مامۆسا جە زانشتگەو ڕیدینگی د. دییپا دریڤەرە ڕەخنەش جە بێدەنگی ئەرەمەرزیا میان نەتەوەییەکا ۋەرا ۋەر بە گۆشەگیری گێرت و واتش: "جە ئیمراڵینە نەک بە تەنیا حۊڵمڎا ڕابەرێوە بە زینڎەیی بنیا، بەڵکم ۋەروچەما دنیێوە دمایی بە دادپەرەوەری مۍ جە ئیمراڵینە."
ڕابەروو گەلوو کوردی عەبدوڵا ئۆجالان جە زینڎانوو ئیمراڵینە ماوەی ٢٥ ساڵان ئینا چێروو گۆشەگیری سەختوو ئیمراڵینە، بە گرڎ نەوعۍ بە بەهانۍ دیسپلینی ڕا جە چەمپنەکەوتەی مگیریۆ. ماوەو ٣٨ مانگان بە هیچ نەوعۍ زانیاری دەربارەش بە دەس نمۍ. هەڵمەتەو "ئازاڎیی پەی ئۆجالانی، چارەسەری سیاسی پەی پرسوو کوردی" کە جە ١٠و تشرینی یووەمیۆ دەسشپنەکەردەن، سەروو ئاستی میان نەتەوەیی بە پەشگیری کەردەی کەسایەتیە جیهانیەکا ۋەرفراوانتەرە بیێنە. چا بارۆ مامۆسا جە زانشتگەو ڕیدینگی بەریتانیای، یاگەگیرەو سەرۆکەو جەمەو پارێزنەرا سۆسیالیستی هەلدانی جە بەریتانیا دییپا دریڤەرە پەیوەس بە گۆشەگیرکەردەی ڕابەروو گەلوو کوردی عەبدوڵا ئۆجالانی قسێش کەردۍ و بێدەنگی ئەرەمەرزیا میان نەتەوەییەکاش ۋەرا ۋەر بە گۆشەگیری شەرمەزار کەردۍ.
گۆشەگیری لاوازی ئەنجوومەنوو ئەوروپای بەروزۆ
د. دییپا دریڤەرە ناڕازیبیەیش ۋەرا ۋەر بە ئاژەو گۆشەگیری ئیمراڵی نیشانەدا و باسش چانەی کەرد بە تەنیا دەوڵەتوو تورکی ۋەرپرسیار نیا جە گۆشەگیری ئیمراڵی، ئەرەمەرزیا ئەرکدارەکێچ، بە بێدەنگی ئەرمانایشا ۋەرپەرسێنۍ و واتش: "ئا ئاژەی کە بەڕێز ئۆجالانش ئینا چنە، نەک بە تەنیا شکسوو تورکیاین و مەترسییە گەورەکێش پەی سەروو گەلاو تورکیاینۍ، بەڵکم جە هەمان وەختیچەنە لاوازی ئەنجوومەنوو ئەوروپای نیشانە مڎۆ کە جە جابەجێکەردەی مافەکاو مرۆڤینە ئینا چ ئاستێوەنە. گۆشەگیری قورسوو سەروو بەڕێز ئۆجالانی بێگوومان حۆڵداین پەی بەزینڎەیی نیای بەڕێز ئۆجالانی و تا ئیساتێچ مەزانمۍ ئینا ئیمراڵی یان ئینا شۊنێوەتەرەنە. ماوەو یەرۍ ساڵان هیچ چەمپنەکەوتەیۍ چنی بەڕێز ئۆجالانی نەکریان. ئی گۆشەگیرییە جە هەمان وەختەنە بە ماناو خنیکنای دادپەرەوەریین. ۋەرووئانەی ماچمۍ، پۊکەی نمازمۍ چێوی چانە سەروو ڕابەرۍ ئێژای پێسە ڕابەر ئاپۊیرە بۍ کە جە زینڎانەنە چنڎین کتێبێش نوویستێنۍ."
چنڎین ئەرەمەرزیێما هەنۍ کە بە ئەرکوو ۋێشا هۊرمەئێزا
د. دییپایە ئاماژەش پانەی دا کە گۆشەگیری ئیمراڵینە یاوان بە ئاستێوە بەرز، بەڵام ڕێکوزیا پەیوەندیدارەکۍ بێدەنگی مرمانا و واتش: "جە ئیساتێنە ئا چێوەی کە ڕووبەڕووش بیێنمێوە ئانەنە چنڎین ڕێکوزیێما هەنۍ و ئەرکوو ۋێشا جابەجێ مەکەرا. چێوی فرەشا واتەن بەڵام ئانەی پەنەوازش بە ئەنجامداین دژوو ئی ئاژەیە نەکریان. پۊکاتی سەبارەڎ پی ئاژەیە بیەیشا حیچ ئیسفاڎێوەش نیا.
چنڎین ڕێکوزیۍ و بەشۍ ئۆرگانیێما هەنۍ کە گرنگی بە مافوو مرۆڤی مڎا، بەڵام ئانە پەی ماوەو یەرۍ ساڵان بەڕێز ئۆجالان ئینا ئاژێوەنە کە بەتەمامی جە پەیوەندینە بڕیانەرە. گرڎما چی ئاژەیە ئاگاڎارێنمۍ، ئەنجوومەنوو ئەوروپای ئاگاڎارا، گرڎ قسۍ مکەرا و جە تیڤیەکاوە بەرۍ گنا و قسۍ مکەرا، بەڵام جە ئاستی پراکتیکینە چێش مکەرا؟ ئی سیاسەتمەدارۍ چێش مکەرا و جە هۊرچنیەکا ئەوروپاینە چی مشۊم سەرجە نۆ هورۍ چنیاوە ؟"
