سەبارەڎ بە ڕووە دایەکا گێرتەی نایاسایی جە کەیسوو گیریایا بادینانی و ئا ئەشکەنجە و ئێش و ستەمەی جە تەرەفوو دەسەڵاتوو پەدەکەیۆ ۋەرا ۋەرشا کریان، حەریۆ جە چالاکا کارگەر عەباس و بەندەوار ئەیوب، جە چەمپنەکۆتەیۍ تایبەتەنە باسوو ڕووداوەیەکاشا پۍ ئاژانسوو هەواڵوو فورات (ANF)ی کەردۍ.

بەبۍ حیچ بەهانێوە پەدەکە ئێمەش بڕفانا

سەبارەڎ بە گێرتەیش چنی هامڕا چالاک و رۆنامەوانەکاش، کارگەر عەباس پۍ ئاژانسوو هەواڵوو فورات (ANF)ی واتش: "جە ماوەی ۋیەردەنە من چنی جەمۍ جە کەسایەتیا کە پێکئامێبێنۍ جە رۆنامەوانا، چالاکا، مامۆسایا و کەسا تەری ڕێزداری ئەڕفانیایمۍ و گیریایمۍ بەبۍ بیەو حیچ بەهانێوە، ماوەو سالێوە زینڎانی کریایمۍ و  تا ئارۊیچ بەشێوە جە هامڕایاما جە زینڎانەنە مەنێنۍ، جە ماوەو گێرتەیمانە بەحیچ کلوەجۍ سەروو بنەمای یاسایی چنیما هەڵسوکۊتشا نەکەرد".

گرڎ هەڵسوکۊتەکۍ پەدەکەی دژوو مافوو مرۆڤی بێنۍ

کارگەر عەباس، سەبارەڎ بە پاشێلکەردەی مافەکاش جە ڕاو ئەشکەنجەی جەسڎەیی و دەروونیۆ، ئاشکراش کەرد: "دلۍ زینڎانەکا پەدەکەینە تووشوو جۆرەها ئەشکەنجەی دەروونی و جەسڎەیی و دای ۋنەی بیەیمۍ بە جۆرێوە کە چا زینڎانەنە کە ئێمەش چنە زینڎانیۍ کریێبێنمۍ حیچ بنەمایۍ مافوو مرۆڤیش چنە نەبۍ، گرڎوو هەڵسوکۊتەکا پەدەکەی دژوو بنەماکاو مافوو مرۆڤی بێنۍ،  تەنانەڎ ڕا نەڎریۍ چنی بنەیانەکاما قسۍ کەرمۍ کە ئانە ساڎەتەرین مافا، پۍ تەنیا ڕووێچ پێسە زینڎانیۍ ئاسایی مامەڵەما چنی نەکریان بەڵکم بەردەوام پاشێلکاری دژما کریان".

وتەی و نانواردەیچ پێسە ئەشکەنجەی جە دژما بەکار ئۍ

جە درێژەو قسەکاشەنە سەبارەڎ بە ئەشکەنجەدایەکاو پەدەکەی دژ بە چالاکا و رۆنامەنوویسا ، کارگەر عەباس واتش: "پێسە ڕێوەتەرۍ پۍ ئەشکەنجەدایما زینڎانەکێما ئنڎە گولانۍ بێنۍ تەنانەڎ ڕاو وتەیما نەبۍ ئینەیچ پێسە ئەشکەنجۍ دەروونی پاسە کەرێنۍ کە مەجبورۍ کریێنمۍ سەروو لای و جە یاگێوە فرە تەنگەنە بوسمۍ حەرپاسە ڕاو واردەی و واردەیۊیچما نەبۍ".

