هامسەرۆکو شارەوانی گۆرە شارو وانی عەبدوڵا زەیدان ناڕەزایی وێش وەرا وەرو قەرارو دادگاو باڵای پەی هۆرشێونایۆ قەرارو لابەردەو قەڎەغەی سەرو مافەکا نیشانەدا و واتش:" گەرەکشانە دەس سەرو شارەوانییەکارە گێرا، گەل ئینەیە قەبوڵ مەکەرۆ."
هامسەرۆکو شارەوانی گۆرە شارو وانی عەبدوڵا زەیدان کە قەرارو گێڵنایۆ مافەکاش جەلایەنو دادگاو باڵایۆ هورشنریاوە، سەبارەت پا بابەتەیە پەی ئاژانسیما قسێش کەردۍ.
'ئانەی جابەجا مکریۆ پڕۆسێوە سیاسییا'
زەیدان باسش چانەیە کەرد، ئا قەرارەی دریان نایاسایین، سەرو بنەماو نزیکایەتی و سیاسیین و واتش: "دادگای دەستوری بنەماو پەیڕەوەکا وێش پاشێل کەردەن. ئینە دژو یاساین، پڕۆسێوە سیاسییا."
زەیدان جە قسەکاشەنە جەختش چانەیە کەردۆ گێرتەی وەرو ئی قەرارەی جە وەرا وەرش پاشێلکەردەو دادگاو مافەکا مرۆڤو ئەوروپای (DMME)ین و پی جۆرە بەردەوام بی: " DMME قەرارش دا دادوەرێ بە زانۍ بیێنێ، جە دژو من قەرار بڎا و سزا بڎریەو. چی دۆسیەنە ئەشیێ بێتاوانی منش بەرکەردەبیۍ و گردو ئینشا گێرتەینە وەری سیاسییا." زەیدان ئاماژەیچش پانەیەدا وەڵێنە گەرەکشا بێ دەس سەرو ئیرادەو گەلەکەیمارە گێرا بەڵام بە مڏرامانو گەلی گردو ئا هەوڵاشە پوچۍ کەردۍ و دەسەو باڵاو هورچنیەکا پەشتیوانی مافو دەنگدای گەلو وانیش کەرد.
زەیدان ئەرەیاوناش پی ئاوەزیەتەو ئیسەیۆ گەرەکشانە جارێوە تەر دەس سەرو شارەوانی گەلیمارە گێرا، بەڵام گەل چنین وەڵێنە هەڵوێسو وێش نیشانەدا جە ئیسەیچەنە بە خاوەنداریکەردەی جەدیموکراسی، یاسا و دادپەروەریی حورمەتو وێش پارێزنۆ و واتش: "پێکئاوردەکاو ڕژێمو قەیومی جە ئیسفاڎەو کەسینە نیا و کێشەکا قوڵتەرۍ مکەرۆوە. مشۆم ڕێوە دیالۆگی و ئەرەنیشتەی گیریۆنەوەر. دەمودەس شارەوانییە دەسسەرەگیریاکا گێڵاوە پەی گەلی."
