بناروو قەندیلی ئاماڎەن پەی ئاهەنگوو نەورۊزی
ساڵانە بناروو قەندیلینە ئاهەنگوو نەورۊزی ملۊ ڕاوە، چا بارەوە ئەندامێوە کۊمیتەو ئاماڎەکارییچ ئەرەیاوناش، ئاماڎەکارییەکۍ تەمامیێنۍ و وارڎە و یاگۍ سەیایۊ ئاماڎە کریێنۍ و ئاسایشوو خەڵکیچ پارێزیان.
٢٠وو ئی مانگۍ کورڎستانییۍ یاوا کەشە سەرکەشەکاو قەندیلی و وەروو ئانەی ڕۊو نەورۊزی، کە کەرۊ ٢١وو ئی مانگۍ بەشڎارۍ با جە نەورۊزوو قەندیلینە.
چی بارەوە "ئازاڎ عومەر" ئشناسیا بە "هەڤاڵ حاجی" ئەنداموو کۊمیتەو ئاماڎەکاری پەی "ڕۊژ نیوز"ی واتش: نەورۊز مەبارەک کەرمۍ جە گەلەکەیما و نەورۊزوو ئێساڵی هاموەڵاتیۍ ڕووۍ وەڵتەر ملا قەندیل و چا مەناوە و پەی ئانەیچە پێویستییەکاو وارڎەی و منەیۊشەوۍ ئاماڎۍ کریێنۍ.
حاجی ئازاڎ ئاماژەش پانەیچە کەرد: ئاهەنگوو نەورۊزی ٢١وو مانگۍ سەعات ١١وو وەڵی نیمەڕۊی دەس پەنە کەرۊ و گرڎوو شار و شارۊچکەکانە پاس پەی بەشڎاربییا ئاماڎە کریان، تا خەڵك بەئاسانی بیاوا قەندیل و بەشڎاریی ئاهەنگوو نەورۊزی کەرا.
باسوو ئانەیچش کەرد: شاروو سلێمانینە سەعات ٦وو بەیانی پاسەکۍ وەرڎەموو هۊڵوو "تەوار"ینە ئاماڎۍ با، نزیکوو پاسەکاو بازیانینە، گرڎ ئاسانکاریێوەما کەرڎەن، یاگۍ ئاهەنگەکەیچنە گرڎ ڕاوشۊنۍ پارێزنای هاموەڵاتییا و ئاهەنگگێڵنا گیریانرە وەر.
س.ز