پەدەکە تەرسیش هەنە زووڵم  و ستەمە فرەکێش ئاشکرۍ با

حەرپاسە کارگەر عەباس باسش جە تەرسەو پەدەکەی کەردە جە ئاشکرابیەی تاوانۍ و ستەمەکاش دژبە ئازاڎیوازا و واتش: "ماوەو چن مانگێنە جارێوە تاوێنمۍ چنی بنەیانەکاما قسۍ کەرمۍ، قسەکەردەکەیچما چێروو چەمڎاریێوە تنینە بۍ، چونکی پەدەکە تەرسیش بۍ کە ئا زوڵم و ستەمە فرەی جە زینڎانەنە ۋەرا ۋەرما کەرێش ئێمە بە بنەیانەکاما واچمێش."

ۋێڕاگیری هامڕا زینڎانی کریاکاما هێز بە ئێمە بەخشۆ

کارگەر عەباس پەیامێوەش پۍ هامڕا و هامپیشە زینڎانی کریایەکاش کیاستوو ئەرەیاۋناش: "داخەم مەشۆ دماو ۋیەرناو چن سالێویچ هەڵای هامڕۍ و هامپیشەکێما کە بە بێتاوانی جە زینڎانەنە مەنێنۍ دوور جە گرڎ یاسێوە، بە هامڕایام جە زینڎانەنە ماچوو"ۋێڕاگیریتا هێز بە ئێمە بەخشۆ" و سڵامم پۍ ڕەنج و خەباتوو ئا زینڎانی کریایا هەن، هەڵوێسوو ئی چالاکا و زینڎانی کریایا پاسەش کەرد کە دەنگوو ناڕەژایی بیەی جە مەنتیقەکا پەدەکەینە بەرگنۆ و ئیتر خەڵک بێ دەنگ نەبۆ جە ۋەرا ۋەروو ئا ستەمەینە کە ۋنەشا کریۆ جە تەرەفوو دەسەڵاتوو پەدەکەیۆ".

پێویسا خەڵک بەسەربەسی داواو ماف و ئازاڎیی ۋێشا کەرا

دەربار بە ئەرەگیرکەردەو مەنتیقەو بادینانی جە تەرەفوو پەدەکەیۆ، ئا چالاکە ئاماژەش پانەی کەرد: "حکومەتوو هەرێمی و پەدەکە بادینانی بە مولکوو ۋێش مزانۆ، قبوول مەکەرۆ حیچ کەسۍ داواو مافوو ۋێش کەرۆ، جە مەنتیقەکا پەدەکەینە کەس مەتاوۆ باسوو مافوو ۋێش کەرۆ گرڎوو دنیێنە ئینسان داواو مافوو ۋێش کەرۆ وەختۍ کە نەبۆش، بەڵام بادینانەنە مەتاوا و ڕووبەڕوو تەرسۍ باوە جە تەرەفوو پەدەکەیۆ ئەگەر داواو مافوو ۋێشا کەرا، هیواڎارەنا گرڎوو ڕێکوزیا و چالاکا داواو مافوو ڕەواو ئی خەڵکیە کەرا لچێگە بە دماوە ئی خەڵکە پێویسا بەسەربەستی داواو ماف و ئازاڎیی ۋێشا کەرا".

چالاکا بادینانی دوور جە یاسۍ بڕفانیۍ نەک گیریۍ

بەندەوار ئەیوب یۊتەر چا چالاکا بۍ کە جە تەرەفوو دەسەڵاتوو پەدەکەیۆ گیریا سەروو داواکەردەی مافوو خەڵکوو مەنتیقەی، نامبریا سەبارەت بە ئەڕفانایش جە تەرەفوو پەدەکەیۆ واتش: "جە ساڵەو ٢٠٢٠ چنی جەمۍ جە هامڕایا کە پێکئامۍ بێنۍ جە مامۆسایا، ڕۆشنۋیرا، رۆنامەوانا و چالاکا بڕفانایمێشا، ئا شەوەی کە گیریایمۍ ڕۊی دماتەر ئێمەشا بەردیمۍ پۍ ئاسایشوو گرڎیی هەولێری، گێرتەیما بەبێ حیچ ئاگاڎارکەردەیۊیۍ بۍ، حەرپاسە گێرتەکەیما بەشێوێوە دوور جە یاسای بۍ حیچ داوێوە دادوەری نەبۍ پۍ گێرتەیما پۊکەی تەنیا متاومۍ ئا هەرمانۍ بڕفانای بۍ نەک گێرتەی".

