چلێ هونەرمەندی گەورەو هەورامانی جەمیل نەوسوودی لوا ڕاوە
شاروو هەڵەبجەو پانیشتو کوردسانینە بە ئامادەبییەی جەمێوە فرەی جە کەسایەتی، ڕۆشنوایرا، هونەرمەندا، هونەردۆسا و ڕێکوزیایە مەدەنییەکا چلێ هونەرمەندی گەورەی جەمیل نەوسوودی لوا ڕاوە
بە ناموونیشانوو جەمیل نەوسوودی دەنگێوە ئاهوورایی جە هەورامانۆ، مەڵبەندوو ڕۆشنویریی هەورامانی بە هامبەشی یانەو سیاچەمانەی، ڕێکوزیاو ژیوای، لەقو هەڵەبجەو سەندیکاو هونەرمەنداو کوردسانی و پەلیانەو هەورامان نیوزی، شاروو هەڵەبجەینە و هۆڵوو پڕۆفیسۆر مستەفا زەڵمینە، چلێشا گێرتە پەی گەورە هونەرمەندو هەورامانی جە میلی نەوسوودی.
میانەو مەراسیموو چلەکێنە و سەرەتا بە چن ئایەتێوە جە قورئانی مبارەکی دەس پەنە کریا لاو مامۆسا عەبدولمەلیکیوە، دماتەر نویسەر ئەیۆب ڕۆسەم وتەو ئامادەکاریی مەراسیمەکەیش وەناوە، سەعدیی ئەحمەدی کوڕەگەورەو کۆچکەردەی بە ئەوەلاونایێوە کۆچکەردەش لاوناوە و بە گیسناینەی چل مۆما پەی ڕۆحی پاکوو هونەرمەندی مەراسیمەکە بەردەوام بی و هونەرمەندی گەورە عوسمان هەورامی بەشێوە مەراسیمەکەینە بڕێ ویرەوەریێ وێش چەنی هونەرمەندی کۆچکەردەی گێڵنیوە. ئینجا کەسایەتیی عەزەو حاجی عەولەی پێسە هامڕاو هونەرمەنڎی قسێش کەردێ، هەر میانەو مەراسیمەکەینە جەلیلی عەباسی ئەوەکۆڵەر ئەوەکۆڵیاێش بارەو هونەرو نەوسوودییوە پێشکەش کەرد، جە دوێ شێعرا و فاتح بەختەوەری و شەوکەت لهۆنی باسوو هونەرمەندی کۆچکەردەی کریا و بە نمایشکەردەی کوڵەفیلمێوە و وتاروو بنەیانەو کۆچکەردەی لاو زانیاری ئەحمەدیی کوڕو کۆچکەردەیۆ دمایی بە مەراسیمەکەی ئاما.
یاگێ واتەینە، هونەرمەندی نامیەو هەورامانی ڕۆو دووەشەممەی ٤-ئازاروو ٢٠٢٤ وەرکەوتوو کوردسانینە و ماواو وێشنە دماو ٧٨ ساڵا خزمەتی هونەری عەمرەو خوایش کەردە.
