەیی و ئەشکەنجەی هەڵۋێسېۋە رەسەنا. خۊتانکەرڎەین جە ژیای و بەها مرۆییەکا. قەناعەتی گۊرەن بە کۊشیای، بە دۆزی ئازاڎیی گەلوو کورڎی. جە هەمان وەختەنە وەفاڎارییا ۋەران ۋەر بە ڕابەرایەتی، پارتی و هامڕایی. جە مدرامانو ١٤و تەمووزینە قەناعەت و وەفاڎاری بە دۆزی ئازاڎیی و سەربەخۆیی کورڎسانی و خەتەو کۊشیای پەکەکەی بەرجستەن. ۋەرو ئانەی ۋېڕاگرا ١٤و تەمووزی دلۍ دژوارتەرین هەلومەرجینە ئا دۆزەشا پارېزنا و سەرو ئەساسو خەتەو مدرامانو پەکەکەی کۊشیۍ. حەرپۊکەی ئانۍ کە مدرامانو ١٤و تەمووزیشا دەسپنەکەرڎ، ١٤و تەمووزیشا خوڵقنا ئا بەهۍ جە تایبەتمەنڎییەکا کەسایەتیە تاریخیەکانۍ. ۋەرو ئانەی تاۋمۍ جە گرڎ ڕۋېۋە جە ١٤و تەمووزی بیاۋمېنە مشۊم بە عالی مدرامانو ١٤و تەمووزی بشناسمۍ، بیاۋمېنە. ئینە فرە گرنگا و مشۊم بە گرڎ وردەکارییەکاشۊ سەرش مرڎمۍ و درکش پنەکریۊ. حۊڵ مڎەو سەرو کاریگەری مدرامانو ١٤و تەمووزی چی وەختەنە سەرو جبەری، بە دیاریکریایی سەرو پارتی، کادرەکا و جەنگاوەرا مڎردونە.

ئامانجی ئەساسی ١٢و ئەیلولی سەرکوتکەرڎەی جمیەری ئازاڎیی بۍ

پۍ ئانەی ئینسان بتاۋۊ جە مدرامانو ١٤و تەمووزی و کاریگەریەکەیش بیاۋۊنە، ۋەڵۍ گرڎ چېۋېنە مشۊم هەلومەرجو ئا سەردەمەو مدرامانو ١٤و تەمووزی بزانۊ، بیاۋۊنە. مدرامانو ١٤و تەمووزی چالاکیېۋەن کە جە دژوو رژێمو کودەتای فاشیستیی ١٢و ئەیلولی ئەنجامدریا. رژێمو کودەتای فاشیستی ١٢و ئەیلولی بە ئامانجو کۊکوشکەرڎەی کورڎا ئەنجامدریا. کۊشیای رزگاری نەتەوەیی، سۆسیالیزمی چینایەتی و گەلۍ چېردەسی کە جە جەهانەنە پەرەشا ئەسابۍ، جە سەرەتاو ساڵەکا ١٩٧٠ی کاریگەریش کەرڎ سەرو تورکیای و کورڎسانیچ، بەتایبەتی حەماسەتی شۆڕشگێڵیش بە گەنجا بەخشا. دەوڵەتو تورکی بەمەڵامەتو ئانەی نەتاۋاش سەرو دەسو رێکوزیا فاشیستیە ملیشیاکاوە ۋەر بە گۊرەبیەی ئاخېزی گېرۊ، بە سەرمەشقی ناتۆی جە ١٢و ئەیلولو ١٩٨٠ ی کودەتای سەروازیش کەرڎ. جە ڕاو رژێمی سەروازیی فاشیستی کە جە ئاکامو کودەتای سەروازی سازکریا، گەرەکشابۍ کۊشیای سۆسیالیزمی جە تورکیانە سەرکوت کەرا، جە کورڎسانیچەنە ڕا چانەی گېرا کە کۊشیای رزگاری و هۆشمەنڎی نەتەوەیی دلۍ گەلینە ۋەڵا کریۊۋە، پۍ ئانەی کورڎا کۊکوش کەرۊ. حەرپۊکەی ئامانجی ئەساسی رژێمی سەروازی ١٢و ئەیلولی سەرکوت کەرڎەی جمیەرو ئازاڎیی کورڎی بۍ کە هەڵای تازە هەنگامەش نیېبۍ، ئامانجی تەریچش ئانەبۍ گەلوو کورڎی پاکتاو کەرۊ. دماو ئانەی کودەتاکە کریا و رژێمی سەروازی ئەرەمەرزیا، پۍ جا بەجېکەرڎەو ئا ئامانجیە هەنگامە نریا. سەرو ئا ئەساسیە جە تورکیا و کورڎسانەنە سەرکوت و چەۋەسیای دەسشپنەکەرڎ.حۊڵشدا کە جمیەرە شۆڕشگێڵییەکا سەرکوت کەرۊ، بە لێشاوۍ گۊرەی تنوتیژی گەرەکش بۍ کە گلېرگەی بە ویسو ۋېش وزۊ دلۍ سیستمیۊ. ۋېش جە ۋېشەنە بە کارئارڎەو شێوازو کودەتای سەروازیچ ئانەبۍ کە شەپۆلێۋە تنوتیژی دژوار ۋەڵاکەرۊۋە، گەلی سەرکوت کەرۊ و چۊکشا پنەدۊرە.

