دەم پارتی و دەبەپە سەبارەت بە دیدارەکەو ئیمرالی چنی ڕابەر ئاپۆی بەیاننامێوەشا وەڵا کەردۆ. جە بەیاننامەکەنە ئامان؛ "ڕوانگەو چارەسەری کە ئێژا عەبدوڵا ئۆجالان پێشکەشش کەردەن، تاریخیا، کات کاتو ئانەین ئازایی و دووروینی پەی ئاشتیێوە شکۆمەندی نیشانە بڎەیمێ.
سەبارەت بە دیدارەکەو شاندو دەم پارتی چنی ڕابەر عەبدوڵا ئۆجالانی، سەرەمڕە یۆ شۊنەو یۆیرە جە مییانە سیاسییەکاوە قاۍ مکریا.
دەسەو ڕاوەبەری مییانو پارتو هەرێمە دیموکراتیکەکا (دەبەپە)ی تایبەت پا پرسیە بەیاننامێوەش وەڵاکەردۆ.
دەبەپە سەرنجش وست سەرو قسەکا ئارۆیش سەبارەت بە دیداری چنی ڕابەر عەبدوڵا ئۆجالانی و ئەرەیاوناش: "جە ڕووەو چارەسەری پرسو کوردیۆ ئینایمۍ قۆناغێوە تاریخینە. ڕوانگەو چارەسەری ئێژا عەبدوڵا ئۆجالانی چی قۆناغەنە تاریخیا، پێسە وێش واتش پەنەوازیش بە فاڕیای دیموکراتیکی هەن.
گرنگی دای بە ئیرادەو ئێژا عەبدوڵا ئۆجالانی جە چارەسەری پرسەکەینە، هەنگامەکا بەهێزتەر مکەرۆ
دەبەپە جەختش چانەیە کەردۆ کە فاڕیێوە دیموکراتیک بە چارەسەریێ دیموکراتیکی و ئاشتیانە جە پرسو کوردینە مومکینا و ئەرەیاوناش: "چارەسەری ئی پرسەیە نەتەنیا جەڕاو سیاسی، بەڵکوم بە بەشداری و هامکاری گردو دینامیکە کۆمەڵایەتیەکاوە کریۆ و بۆنە. چی چوارچێوەنە گرنگی بە ئیرادەو ئێژا عەبدوڵا ئۆجالانی جە چارەسەری پرسەکەینە، هەنگامەکا بەهێزتەر کەرۆنە و هەرپاسە پەنەوازا هەر جۆرە هەنگامێ چا بارۆ بنریۆ. ئی سەدە؛ تواناو جابەجێکەردەو ئازادی و دیموکراسی پەی گەلو تورکی و، کوردی و وەرکەوتوو دلێڕاسەی هەن. پەی ئایندێوە دیموکراتیکی و ئازادی، گرڏ لێوە پەنەوازیشا بە ئیسفاڎە هورگێرتەی چا دەرفەتا و ئیرادەو چارەسەرکەردەیشا بە بەهێزتەرین شێوە هەن. ئینە ئەرکو سەرەکی ئێمەن."
هامسەرۆکاو دەم پارتی، تولای حاتیمۆغولاریە و تونجر باکرهان، پەیامێشا جە دیجیتال میدیاو وێشانە سەبارەت بە قسەکاو دیدارەکەی وەڵا کەردۆ.
تولای حاتیمۆغولاریە ئاماژەش پانەیەدا کە پەیامەکێ ئێژا عەبدوڵا ئۆجالانی جە ئیمرالینە بانگەوازێوە تاریخیێنێ کە متاوۆنە چارەنوویسو تورکیای و مەنتیقەکەی فاڕۆنە و واتش: "بەهێزکەردەو هامپەیمانی تورکی و کوردی دەسپنەکەردەو پرۆسەو دیموکراتیکی و ئاشتیانەی ئیسە وەرپرسیاریا و نمەکریۆ دماگنۆنە. چی پرۆسە پەڕ گرژیەنە پەنەوازا گرڏو مېیانە سیاسییەکا بە شێوێوە بنیاتنەر نزیکێ باوە و هەنگامێ ئازایانۍ پەی چارەسەری بنیا. پەڕلەمانو تورکیای گرنگتەرین مېیانو ئی پرۆسەینە. ڕێکێ بەرەو ئاشتی و دیموکراسی و واڵە و برایەتی بەرۆ؛ پەنەوازا پا هەنگاما کە پێوەرە بە بوێرییۆ گێرمێشانە وەر. چی چوارچێوەنە دەم پارتی حەرچی جە تواناشەنە بۆ بە ئەنجامیش میاونۆ با کەس گومانەش چانەیە نەبۆ کە ئێمە چارەسەری سەرکەوتووانە پەرە پنەمڎەیمێ. ئێمە ئینایمێ قۆناغ و دەرفەتێوە تاریخیینە و پێوەرە متاومێ ئایندەما ڕۆشن کەرمێ."
تونجەر باکرهان هەرپاسە جە هەژمارو تایبەتی وێشەنە واتەنش: "پێشنیارەکێ ئێژا ئۆجالانی جە ئیمرالینە جە چوارچێوەو ئاشتی و چارەسەرینە، وەرپرسیارەتیێ تاریخیا جە کێشتەو پەیوەندییەکا تورکیای و کوردی سەرو زەمینێوە دیموکراتیکی و ئاشتیێ شکۆمەندانەی جە تورکیانە. ئی بانگەوازە تەنیا پێشنیار پەی چارەسەری نییا، بەڵکوم دەرفەتێوە تاریخیا پەی بنیادنیای ئایندێوە هامبەشی. چی پرۆسەنە وەرپرسیارەتیێ گۆرە گنۆ سەرو شانا گردو مییانە سیاسیەکا و بەتایبەت پەڕلەمان و تورکیای. پێشئامایەکێ غەززەی و سوریای ئانەی بەروزا کە پەنەوازیش بە چارەسەری ئەساسی هەن. با پێوەرە جوابو بانگەوازو ئاشتی، دیموکراسی و واڵە و برایەتی بڎەیمێ. تورکیا و مەنتیقەکەیچ ئینێ وەردەمو دەرفەتێوە فاڕیای دیموکراسینە، پۆکەی کات کاتو ئانەین ئازایی و دوور وینی پەی ئاشتیێوە شکۆمەندی نیشانە بڎەیمێ.."