سەروو داواکەردەی مافە سەرەتاییەکاما گیریایمۍ

سەبارەت بە مەڵامەتوو گێرتەیشا، بەندەوار ئەیوب، ئەرەیاۋناش: "جە ۋێنیشاندای و هەڵوێسەکامانە داواو چێوی فرەیما نەکەرد و هیوایۍ گۊرەما نەبۍ بەڵکم مەڵامەتوو بڕفانایما جە تەرەفوو پەدەکەیۆ تەنیا بە مەڵامەتوو ئانەیۆ بۍ کە داواو مافوو ۋێما کەرێنمۍ پێسە هامووڵاتیا دلێچشانە داواو مەعاش و مامۆسایا و پێشمەرگا کەرێنمۍ و داواما کەردە بنەیانەو گەشمەرڎا پارێزنا".

دهۆکەنە سەروو دژایەتی کەردەی ئەرەگیرا ئینسان گیریۆ

سەبارەڎ بە ۋەرتەسک بیەیۆ ئازاڎیی ڕابەربڕیەی و پرسە نشتیمانییەکا جە پارێزگاو دهۆکی بەگرڎیی و ئیدارەو بادینانی بە تایبەتی، ئا چالاکە ئاشکراش کەرد: "ئازاڎییەکۍ جە پارێزگاو دهۆکینە سنوردارکریێنۍ، ئەگەر چالاکا داواو مافوو ۋێشا کەرا یان سەروو پرسە نشتیمانییەکا بەیا دەنگ و ئیڎانەو تۆپوارانەکا تورکیای و کاولکەردەی دەگایەکا و گەشمەرڎە کەردەو خەڵکی مەدەنی جە تەرەفوو تورکیایۆ کەرا، ئانە دەسەڵاتوو پەدەکەی ئا کەسا بە تۆمەتەو تێکدای ئاسایشی نشتیمانی گێرۆ، پارێزگاروو دهۆکی حیچ بەرنامێوە چالاکا و رۆنامەنوویسا قبووڵ مەکەرۆ ئەگەر جە ۋەرا ۋەروو هجوومەکا تورکیای و ئێرانینە دەنگوو ۋێشا بەرزکەراوە".

ویر و فکرما زینڎانی مەکریۆ

جە دمادمایی قسەکاشەنە، بەندەوار ئەیوب جە ڕاو ئاژانسوو هەواڵوو فوراتی (ANF)یۆ بە دەسەڵاتوو پەدەکەیش ئەرەیاۋنا کە مەتاوا ویر و فکروو خیاڵشا زینڎانی کەرا و واتش: "جە زینڎانەنە نەتاوێنمۍ بوسمۍ، پۍ ئانەی ئەشکەنجەی دەروونیما بڎا یاگێوە گونجیۍ نەبۍ پۍ وتەی، ستەمێوە فرەما ۋەرا ۋەر کەرێنۍ بەڵام ئێمە هەر ۋێما نەڎا دەسۆو تەسلیمۍ نەبیەیمۍ، داواکارهەنا گرڎوو ئا هامڕایا تەریما کە مەنێنۍ زینڎانەنە ئازاڎۍ بکریا، حەرچنڎە دلۍ چوار دیوارانە ئێمە زینڎانی کریێبێنمۍ بەڵام ویر و فکروو خیاڵما زینڎانی مەکریۆ، دەسەڵات متاوۆ عەزیەتوو جەسڎەیما کەرۆ، بەڵام مەتاوا عەزیەتوو ویری و فکروو خیاڵیما بڎا چونکی فکرما ئازاڎا، داواکاری ئێمەی چالاکا بادینانی ئانەن کە دەموو دەس تەماموو هامڕایا ئازاڎیوازیما جە زینڎانەکا پەدەکەین ئازاڎۍ کریا".