بەمەڵامەتو کودەتاو سەروازی ١٢و ئەیلولی ژمارەېۋە فرە جە شۆڕشگېڵا گیریۍ. ئاژەکە فرە دژوار بۍ پۍ مەنەیۊ و ۋېپارېزنای جمیەرە شۆڕشگێڵییەکا جە ۋڵاتەکەنە. حەرپۊکەی فرەو جمیەرەکا ناچارۍ بېنۍ ڕۋەکەرا جبەرو ۋڵاتی. رژێمی سەروازیی فاشیستی پۍ ئانەی دیکتاتۆریەت و هەڵۋېسو ۋېش نیشانە بڎۊ بە دەیان شۆرشگێڵېش دۍ قەنارە. گېرتەکۍ ئەشکەنجەدریۍ، سەرەڕاو ئەشکەنجەدای حۊڵشادا کە پەشیمانی و دڎان نیایپۊرەی سەپنانۍ. ئەشکەنجەشا جە زینڎانەکانە کەرڎ بە سیستەم، ژمارېۋە فرە زینڎانیۍ چېرو ئەشکەنجەینە گیانشا جە دەسدا. چا یاگانەی مدرامان نەکریا پەشیمانی و دڎان نیای پۊرە ئاما ئاراوە و ئانەیچ کاریگەری خراپش کەرڎ سەرو زینڎانیا و گلېرگەیچ. سەرو گلېرگەیچ فشاری گۊرە ۋەشبی و بە تنوتیژی گەرەکشابۍ خەڵکی سەرکوت کەرا. کۊکوشی  و ئەشکەنجە جە زینڎانەکانە، سەپناو پەشیمانی و دڎان نیای پۊرەی، ناچارکەرڎەی جمیەرە شۆڕشگێڵییەکا پۍ جیائاستەی ۋڵاتی و فشاری قورس سەرو گەلی، سیاسەتو سەرکوت کەرڎەی پاسەش کەرڎ کە دلۍ گلېرگەینە بێهیوایی بېنە ئاراۋە. ۋېش جە ۋېشەنە جە ڕاو رژێمو کودەتاو ١٢و ئەیلولیۋە نیازشابۍ کە شۆڕشگێڵا سەرکوت کەرا، گلېرگە سەرکوت کریۊ و چۊک بڎۊرە.

رژێمو ١٢و ئەیلولی پەشتیوانی جە جیائاستەو ۋڵاتی کەرۍ

دمابەدماو کودەتاکەی هەلومەرجەکە پۍ مەنەیۊی جە ۋڵات و درێژەدای بە کۊشیای پېسە ۋەڵتەری، قورس بۍ. ۋەرو ئانەی فشارۍ گۊرە سەرو گلېرگەیۊ بۍ، یاگۍ مەنەیۊی و پەیوەنڎییەکا ئاشکرابیېبێنۍ، ژمارېۋە فرە ۋڵاڎپاڕێز، تەرەفدارۍ و کادرۍ گیریۍ بېنۍ. ئیتر مەجال نەمەنەبۍ کە پېسە ۋەڵتەری دلۍ گلېرگەینە مەناوە و ۋېشا پارېزنا، تەرسەو پاکتاوی فرۍ بۍ. ۋېش جە ۋېشەنە فرەو جمیەرەکایچ کە نەتاۋاشا ڕاو جا گېرانە ۋەر و دما کۊتۍ، پاکتاوکریۍ. ئا ئاژە لۋای جبەرو ۋڵاتیش سەپنا. پی جۆرە ئا شۆڕشگێڵۍ کە دوژمن نەتاۋابېش گېرۊسا قەرارشا دا ڕۋەکەرا جبەرو ۋڵاتی. لۋای پۍ بەرو ۋڵاتی پی جۆرە دەسشپنەکەرڎ. بە دڵنیاییوە گرڎ بە یەک جۊر جە ۋیرکەرڎەیۊ و ئامانجۊ نەلۍ پۍ بەرو ۋڵاتی. ژمارېۋە فرە ڕېکوزیا و کەسایەتیۍ ۋەرو ئانەی هەلومەرجو کۊشیای نەمەنەبېۋە جە بەرو ۋڵاتی مەنېۋە و بېجگە جە هەرمانەو یاۋنەری ڕۋەشا کەرڎېبۍ جبەر، پی جۆرە پاکتاوبیەیشا قبوڵ کەرڎەبۍ. ئانۍ کە خۊتان ئی ۋیرکەرڎەیۊ بېنۍ ڕۋەشا کەرڎە ئەوروپا، چا مەنېۋە و درێژەشا بە ژیای پەناهەنڎەی دا.

بێگومان مەنەیۊیشا ئەوروپانە بە ماناو دەس هۊرگېرتەیشا بۍ جە کۊشیای، خەریکبیەی بە ژیاو ژیۋای کەسیۊ، قبوڵکەرڎەی ژیای مۆدێرنیتەی سەرمایەداری و ئایدۆلۆجیاو لیبراڵیزمی. ۋەرو ئانەی ئەوروپا چەقو سیستمی مۆدێرنیتەی سەرمایەداری بۍ. جە ئەوروپا کۊشیای دیموکراسی و ئازاڎیی ١٥٠ ساڵی، بەهای کۆمەڵایەتی خوڵقیای جە ڕاو ئایدۆلۆجیای لیبراڵیزمیوە دلېنە شیېبېنۍ. ئا کەسۍ کە لۋۍ پۍ وای نەتاۋاشا ۋېشا چانەی رزگار کەرا. ۋېش جە ۋېشەنە ئا سەرمەشقۍ جمیەرە سۆسیالیستیەکا تورکیای کە مەنېبېنێۋە فرەیشا ڕۋەشا کەرڎە ئەوروپا، پی مەڵامەتیچۊ کۊشیای جە تورکیانە لاوازبی. ئا زەرەرشە ۋنەکۊتۊ کە هەڵای ۋەردەواما. جە لایۍ تەرۊ ئەوروپا بە مەبەس بەرەش ڕۋەو شۆڕشگێڵارە کەرڎۊ. بە پێشکەشکەرڎەو بڕۍ دەرفەتۍ و هامکاری ماڎی پاسەش کەرڎ کە ڕوەکەرا واگە. مېڎانو ئەوروپای چېرو کۊنتڕۆڵو سیستەمینە بۍ. چا نەک کۊشیای، بەڵکم مۆدێرنیتەی سەرمایەداری ژیایش خوڵقنا. ۋەرو ئانەیچ رژێمو ١٢و ئەیلولی لۋای پۍ ئەوروپای سەرو ۋېش بە مەترسی نەۋینۍ، بە پێچەوانۊ ۋەرو ئانەی بە ماناو بڕیایرەی بۍ جە ۋڵاتی و دەسهۊرگېرتەی بۍ جە کۊشیای، گەرەکش بۍ بلا پۍ ئەوروپای.

