هامسەرۆکاو گرڎی دەم پارتی تونجەر باقرخان و تولای حاتەم ئۆغۆللاریە سەرنجشا وست سەرو ئاژەو سوریای، ناڕەزیشا ۋەرا ۋەر بە ئەرەگیری بەربڕی و واتشا:"داوا مکەرمۍ چنی ئیدارەو سەرنیشتی و ۋەرکۊتوو سوریای گفتوگۆ بکەردۍ".
هامسەرۆکاو گرڎی دەم پارتی تونجەر باقرخان و تولای حاتەم ئۆغۆللاریە جە پەرلەمانەنە قسێشا کەردۍ. هامسەرۆکو گرڎی دەم پارتی تونجەر باقرخان ئەرەیاۋناش سوریا دەرفەتو ئانەیش هەن بلۆ دلۍ قۆناغێوە تازەیۆ، کاتو ئانەینە سیستەمێوە دیموکراتیک بنیاڎ بنریۆ.
باقرخان داواش کەرڎە جەنگ مردۆ، واتش: "داوا جە حکومەتو ئاکەپەی مکەرمۍ سیاسەتو ئاشتی و چارەسەری جە سوریانە جابەجێ بکەرۆ، چنی ئیدارەو سەرنیستی و ۋەرکۊتوو سوریای گفتوگۆ بکەرۆ".
باقرخان جەختش کەرڎۆ گفتوگۆو ئاشتی چنی کوردی بە قازانجو تورکیای مەڕیۆوە، تورکیا بە پیادەکەردەی سیاسەتی ئاشتییانەی متاوۆ بۆ بە نموونێوە جە ۋەرکۊتوو مېیامینینە، کوردا جبەرو سنووری هەڕەشۍ نیەنۍ پەی تورکیای بەڵکم دەرفەتو ئاشتیینۍ، واتش: "نکۆڵی و دووروستەیۆ نمەبۆ بە سیاسەت. پەی مسۆگەرکەردەی ئاشتی جە ۋەرکۊتوو مېیامینی، هامپەیمانی هەرێمی و پەیوەندیی کۆمەڵایەتی و ئابووری و کەلتووری گرنگا. ئاماڎێنمۍ پەی پەشتگیری جە هەر هەنگامێوە کە حکومەت چی ڕوۆ منیۆش".
باقرخان جەختش کەردۆ، کوردەکۍ ئینە ٢٠ ساڵێن چارەسەری دیموکراتیک پێشکەش مکەرا، بە گرڎی ١٢ چارەسەریۍ و نەخشەڕێشا پێشکەش کەردێنۍ، واتش: "گرڎو ئی پرۆژا جە ئەرشیفو دۆڵەتینە هەنۍ. داخەم نمەشۆ ئی دەرفەتۍ چارەسەری ۋەروچەما نەگیریۍ. بەپێچەوانۆ، گوزارشتۍ سەرکوتکەردەی ئاماڎۍ کریۍ و پرسو کوردی بە بنبەس یاوا".
"١٢ هاموڵاتیۍ مەدەنیۍ گەشمەرڎۍ بیۍ"
هامسەرۆکۆو گرڎینەو دەم پارتی تولای حاتەم ئۆغۆللاریە ئەرەیاۋناش ۋەرکۊتوو مېیامینی بە پاو دمایین پێشئامایەکا سوریای دیزاین مکریۆ، وە ئی ڕووەدایۍ کاریگەریشا سەرو تورکیای مەبۆ، پەنەوازا ئی پێشئامایۍ پېسە کەردەیۆ بەرەو جەنگێوە گۊرەتەری بوینیۆ، چونکی هێزی پېسە ئەل قاعیدەی و ئەل نوسڕەی و دمایین یاگەگیرشا بە نامۍ دەسەو تەحریر ئەل شامی و چڼین ڕێکوزیۍ گۊرۍ و گولانۍ هامشێوۍ جە سوریا و هەرێمەکەنە بەرکۊتێنۍ، واتش: "ئی ڕێکوزیا جارێوەتەر بەرکۊت. ئی ڕێکوزیا چەتە جە لایەنو دۆڵەتو تورکیوە ئەرەمەرزیان، ئیساتۍ جە سوریانە دژو کوردا جە سەرنیشتوو ۋەرکۊتوو سوریای بەکارمارا. خراپتەرین چێوۍ ئی حکومەتە ۋەرا ۋەر بە تورکیای و هەرێمەکەی کەردەبۊش، درێژەداین بە چارەسەرنەکەردەی پرسو کوردی و هەنگامنیاین پەی وەرمو عوسمانی تازەی.
گەلوو کوردی هامسێما با عالا یان داعش و ڕێکوزیای پېسە داعشی؟".
تولای حاتەم ئۆغۆللاریە داواش کەردە دەسوەردای گرووپە چەتەکا دمایش بۍ و گەلاو سوریای بەشێوێوە دیموکراتیک چارەنوویسشا دیاری بکەرا، وە دەسوەردای تورکیای جە جبەرۆ مردۆ، واتش: "ئارۆ جە هەواڵەکانە دیما، جە عەین عیسا ١٢ هاموڵاتیۍ مەدەنیۍ کە فرەیشا زاوڵۍ بێنۍ، جە لایەنو فڕۆکەی بێ فڕۆکەوانی سوپاو تورکیوە گەشمەرڎۍ کریێنۍ. ڕوانە مەنبەج بۊمبۋاران مکریۆ.
شۊنەماو مەدەنیەکا بۆمبۋاران مکریۆ. جە دلێینەو تورکیاینە ماچا ئاشتی، بەڵام هرووژم مکەرا سەرو مەنبەجی و عەین عیسای و تەل ڕەفعەتی. جەهانێوە چامنە نییا. پەنەوازا هێزە چەکڎارەکا تورکی دمایی بە هرووژمەکاشا بارا. پەنەوازا دڎان بە ستاتۆو کوردارە بنریۆ".
تولای حاتەم ئۆغۆللاریە ناڕەزایش بەربڕی ۋەرا ۋەر بە "قەڎەغەکەردەی" درووشمۆو "ژەنی ژیۋای ئازادی" و چا کاتەنە مایکەکەش وزیارە.
