پارتو هەرێمە دیموکراتیکەکا وەڵێ بەستەی حەوتەمین کۆنگرەو ئاسایی وێشەنە، کە جە ١٢و کانوونو دووەمی جە ئەنقەرەنە ملۆڕاوە، گلێرۆبییەیۍ جەماوەریش ئەنجامدا. جە گلێرۆبییەیۆکەینە کە جە هۆڵێوە ئامەدینە لواڕاوە، هامسەرۆکەکاو دەبەپەی چیدەم کلیچگون ئۆچارە و کەسکین بایندرە، چنی تۆلای حاتیمو ئۆغلاریۍ، هامسەرۆکۊو پارتو یەکسانی و دیموکراسی گەلا (دەم پارتی)، موراد چەپەنی، هامسەرۆکو پارتو سۆسیالیستی ستەمونەکریای ئەسەپە، مەرجان تیتیز، هامسەرۆکۊو پارتو تازە بییەیۆ سۆسیالیستی (یەسەکەپە)، جاهید کرکازاک، هامسەرۆکو پارتو دیموکراتیکو گەلا(هەدەپە)، هامسەرۆکو شارەوانییەکا سەر بە دەم پارتی و هەرپاسە نوێنەرو پارتە سیاسی و ڕێکوزیاکا گلێرگەو مەدەنی جە فرەو شارەکانە بەشداریشا چنە کەرد. گلێرۆبییەکەی کە بە وەشی و شاڎی لواڕاوە، نامێ ئا کەسا ئەرەیاویا کە جە سەردەمی تازەنە هامسەرۆکایەتی گرڏی دەبەپەیشا جە ئەستۆنە بۆ.

جە ئەنجامو گلێرۆبییە و چالاکییەکا نە ئەرەیاویا کە دەبەپە جارێوە تەر بە هامسەرۆکایەتی چیدەم کلیچگون ئۆچارۍ و کەسکین بایندەری بەردەوام بۆنە جە کار و چالاکییەکاش. دماو ئەرەیاوناو ئی هەواڵیە، هامسەرۆکەکۍ، چیدەم کلیچگون ئۆچارە و کەسکین بایندرە، لوێ سەرو شانۆی سڵامشا ۋنەو گەلەکەیشا کەرد.