جمیەرەکەما ڕۋەشکەرڎە مېڎانو ۋەرکەوتو میامینی

رابەر ئاپۆیچ پۍ ئانەی جمیەرەکەی جە پاکتاوبیەی پارېزنۊ، لۋای پۍ جبەرو ۋڵاتیش بە خاس زانا، بەڵام ڕابەر ئاپۆ پۍ لۋای پۍ جبەرو ۋڵاتی مېڎانو ئۊروپایش هۊرنەچنی. رابەر ئاپۆ لۋای پۍ بەرو ۋڵاتیش پېسە ئاماڎەکاری و ڕاوجای هۊرسەنگنا. ئا شۆڕشگێڵۍ کە نەکەوتېبېنۍ دەسو دوژمنی بەرۊشا بەرو ۋڵاتی، چا بە عالی پەروەرڎەشا کەرۊ، بانۍ بە خۊتان ئەزمونی ئایدۆلۆجی و سەروازی، گېڵاۋە پۍ ۋڵاتی و بە شێواز و تاکتیکی تازە کۊشیای بەرانۍ ڕاۋە. ۋیرۊکەکە پی جۊرەبۍ. ۋەرو ئانەی پەکەکە مېڎانو ۋەرکەوتو میامینیش هۊرچنی.

ئا وەختە مېڎانو ۋەرکەوتوو میامینی پېسە مېڎانو کۊشیای و ئاخېزی نریېرە. مېڎانو جمیەرە فەلەستینیەکا پۍ ئانیشا کە گەرەکشابۍ کۊشش کەرا فرە گرنگ بۍ. جە هەمان وەختەنە بڕۍ مەجالۍ خوڵقیېنۍ. بۍ گومان پېسە ئەوروپای دەرفەتی ماڎی و ژیای کەسی بیەیش نەبۍ. پۍ ئەرەنیشتەبیەی، پەروەردەی ئایدۆلۆجی و سەروازی مەجالش خوڵقنا. ڕابەر ئاپۆ لۋای پۍ جبەرو ۋڵاتی بە تەمامەتی پېسە ئاماڎەکاری پۍ گېڵایۊ پۍ ۋڵاتی هۊرسەنگنا، پۊکاتی مېڎانو ۋەرکەوتوو میامینیش پېسە مېڎانو مەنەیۊ هۊرچنی. لۋایش پۍ ئەوروپای بە مەتەرسی زانا، ۋەران ۋەرو ئینەینە کۊشیایۍ گۊرەش کەرڎ. هەم پۍ ئانەی جمیەرەکە و هەمیچ جمیەرە شۆڕشگێڵییەکۍ تەرۍ هەنگامۍ غەڵەتۍ نەنیا کۊشیایۍ پی جۊرە ئەنجام دریا. حەر پۊکەی توانا و مەجالە کەمەکۍ جمیەرەکەیش پێشکەش بە جمیەرە شۆڕشگێڵیەکا کەرڎ و پاسەش کەرڎ کە گرڎ کەسۍ ڕۋەکەرۊ کۊشیای.

"تەوەقوعو ڕابەر ئاپۆی پۍ کودەتاو ١٢و ئەیلولی"

جە ڕاسینە هەڵای کودەتاو ١٢و ئەیلولی ڕۋەش نەڎابۍ ڕابەر ئاپۆ لۋا پۍ بەرو ۋڵاتی و پلانەش نیارە کە کادرەکا یۊ دماو یۊی بەرۊنەجبەر. ۋەرو ئانەی ڕابەر ئاپۆ تەوەقوعو کودەتاو ١٢و ئەیلولیش کەرڎەبۍ. ئا تەوەقوعەو ۋېش پۍ جمیەرەکا تەریچ باس کەرڎەبۍ و ئەرەیاۋنابېش کە مشۊم ڕاوجا گېرانە ۋەر. ۋېش جە ۋېشەنە فرېۋە جە کادرەکا پەکەکەی کە گیریېبێنۍ ۋەڵۍ ئەنجامدای کودەتاکەینە گیریېبېنۍ، واتە هەڵای کودەتاکە بە شێۋېوە ڕەسمی دەسشپنەنەکەرڎەبۍ، جە کورڎسانەنە دەسش پنەکەرڎەبۍ. چنی کودەتاکەی شۊنەو ئانیشارە گېڵېنۍ کە بەرۊ بېنۍ، جگە چانیشا کە لۋېبېنۍ بەرو ۋڵاتی تا حەدېۋە گرڎو ئەویشای تەری گیریۍ. نەک حەر کادرەکۍ، بە سەڎان تەرەفدارۍ و ۋڵاڎپارێزۍ وزیۍ دلۍ زینڎانی.

ڕابەر ئاپۆ ئاگایی ئانەیش بۍ کە قۆناغێۋە پی جۆرە مېنە ئاراوە، پۊکاتی لۋا پۍ بەرو ۋڵاتی و حۊڵشدا کە توانا و دەرفەت پۍ جمیەرەکەی دەسەبەر کەرۊ، پەروەردەی ئایدۆلۆجی و سەروازی خوڵقنۊ. مزانیۊ کە ڕابەر ئاپۆ بە توانا و دەرفەت و پەیوەنڎی فرە کەم ئی هەرمانېشە بە ئەنجام یاۋنا. ڕابەر ئاپۆ پەشتیش بە توانا و دەرفەتی حازرو ئاماڎەی نەبەست، بەڵکم توانا و دەرفەت و پەیوەنڎییەکېش ۋېش ۋەشش کەرڎۍ، چونکی حیچ پەیوەنڎی و توانېۋە ئاماڎەکریاما نەبۍ. وەختۍ کودەتای سەروازی ١٢و ئەیلولی ڕۋەشدا، جمیەرەکە جە سایەو ئاگایی و هەرمانەکا ڕابەر ئاپۆینە بە قوەتۍ کەمیچۊ پڕاوە پۍ ۋەرکەوتوو میامینی و یاگە گیربی. بێگومان ۋەرو ئانەی ڕابەر ئاپۆ جە بەرۊ بۍ هەلومەرجو مەنەیۊیش خوڵقنا، متمانۍ گۊرېش پۍ ۋەڵۍ وستەو کۊشیای خوڵقنا. چ ئانۍ کە زینڎانەنە بېنۍ چ ئانېچ کە نەگیریۍ بېنۍ گرڎ قەناعەتشا پاسەبۍ کە ڕابەر ئاپۆ کۊشیای ۋەڵۍ وزۊ.

