ڕابەر ئاپۆ ماوەو ٢٦ ساڵان جە زینانو دوورگەو ئیمراڵینە دلێ بارودۆخێ سەختو زیاننینە ڕاگیریان. یۆ جە پەشتیوانا هەڵمەتەو "ئازدای پەی ئۆجالانی، چارەسەری سیاسی پەی پرسو کوردی" پەڕلەمانتارو پەڕلەمانو کانتۆنو تیکنۆی سویسرای د. بێپی ساڤارای دەربارەو بابەتەکا گۆشەگیری، پەیامو ئی دماییەو ڕابەر ئاپۆی و مشتومڕەکا سەریش پەی ئاژانسیما قسێش کەردۍ و ئاماژەش پانەیەدا گۆشەگیری تاوانێوە ڕۆشنەو دژ بە مرۆڤایەتیینە و تنکەردەیۆ گۆشەگیری سەرو ڕابەر ئاپۆین، گێڵۆوە پەی تەرسەو ڕژێمەکەو ئەردۆغانی جە چارەسەرییەکا ڕابەر ئاپۆی پەی کۆو پرسەکا

جە قسەکاشەنە ساڤارای سەرنجش وس سەرو دەورو ئەرەکۆشای نیڵسۆن ماندێلای و ئاماژەش پانەیەدا تەنیا بە ڕابەر ئاپۆی کێشەکا ١٠٠ساڵەو گەلو کوردی چارەسەر بۆنە و ئینەش وات: "ئی دۆخە ئەفریقای پانیشتم ویر وزۆوە. ئەر ماندێلا ئازاد نەبیێ و بەشێوێ چالاک بەشداری کاروبارەکا ئا وڵاتەیە نەبیێ ئانە حەجگیز چارەسەرو بابەتو ڕژێمو ئاپارتایدی و دمایئاردەی پا ڕژێمەیە نۍ ئاراوە. چێوی هەرە گرنگو ئازادی  ماندێلای چارەسەرو ئاشتییانەو جەنگی و دلێنەو ئا وڵاتەیە بێ."

'قسێوە بێ مانانە بە پەکەکەی وچیۆ چەک بنیەرە!'

جە درێژەو قسەکاشەنە ساڤارای گفتوگۆکا ئی دماییەی پێوەس بە پرسو کوردی هۆرش سەنگنا و جەختشکەردۆ چانەی ئەر دۆڵەتو تورکی فاشیستی چارەسەریش گەرەکا، ئانە مشۆم ڕابەر ئاپۆ ئازاد بۆنە، چونکە نەک تەنیا چارەسەریی نییا پەی پرسو کوردی بەڵکوم پەی سەرتاپاو وەرکەوتو ناوەڕاستیش و واتش: "فرە بێ مانانا بە پەکەکەی وتریۆ چەک بنیەرە. پۆکەی وەڵێ ئانەیە پەی چارەسەری سەرو مێزێوە کلێرێ بیمێ، مشۆم داواو ئازادکەردەی عەبدوڵا ئۆجالانی کریۆ. دماو ئانەی ئۆجالان ئازاد بیی، تورکیا نیازپاکی وێش پەی چارەسەری نیشانەدا و فاڕیای جە یاساکانە ئەنجامدریا، ئاکاتە تاوا گفتوگۆ سەرو چەکنیارەو پەکەکەی کریۆ. وەڵێ گرد چێوێ مشۆم تورکیا دەستبەردارو سیاسەت قڕکەردەی و جەنگەردەی جە دژو گەلو کوردی بارۆ. ئەر تورکیا ئینەش ئەنجامدا ئانە بەماناو ئامادەیی جدیی تورکیاین پەی پرۆسەو ئاشتی. یعنی دووێ مەرجێ بنەڕەیێ هەنێ؛ ئازادی عەبدوڵا ئۆجالانی و مدرناو جەنگی جە کوردەسانەنە."

پەڕلەمانتاری سویسری د. بێپی جە هورسەنگناکاشەنە جەختش چانەیە کەردۆ مشۆم گلێرکەو مییاننەتەوەیی بە دەورو وێشا هۆرزا جە بابەتو دەسپنەکەردەو پرۆسەو چارەسەری و ئاشتیانەو تورکیای، ئاماژەش بە دەسەڵاتداری سویسرا و ئەڵمانیا کەرد بە تایبەتی سەرنجش وست سەرو ئەڵمانیای کە تاوۆنە پێسەو هامبەش و نزیکێوە تورکیایی تاۆنە دەور گێڵنۆ سەرو پرۆسەو چارەسەریینە.

'قەرارو قەڎەغەکەردەو پەکەکەی ئاستەنگا پەی چارەسەری'

سیاسەتەمەداری سویسری ساڤارای باسش چانەیە کەرد هەڵوێسو ئەوروپای جە وەراوەرو پەکەکەی ئاستەنگییا وەڵێ چارەسەرو ئاشتییانەو پرسو کوردی و واتش: "فرە خاس زانمێ پەکەکە جنین وسیا 'لیستو تیرۆری'یۆ. ئی هەوڵەو ئاکاتەو ئەڵمانیای دیارییێ پئ پەی تورکیای، زانمێش جە دەستگیرکەردەو ئۆجالانینە ئەمریکا چ دەورێش گێڵنا. گردو ئا چێوا پەی بەرژەوەندی وێشا بێ. مشۆم ئی دۆڵەتێ بە هەڵوێسو وێشارە بلاوە و پەکەکەی جە لیستو تیرۆرینە بەرکەرا."

'ئانێ ئەرەکۆشا سەرێ گنا'

جە دما دماینو قسەکاشەنە پەڕلەمانتارو پەڕلەمانو کانتۆنو تیکنۆی سویسرای د. بێپی ساڤارای جەختش جە گرنگی بەردەوامیدای و ئەرەکۆشای جە هەڵمەتەو جەهانی ئازادی و دەسنیشانکەردەی چارەسەرییەکا بە ئازادی ڕابەر ئاپۆی بۆنە و واتش: "پۆکەی مشۆم گرد یاگێنە هەڵمەتەو ئازادی وەرفراوانتەر کەرمێنە. پێسەو ئانەی ڕۆزا لۆکسمبۆرگ ماچۆ 'ئەرەکۆشای قوربانیش گەرەکا، بەڵام ئانێچ مەکۆشیا ئانە وەڵتەرۍ وێشا دۆڕنان'. پۆکەی جگە جە بەردەومیدای بە ئەرەکۆشای ڕێوە تەرە نییەنە. بە پەیلواو من دمایینە هەر سەرێ گنمێ، بەڵام مشۆم وێما پەی ماوێوە درێژی ئەرەکۆشایما ئامادەکەردە بۆ. پۆکەی بەبێ مردای مشۆم ئەرەکۆشایما بەردەوام کەرمێ."