جە بڕۆکسل، بارەگاو کەنەکەینە، لایەنە سیاسی و مەڎەنییەکۍ حەر چوار پارچەو کورڎسانی سەبارەڎ بە ڕۆژەڤو ئارۊ و کورڎسانی و مەنتیقەکەی و جەهانی و کۊنفڕانسو لۆزانی و یۊبیەی نەتەوەیی، کۊبیېوە.
سەعاڎ ١١:٠٠و ئارۊی شەممە، بڕۆکسلو پایتەختو بەلجیکاینە، جە بارەگاو کۊنگرەی نەتەوەیی کورڎسانی- کەنەکەی ژمارېوە فرە جە نوێنەرا پارت و لایەنە سیاسی و مەڎەنیەکا حەر چوار پارچەو کورڎسانی کە نامۍ کۊمیتەی هامبەشی دیپلۆماسی (کەنەکە)ی و کۊمیتەو هەرمان و کارو چالاکی سەڎ ساڵەی پەیمانو لۆزان-ینە یاگۍ گېرا، کۆبیېۋە.
گلېرۊبیەکەی بە دەیەقېوە ڕێزگرتەی جە گیان بەخشایا ڕاو ئازاڎیی کورڎسانی دەسش پنەکەرڎ، ڕۆژەڤو ئارۊ و کورڎسانی و مەنتیقەکەی و جەهانی و یۊبیەی نەتەوەیی، کۊنفڕانسو لۆزانی کە قەرارا جە ٢٢ و ٢٣ۍ مانگەو ٧و ئېساڵی جە شارو لۆزانو سویسرای بە بەشڎاری فرېوە جە پارت و لایەنە کورڎسانییەکا و دەیان هەزار کەسا بلۊڕاوە، قسۍ وباسۍ و گفتوگۆی چڕ کریا.
جە گلېرۊبیەکەینە ، سەرەڕاو ئانەی یۊ بە یۊ باس جە پەرسەکا پانیشتوو کورڎسانی- ئێراق، وەرکەوتوو کورڎسانی-ئێران، سەرنیشتوو کورڎسانی- تورکیا و وەرنیشتوو کوردستانی- سوریای و کورڎا جبەرو ۋڵاتی کریا، قۊرتەکۍ و چارەکەرڎەیشا، ئاڵەنگارییەکۍ(دەسەو یەخەیی) وەردەمو دۆزو کورڎی و چەنی وەرنگاربیەیشاوە هەڵۋیسەشا سەر کریا و نوێنەرۍ پارت و لایەنە بەشڎارەکا دید و پەیلوای ۋېشا چا بارۊ وست ڕووە و دەسنیشانو کەموکوڵیەکا و خاڵە لاوازەکاشا کەرڎ و گرڎ جەختشا کەرڎۊ؛ چارەکەرڎەو گرڎو پەرس و قۊرتەکا و ئاڵنگارییەکا و پەیمانە شومەکۍ لۆزانی، تەنیا و تەنیا یۊبیەی نەتەوەیین.
هاموەخت سەرەڕاو هورسەنگنای هەرمان و خەباتو (چالاکییەکا کۆنفڕانسو سەڎ ساڵەو لۆزان)ی، جارێوەتەر گرڎو لایەنە کورڎسانییەکا و کورڎسانیا جە بەرو دلۍ ۋڵاتی، خوڵقەو کۆنفڕانسو لۆزانی کریۍ کە قەرارا جە ٢٢ و ٢٣ۍ مانگەو ٧و ئېساڵی شارو لۆزانو سویسراینە بە بەشڎاری فرەو پارت و لایەنە کورڎسانییەکا و دەیان هەزار کەسا ڕاوەبەرکریۊ.
بەشڎاربیەکۍ دەسنیشانشا کەرڎ: بەشڎاری گرڎ لایۍ چا بۊنەنە گرنگا و چارەنۋیسسازا، چوونکی سەڎ ساڵۍ سەرو پەیمانەکەیرە ۋیەرۊ کە بی بە مەڵامەتو پارچە کەرڎەو گەلی و نیشتمانەکەیما بەبۍ ویست و ئێراڎەو ۋېش. مشۊ گەلەکەما چا بۊنەنە یەک دەنگ و یەک ڕەنگ ناڕەزایی ۋېش دژ بە ڕێکوزا و قەراردەرا ئا پەیمانە شوومۍ بەربڕا و صەڎاو ۋېش بیاۋنۊ بە ڕاو گرڎی ئەورووپی و جەهانی.
هـ. ش