ئەشکەنجەدای کادرەکاو پەکەکەی پەیوەندییش بە کاراکتەری دوژمنکارانەو دەوڵەتوو تورکیوە وەراوەروو بە کورڎیوە هەن

کودەتای سەروازی فاشیستی ١٢ ئەیلوولوو ١٩٨٠ پەی ئانەیە کریا، کە سیستموو کۊلۊنیالیستی قاڕچنی سەرجەنۊ مەرزیۊراوە و سەروەریی دەوڵەتی  ملوو گلێرگەیرە دەسەبەر کەرۊ. کودەتای سەروازی فاشیستی ئامانجی سەرەکییش ئانە بۍ، کە سەرە بە گلێرگەی کۊمنۊرە  و سەرکوتش کەرۊ.  وەروو ئانەیە شەپۊلێوە دژوارەو فشاری  و تندوتیژی ملوو گلێرگەیرە پەیڕەو کریا. بە نۊعۍ کە جارێوە تەر گلێرگە پەی داواو  ئازاڎی نەلۊ، بوار و مەجالە پەی کۊشیای نازۊوە. ئا هەستا بەتەمامەتی مەژگشانە بەر بارۊ، بێگومان شۊڕگێڵنۍ ئامانجی سەرەکیی کودەتای سەروازیی فاشیستی بێنۍ، وەروو ئانەیە ئانۍ ویری ئازاڎ دێنۍ بە گلێرگەی، گلێرگەی بەرەو کۊشیای بەرێنۍ شۊڕشگێڵنۍ بێنۍ. وەروو ئانەیە هەستوو کۊشیای و ئازاڎی دلۍ گلێرگەینە دلێنە بەرا، ئشیا ئەوەڵۊ شۊڕشگێڵنۍ و جمیەرە شۊڕشگێڵنییەیکۍ دلێنە بریێنۍ. وەروو ئانەیە ڕژێموو سەروازیی فاشیستی ١٢ ئەیلوولینە بەتندی لوا سەروو شۊڕشگێڵنەکا. فرێشا گیریۍ و ئەشکەنجە دریۍ. ڕژێموو کودەتای فاشیستی ١٢ ئەیلولی پا کرڎەواشە پەشیمانی و داننیایپۊرەش سەپنا و گەرەکش بۍ سەرچەمەو بڕوۍ و هومێدوو گلێرگەی وشک کەرۊ، بپاسە کەرۊ کە سەرە پەی سیستموو کۊلۊنیالیستی قاڕچنی کۊمنارە، و قبووڵش کەرا. زیندانی سەروازیی ئامەدی چا ناوەندە سەرەکییا بۍ کە کادر و لایەنگێراو پەکەکەیش دلێنە بێنۍ. ئا ئەشکەنجە جە زیندانوو سەروازیی ئامەدینە جە کادر، لایەنگێرا و وەڵاتپارێزاو کورڎی کریا، تەنیا بە کاراکتەروو دەوڵەتوو تورکی کۊلۊنیالیستی دوژمنوو کورڎا تاویۍ گوزارشتش چەنە کریۊ. دڕندەیی و ئەشکەنجەی دژوار جە زیندانوو سەروازیی ئامەدینە، کە تاریخەنە هامشێوەکەش نەوینیان بییەن تەوەروو فرە جە گۊرانیا، ڕۊمانی، نویسیای و فیلمی، جە یادەوەریی گەلوو کورڎسانینە کێشیان.

ڕابەر ئاپۊ شانەش دا وەروو  باروو کۊشیای

هاموەخت چەنی فشار، ئەشکەنجە و کۊکوشی وەراوەروو زیندانییان و گەلی، جە دژوو لایەنە شۊڕشگێڵنەکا هجوومێوە گەورەی ئایدۊلۊژی لوۍ ڕاوە. بە خوڵقنای بێهیوایی دلۍ لایەن شۊڕشگێڵنانە، ئامانجشا ئانە بۍ شۊڕشگێڵنا جە کۊشیای دوورۍ وزاوە. ڕابەر ئاپۊ پێسە جبەروو وەڵاتی مەیدانوو وەرکەوتوو دلێڕاسەیش ورچنی، وەرش گێرت بە دۊخێوە چانەی و گەرەکش بۍ وەرکەوتوو دلێڕاسەی کەرۊ بە یاگۍ ئامادەکاری پەی گێڵایۊ پەی وەڵاتی. پا ویرۊکەرڎەیە لوابۍ وەرکەوتوو دلێڕاسەی، نەکەوتەبۍ دەسووو دوژمنی و بەشێوە جە کادرەکایچش بەرڎێبێنۍ لاو وێش. 

