بەمەڵامەتوو تەقەی ڕاسەوخۆو ھێزەکا ئێرانیوە چن کۆڵبەرێوە بیۍ بەقوربانی
بەمەڵامەتوو تەقەی ڕاسەوخۆو ھێزەکا ئێرانیوە جە کۆڵبەرا، جە مەنتیقە سنوورییەکا بانەی و نەوسووڎۍ جە ۋەرکەوتوو کوردسانی، چن کۆڵبەرێوە بە سەختی زامڎارۍ بیۍ.
بە پاو ماڵپەڕوو کۆڵبەر نیوزی، ڕۊو ٢٣ۍ تشرینی یۋەمی، جە مەنتیقەو سنووری 'ھەنگەژاڵ'ەو بانەی جە ئاکاموو تەقەی ڕاسەوخۆو ھێزەکا سەر بە دەوڵەتوو ئێرانی، کۆڵبەرێوە عمر ٢٥ ساڵ بە نامۍ "زانکۆ گەوھەری" بە سەختی زامڎار بیەن.
زانکۆ کە خێزاندارا و تاتەو دووۍ زارۊڵان، بە زامڎاری فاڕیانۊ پۍ خەسەخانەو سەلاحەدینی ئەیوبی شاروو بانەی و باس چانەی کریۊ کە ئاژەو تەندرستیش خاس نیا.
جە لایۍ تەرۊ، ھەر بە پاو زانیارییەکا ماڵپەڕەکەی، ڕۊو ٢٢ۍ تشرینی یۋەمی، دووۍ کۆڵبەرۍ گەنجۍ خەڵکوو مەحاڵ و سەلاسی باوەجانی سەر بە پارێزگاو کرماشانی، بە نامەکا "ئارامان بەرزگەر" و "ماھان بەرزگەر"ی (عمر ١٨ ساڵ)، جە لایەنوو هێزەکا ئێرانی جە مەحاڵ و سنووری نەوسوڎۍ کریېنۍ ئامانج و بە سەختی قاچشا زامڎاربیەن و پۍ خەسەخانەی فاڕیېنېوە.
ماڵپەڕەکە ئانەیچش وستەن ڕووە، جە هەمان وەختەنە چا محاڵە سنووریېنە، یەرۍ کۆڵبەرۍ تەرۍ کە خەڵکوو شاروو جوانڕۆینۍ جە لایەنوو ھێزەکا سەر بە دەوڵەتوو ئێرانی تەقەشا ۋنەکریان و جە ئاکامەنە زامڎارۍ بیېنۍ.
یاگۍ باسکەرڎەین هېزی تۆڕەو مافەکا مرۆڤوو کوردسانی ئامارەو پاشێلکارییەکا مافەکا مرۆڤیش جە ۋەرکەوتوو کوردسانی جە ماوەو مانگەو رەزبەری (٢١و ئەیلولی تا ٢١و تشرینی یۋەمی) وەڵاکەرڎۊ. بەپاو ئا ئامارۍ جە مانگەو رەزبەرینە، ٢ کۆڵبەرۍ جە بانە و مەریوان جە پارێزگاو سنەی بە تەقەی راسەوخۆو هێزەکا دەوڵەتوو ئێرانی کوشیېنۍ و لاوکەمیۊ ١٤ کۆڵبەرېچ بەتەقەو ئا هێزا زامڎارۍ بیېنۍ.