وەلێم وەختۍ لوا مەیدانوو وەرکەوتوو دلێڕاسەیچ گرڎ چیوۍ چارەسەر نەبی.  جە گرڎیاگێوەنە دژوو شۊڕشگێڵنا هجوومی ئایدۊلۊژیک بۍ. وازیۍ دلۍ لایەنە شۊڕشگێڵنەکانە بێبڕوایی، بێهیوایی و یاواینەی ڕاسڕەوی بەرەووەڵی بریۊ. ئانە جە مەیدانوو وەرکەوتوو دلێڕاسەینە بۍ. جەڕاسینە بەفرەیی وەرکەوتوو دلێڕاسەینە کریا.  وەروو ئانەیە ئانۍ کە لوێبێنۍ وەرکەوتوو دلێڕاسەی پلانیشا پەی بۊ گێڵایۊ پەی وەڵاتی و پەرەپەنەدای بە کۊشیای نیێرە، بەتایبەتچ بڕۍ بەشوو چەپوو تورکیا کە ئامۍ وەرکەوتوو دلێڕاسەی، هەوڵێشا دۍ جمیەرە شۊڕشگێڵنییەکا چاوە بەرەو ئەورووپا بەرۍ پڕنا و گەرەکشابۍ ڕووەو گرڎکەسی کەرا بکەنە پەیجوریێوە چینەی. جەڕاسیینە فرەو جمیەرا کە  جە پەکەکەی زیاتر داراو توانای و هێزی بێنۍ، ڕووەشا کەرڎە ئەورووپای و بیۍ بایسوو ئانەیە ئا ئەقڵیەتەیە دلۍ لایەنە شۊڕشگێڵنەکانە بڵاو بۊوە.

لایوە تەرۊ ئانە تەنیا ئەقڵیەتێوە نەبۍ، کە جە بەروو ئێمەوە  پەی وەڵۍ لوابۊ. ئا ئەقڵیەتە دلۍ لایەنەکاو ئێمەیچەنە بەرەووەڵۍ لوابۍ. ئانە کە ئی ئەقڵیەتەشە دلۍ ئێمەنە بەرڎ وەرۊ چەتین گونگۊر (سەمیر) بۍ. چا وەختەنە چەنی ڕابەر ئاپۊی هەوڵۍ دۍ ئا کادرۍ کە جە وەڵاتۊ کێشنیێبێنێوە پەی کیانایۊ پەی وەڵاتی جە ڕووەو ئایدۊلۊژی و سەروازیوە ئامادە کەرۊ، سەمیر و ئانێشا چەنیش بێنۍ بە پێچەوانەو ڕابەر ئاپۊیۊ دلۍ پارتەکەیچەنە هەوڵێشا دۍ لوای پەی ئەورووپای و پەنابەری زیاتەر کەرا. ئا ئەقڵیەتە کاریگەریی نەرێییش لەسەروو لایەنەکاوە نیارە و دانا و قووڵبییەیۊ و سەرنجەشا پەرشە و وەڵا بییۊ. ئەقڵیەتیی ڕاسڕەو پەشتیش بە فشاری و ئەشکەنجەو ڕژێمی سەروازی فاشیستی ١٢ ئەیلوولی بەسۍ، کە جبەر و دلێوە سەروو گەلی و زیندانییاوە پەیڕەو کریۍ، گەرەکش بۍ دلۍ جمیەرە شۊڕشگێڵنییەکایچەنە وێش ڕێک وزۊ و کاریگەرییەکەیش زیاتەر کەرۊ. وەرووئانەیە تەرسێوە گەورۍ ئەقڵیەتی ڕاسڕەی و ئاژاوەگێڵنی ئارانە بۍ. ڕابەر ئاپۊ وەراوەروو ئا ئەقڵیەتەیۊ کۊشیایێوە دژواری ئایدۊلۊژییش گرێتەرە وەر. بێگومان ئاسان نەبۍ، کە ئینسان تاوۊ ئانەیە کەرۊ و ئا ئەقڵیەتە ڕاسڕەوەیە لاواز کەرۊ. چا بارودۊخەنە، بەئەنجامیاونای گەیاندنی ئانەیە فرە ناڕەحەت بۍ. چوون لاێوە هجووموو دلۍ بۍ، کە ئەقڵیەتی ڕاسڕەو کە سەمیر پەی وەڵێش بەرۍ، دۊخوو پارتەکەیش ژەعراوی کەرڎەبۍ. لاێوە تەریچۊ ڕاوشۊن و بنەماو شۊڕشگێڵنی پێسە ئارۊی دیارە و وەرەچەمە نەبۍ. وەلێم بە کۊشیایێوە ئایدۊلۊژیک و ڕێکوستەی بەرڎەوام و دژوار تاویۍ بەدەس بۍ. پەوکای گرڎوو پەرەسانای و وەڵێلوایەکا بە کۊشیای و هەوڵدای هەس و ئایدۊلۊژیک وەشۍ کریۍ. لاێوە تەریچۊ وەراوەروو ئاژاوەگێڵنیی سەمیری ناوەندوو پارتی نەتاواش چێوێوە کەرۊ و ئانەیچ باروو ڕابەر ئاپۊیش قورستەر کەرڎەبۍ. ڕابەر ئاپۊ شانەش دابۍ وەروو گرڎوو باروو کۊشیای. پەشتیوانیی ناوەندوو پارتی فرە سنوورڎار بۍ.

کۊشیای بە بەقووڵی لکیدریای بە ئازاڎیی کورڎسانیوە تاویۍ وەش بۊ

ئا کادرۍ ئامۍ  وەرکەوتوو دلێڕاسەی دروس، گیانبازۍ، وەرپەرسۍ بێنێو گەرەکشابۍ سەرمەشقۍ کۊشیای با. هەستوو گرڎوو هامڕایا هامڕایا پێسنەبۍ. جەڕاسینە جگە جە جمیەرەکەو ئێمە جمیەرەکای تەرێچ ساعیبوو هەمان هەستی بێنۍ بوون و گەرەکشا بۍ گوڕ بە کۊشیای بڎا. بەڵام ئەقڵیەتی ڕاسڕەو دژوارییەکێش هەلومەرجەکەی بەکار ئارۍ، گەرەکش بۍ مەژگوو ئینسانەکا ئاڵۊز کەرۊ، هەستوو کۊشیای لاواز کەرۊ و شۊڕشگێڵنا بەرەو گێڵای شۊنەو ژیوای کەسیرە ئاراستە کەرۊ.

بەدڵنیاییوە هەلومەرجەکە دژوار بۍ. کودەتاو ١٢ ئەیلوولی پێسە ڕۊڵێوە (عادیلێوە) لوا سەروو گلێرگەیرو. داوا جە گرڎ کەسی کریی کە ملکەچ بۊ، خویش بڎۊ دەسۊ. ورڎە مافە دیموکراتیکەکایچ مرڎێبێنۍ، بە پاو هیچ یاسێوە نەجووڵیێنێوە. ئانە وچکلەتەرین ناڕەزایەتییش بەروستۍ، هەر سەروو جادەکاوە ئەشکەنجە دریۍ یان بە گولـلە کوشیۍ. فرە شۊڕشگێڵنەکا گیریۍ دەسوو دوژمنی بێنۍ. جە زینڎاننە ئەشکەنجەی دژوار دریێنۍ. زینڎانشا کەرڎەبۍ بە ناوەندوو ئەشکەنجەی. دژوو کودەتای جبەرۊ هیچ ناڕەزایەتی و هەڵوێستێوە نەبۍ. بەپێچەوانەوە هێزە سەرڎەسەکۍ لایەنگیرۍ کودەتاچییەکا بێنۍ، بوون. ڕاسینە کودەتای سەروازی ١٢ ئەیلوولی بە پەشتیوانیی ئەمریکای و ناتۊی کریا. ئا یاگۍ فرەتەرین ستەم و ئەشکەنجەش چەنە کریا کورڎسان بۍ. دژوارتەرین ئەشکەنجەکۍ زینڎانوو سەروازیی ئامەدینە بێنۍ.  هەلومەرجێوە چانەنە ئاسان نەبۍ کە ئینسان بەرۊشا جبەر و هەستوو کۊشیای تیژ کەرۊوە و هانیشا بڎۊ.  چون هەلومەرجەکۍ دژوارۍ بێنۍ و دەرفەت و توانایچ فرە کەم. جە مەیدانوووەرکەوتوو دلێڕاسەیچنە تاکە توانا و دەرفەتوو ئێمە ئانە بۍ، کە کەمپەکاو ڕێکوزیا فەلەستینییە دۊسەکامانە مەنێنمێوە و وێما جە ڕووەو بیرڎۊزی و سەروازیوە پەروەرڎە کەرێنمۍ. ڕابەر ئاپۊ هەستەشە قەوەتانە ژیوناوە  تا دلێمانە بلۊ وەرۊ جە ڕووەو بیرڎۊزی و ڕێکوستەیۊ کۊشیۍ. لاێوە لە ڕاو بەقوەتکەرڎەی ئیرادەیۊ هەوڵۍ دۍ ملوو دژوارییەکارە زاڵ بۊ، لاێوە ت بە قووڵکەرڎەیۊ وەڵاتپارێزنی، هەست و مەنەیرە شۊڕشگێڵنی هەوڵۍ دۍ ئەقڵیەتی ڕاسڕەوی بێکاریگەر کەرۊ.

وەختۍ بەرۊ بێنمۍ، پەی گێڵایۊ و وەڵێوەبەرڎەی کۊشیای خەباتما کەرڎ و دلۍ وەڵاتیوە هەواڵۍ گولۍ ئێنۍ، ناخۊش دەهاتن. هەواڵۍ زینڎانوو ئامەدیوە ئێنۍ، دڵوو ئینسانی ئاویرش وەربێنە، زینڎانەکە فاڕیابۍ پەی ناوەندێوە ئەشکەنجەدای. ئەشکەنجەی دژوار دریۍ گەمە بە شکۊو ئینسانەکا کریۍ، هەوڵۍ دێنۍ ئینسانەکا ماڕا و پەشیمانسا کەراوە و داننیایپۊرەشا بەزۊر ملەرە سەپنا. زینڎانیۍ دژوو فشاری و ئەشکەنجەی پەناشا پەی فرەو جۊرا جە مدرامانی بەرڎە و دەسشا بە منگێرتەی جە وارڎەی کەرڎەبۍ، وەلۍ ئی ئەشکەنجە نەمرڎیابۊنەو ئا ئەشکەنجاوە فرەو کادر، لایەنگێر و وەڵاتپارێزناما مەرڎۍ. چالاکییەکەو مەزڵوم دۊغانی دژوو وێبەدەسەوەدای جە ٢١ ئادار ١٩٨٢ و هەواڵوو گەشمەرڎەبییەیش بی بایسوو ئانەیە گرڎ کەسێوەنە هەستێوە قووڵ دروس بۊ. دماتەر هەواڵوو چالاکیی چوار شۊڕشگێڵنەکەی وەڵا کریاوە.  ئا هامڕێما کە کەوتێبێنۍ دەسووو دوژمنی هیچ فرسەت و توانێوەشا نەبۍ. وەرانوەروو وێدەسۊدایۊ وێشا گێرت و بە  چالاکییەکاشا گەشمەرڎۍ بیۍ. ئینە دلێمانە ڕاش کەرڎۊ کە هەقەشا کەرمێوە. هەمان وەختەنە هەستوو قینۍ، تووڕەیی و هەقێش دژوو دوژمنی دلێمانە زیاتر و قوڵتەرە کەرڎە. چیوۍ وەش بۍ دلێمانە کە هەرچیی زووتەرا، چێوێوە کەرمۍ کە جوابدەرەوەو هاواروو هامڕایاما بۊ زینڎانەکانە.  ڕابەر ئاپۊ بۊنەو ئائەو هەواڵاوە کە زینڎانۊ یاوینۍ، وەروو ئانەیە یەکینەکاو گەریلای یاونۊوە وەڵات و کۊشیای دەس پەنە کەرۊوە، خەباتش قووڵتەر کەرڎبێوە.

زینڎانەکۍ زیاتەر و بە پلەو یوەمی پەشتیوانیی هەوڵەکاو ڕابەر ئاپۊیشا کەرڎ

چا وەختەنە کە ڕابەر ئاپۊ بۊنەو دۊخوو دژواروو زینڎانیوە هەوڵۍ دۍ زووتەرین وەختنە کۊشیای دەس پەنە کەرۊوەئانە کە فرەتەرین پەشتگیرییش چا هەوڵاو ڕابەر ئاپۊیە کەرڎۍ زینڎانییەکۍ بێنۍ. ئینەیچ خاستەرین نموونەی دیالێکتیکیی پەکەکەین. ورڎبییەیۊ هامڕایا دلێنە و ئا مدرامانە وەڵی وزیابۍ و هەوڵەکاو ڕابەر ئاپۊی جبەرۊ تەمامکارۍ یۊترینی بێنۍ. مدرامانوو ١٤ی تەمووزی پێسە وەڵێوە لوا، خەباتەکێشپەی وەڵی بەرڎۍ و  کۊشیایش قەوەت کەرڎ. مدرامانوو هامرایا زینڎاننە کە جە هەلومەرجی دژوار و ئەشکەنجەنە وێشا نەدابۍ دەسۊ، کۊنسێپتوو پاکتاوی، کە ڕژێموو ١٢ ئەیلوول تەماداروو وەڵیوەبەرڎەیش بۍ، بارش بەرڎ و ماڕاش ئا ڕژێمە فاشیستییە سەروازییە ئەشکەنجەگەرە شکسش ئارڎ. بۊنەو مدرامانوو ١٤ تەمووزیوە زینڎانییەکۍ دەوروو مدرامانینە کوۍ بیێبێنێوە. وێدەسۊدای، دداننیایپۊرەی، پەشیمانی و گرڎوو نۊعەکاو لاوازی و بێبڕیاری شەرمەزارۍ کریۍ. ئینە بی بایسوو ئانەیە کە ڕژێموو ١٢ ئەیلوولی جە دلێنە شکس بارۊ. جە ڕاو مدرامانوو ١٤ تەمووزیوە یاسا و بنەماکاو ڕژێموو ١٢ ئەیلوولی مەڕیۍ و سەرجەنۊ هەواو مدرامانی و وێڕێکوستەیۊ خولقیا و خەتەو مدرامانی زاڵە بییە. 

بەدڵنیاییوە مدرامانوو ١٤ تەمووزی جنەرۊ و دلێچۊ کاریگەریی گەورەس ساز کەرڎ. وەڵۍ گرڎ چێوێوەنە ئانە نیشانە دریا، کە دۊزوو گەلوو کورڎی دلێنە مەشۊ و دەسبەرڎارێش مەبا. ئینەیچە کاریگەریی گەورەش سەروو خەڵکیوە نیارە، دلۍ خەڵکینە ئا بڕوۍ وەشە بیە، کە بە سەرمەشقایەتیی کادرەکاو پەکەکەی کۊشیای بەگوڕ بۊ و میاوا سەرکەوتەی. پێسە پێلانەو ڕژێموو ١٢ ئەیلوولی پەی دماییئارڎەی بە هومێدوو گەلا و ئەرەگێریی تەماموو گلێرگەی شکسش ئارڎ. لاێوە تەریچۊ مدرامانوو ١٤ تەمووزی دلۍ گلێرگرینە  بی بە مایۍ پەرەسنای هۊشمەندی و پاگێرتەیرەی کۊشیای. خەڵک دیش کە جە هەلومەرجی هەرە دژواریشچنە کادرەکاو پەکەکەی وێشا نەدا دەسۊ و وێگێرییشا کەرڎ و پەی دۊزەکەیشا گیانشا بەخت کەرڎ، زاناشا کە ئادۍ دەس بە کۊشیای کەرا و وێشا وەراوەروو کۊشیایۊ بە وەرپرس مزانا. بێگومان دلۍ گلێرگەو کورڎانە گەشیایۊ ئا هەستا لوایوەڵیوە فرە  گەورەن. ئینە گرنگتەرین گەشەسانای مدرامانی گەورەو ١٤ تەمووزی بۍ.

مدرامانو ڕۊچۍ گۊرۍ مەرڎەی کاریگەری قووڵش سەرو گرڎو کادرەکا نیارە

مدرامانو ١٤و تەمووزی جە دلۍ و بەرۊ کاریگەری عالش جە کەشو پارتەکەیمانە سازکەڕد. ئینە بی بەمەڵامەتو ئانەی سەرو پێکئامای پارتەکەی ۋنەپەرسای و قەراردەری سەرو خەتەو ئەرەکۊشای ۋەڵۍ گنۊ. هەڵبەتە رەنجو مانیایی ڕابەر ئاپۆی فرەتەرین کاریگەریش نیارە. لاوازبیەی ئەقڵیەتی راسڕەو کە گەرەکش بۍ جە ژیۋگەو ئێمەنە بۍ قەراری، ئەرەنەکۊشای و لۋای شۊنەو ژیای کەسیرە ۋەڵۍ وزۊ؛ ڕابەر ئاپۆ بە ئاماڎەکەرڎەی کادر و کیاناو یەکینەکا گەریلای پۍ ۋڵاتی پاسەش کەرڎ کە حۊڵەکۍ دەسپنەکەرڎەو کۊشیای زیاتەر حېقمۍ با. حۊڵەکۍ سەمیری پۍ ئانەی بېنۍ کە پارتەکەی فاڕۊۋە پۍ ئەوروپای و ۋەڵۍ بە ۋەڵېکۊتەو کۊشیای گەریلای گېرۊ. ئینە ئەقڵیەتێۋە راسڕەو و مەسڵەحەت واز بۍ جە بنەڕەتەنە بە ماناو ۋېدای دەسۊی بۍ بە رژێمو ١٢و ئەیلولی. پارتەکە ئەگەر لۋابیۍ پۍ ئەوروپای بۍ بە پەناهەنڎە و دەسبەردارو کۊشیای بۍ. هەڵبەتە سەمیر بە شېۋېۋە ئاشکرا ئینەش نەکەرڎ. بە دزییەوە کەرېش و حۊڵ دۍ چواردەورەکەی لاواز و بێکاریگەر کەرۊ. ڕابەر ئاپۆ جە دژوو ئا ئەنەیاۋاینە ئەرەکۊشایۍ بەقوەتی بیردۆزی و رێکوستەیش گرتەنەۋەر. مدرامانو ١٤و تەمووزی پۍ بێکاریگەرکەرڎەی ئا ئەقڵیەتیە دەوری گرنگش گېڵنا. دماو ئانەی ئەنجامەکۍ مدرامانو ١٤و تەمووزی ڕۊشنۍ بیېۋە، سەمیر نەتاۋاش ۋېش شارۊۋە و بە ئاشکرا دژ بە پارتەکەیما مرڎاوە و جە ریزەکا ئاخېزی بڕیارە. مدرامانو ١٤و تەمووزی سەرو کۆو پارتەکەیما ئەنجامی پی جۆرەشە ۋەشکەرد.

جە لایۍ تەرۊ هامڕېما خەیری، کەمال، عاکیف و عەلی کە جە مدرامانو ١٤و تەمووزینە گەشمەرڎۍ بیۍ، جە لایەنو فرەو پېکئاماکا پارتیماوە فرە بە عالی ئشناسیېنۍ و ۋەشەویسۍ بېنۍ و جە ۋەڵۍ وستە و رێکوستەی جمیەری و گۊرەکەرڎەی کۊشیاینە رەنجی گۊرەشا کېشت. ۋەرو ئانەی ئا چېرو ئەشکەنجەی قورسینە مدرامانشا ۋەڵۍ وستەبۍ و تا سەر ۋېڕاگریشا کەرڎ و گەشمەرڎۍ بیۍ، ئینە کاریگەریش کەرڎ سەرو تەمامو کادرەکا پارتیما. قسېۋە محەمەد خەیری دورموشی جە داڎگانە جە وەختو دەسپنەکەرڎەو چالاکیەکەینە پاسەش کەرڎ کە گرڎ کەسۍ گنۊ دلۍ پەیجوری و ۋنەپەرسایۊ. ئی قسۍ و چالاکی ١٤و تەمووزی و خەتەو مدرامانو پەکەکەی لۋۍ دلۍ تاریخیۊ.

مدرامانو ١٤و تەمووزی بی بە بناغەو ئاخېزو مدرامانی

ڕابەر ئاپۆ هەڵمەتە و قەڵەمەبازی ١٥و تەباخیش دەسپنەکەرڎ و خەتەو ١٤و تەمووزیش فاڕاوە پۍ خاڵێۋە باڵاتەری. ئاخېزو کورڎسانی سەرو ئی خەتېۋە ۋەڵۍ کۊت، ئاخېزو ژیای و ژیۋایۊ پێکئاما و بی بە بناغە و خوڵقنەرو گرڎو ئا بەهایا کە ئارۊ بەدەس ئامېنۍ. ئاخېزو کورڎسانی بە فرەیی سەرو بنەماو مدرامانی سازکریا. مدرامانو ١٤و تەمووزی بی بە ئەساسو پێکئاماو ئا خەتۍ. چا بوارەنە ئەنەیاۋای جە خەتە و رۆحو ١٤و تەمووزی فرە گرنگا.

چالاکی ١٤و تەمووزی سەلەمناش کە جە دژوارتەرین هەلومەرجیچەنە بە مدرامان متاۋیۊ دوژمنی شکس پنەبارمۍ. ئانە بەربڕیەین جە جەوهەر و شێوازو پەکەکەی و ئاخېزو کورڎسانی. ئەگەر جە کورڎسانەنە ۋەڵېکۊتەی بێنە ئاراوە، شناسنامەو پەکەکەی بە ئەساس گیریۊ، بێ گومان ئانە تەنیا بە قوڵبیەیۊ، بە بەجەوهەریکەردەی و بە ئەساس گېرتەی ئا خەتۍ مسۆگەر بۊ.

پۍ ۋەڵۍ وستەو کۊشیای جە دژوو فاشیزمی ئاکەپە-مەهەپەی و دلېنەبەرڎەو فاشیزمی ئی سەردەمەیە، ئەنەیاۋای و بە ئەساس گېرتەی خەتەو ١٤و تەمووزی گرنگا. فاشیزمی ئاکەپە-مەهەپەی جە بنچینەو ۋېشەنە درێژبیەیۊ رژێمی فاشیستی ئەرەگیری ١٢و ئەیلولیا. پېسە رژێمو فاشیستی ١٢و ئەیلولی، دەسەڵاڎداری فاشیستی ئاکەپە-مەهەپەیچ کۊکوشی کورڎاش پۍ ۋېش بە ئامانجی سەرەکی گرتەن. سەرو ئا ئەساسیچە سیاسەتی کۊکوشکارانەو ۋېش قووڵ کەرۊۋە و هجومەکا زیاتەر کەرۊ. گۆشەگیری سەرو ڕابەر ئاپۆی قورستەر کەرۊ، حۊڵ مڎۊ جە ڕاو پاکتاوکەرڎەی جمیەرەکەیماوە ئا ۋەڵۍ کۊتەیەی کە بەدەسما ئارڎەن دلېشەنەبەرۊ و پرۆسەو کۊکوشی کورڎا تەمام کەرۊ و بیاۋنۊش بە ئاکام. پۍ ئانەی ئێمە پېسە کورڎی ئی رژێمە فاشیست و دژە ئینسانیە دلېنەبەرمۍ، مشۊم پېسە جمیەری و گەلی کۊشیایما جە دژوو دەسەڵاڎداری فاشیستی ئاکەپە- مەهەپەی گۊرەتەر کەرمۍ. بێگومان متاۋمۍ ئینەی بە قووڵکەرڎەیۊ خەتەو ١٤و تەمووزی دەسەبەر کەرمۍ و بیاۋنمېش بە سەرکۊتەی. پۊکاتی زیاڎ جە گرڎ وەختۍ مشۊم جە خەتەو ١٤و تەمووزی بیاۋمېنە، بە بە ئەساسش گېرمۍ. سەرو ئی ئەساسیە گرڎو هامڕایا پەنەوازەن خەتەو مدرامانو ١٤و تەمووزی قووڵتەر کەراوە و سەرو خەتەو ١٤و تەمووزی کۊشیای ۋەرفراوان کەرا.

هـ . ش / س . ز