ماوەو ٦٤ ڕوان هەردووە گیریۍ سیاسیۍ کوردی مەزڵوم داغ و عەبدولرەحمان ئەر، ئینۍ زینڎانەکاو پارتوو دیموکراتوو کوردستانی ( پەدەکە)ینە ، بۊنەو پاشێلکەرڎەی مافەکاشاوە مانشا جە وارڎەی گێرتەن، بە پاو سەرچەمێوە تایبەتی کە بە ئاژانسوو هەواڵوو فوراتی(ANF)یش ئەرەیاونا:' بۊنەو مانگێرتەیۊ تەندروسیی عەبدولرەحمان ئەری تێک شییەن و مانگێرتەکەیش لوان قۊناغێوە کە تەرسیش سەروو ژیوایش وەشە کەرڎێنە.'

 هاموەخت ئیسەنە کەسوکاروو مەزڵوم داغی پەی سۊراخوو کوڕەکەیشا جە ئامەدوو سەرنیشتوو کوردستانیوە ئامینۍ پانیشت و ماچا:" بارودۊخوو کوڕەکەیما زینڎاننە فرە خراپا، چونکوم زینڎاننە مافەکاشا پاشێل کەرا و تووشوو ئێشی و ئەشکەنجەی باوە، داواکارێنمۍ جە گلێرگەی میاننەتەوەیی و ڕێکوزیایەکاو مافوو ئینسانی بەیاوە قسۍ و ڕا نەدریۊ مافەکێشا  پاشێلۍ کریا.".

 عەبدولرەحمان ئەر و مەزڵووم داغ  دووۍ گەنجۍ وەڵاتپارێزنۍ  کوردینۍ، کە دماو کوشیای عوسمان کۊسەی وەرپەرسوو میتی تورکی پانیشتوو کوردستانینە، بە تۊمەتەو کەرڎەی ئا هەرمانۍ وەراوەروو ئا وەرپەرسەو میتی، پەدەکە ئا دووە گەنجە وەڵاتپارێزنێشە  گێرتۍ و دادگاێوە نادیارنە سزاو قەنارەدایش ملەرە سەپنۍ، ئیسەنە زینڎانوو هەولێرینە ماوەو سزاکێشا کێشا، وەلۍ بۊنەو ئا پاشلکارییاوە چەنیشا کریا ماوەو ٦٤ ڕوان مانشا جە وارڎەی گێرتەن.

ڕۊو ٢٣ حوزەیرانیمیانەو پەیوەندیێوە تەلەفۊنینە چەنی یانەیشا مەزڵوم داغ ئامەژەش کەرڎەبۍ، کە تەندروسییشا خاس نییا، وێش ١٠ کیلوۍ و عەبدولرەحمان ئەر ٢٠ کیلوۍ کەمشا کەرڎەن.  

 ئیسەنە کە ٦٤مین ڕۊو مانگێرتەیشانە بەتەمامی تەندروسیی عەبدولرحمان ئەری تێک شییەن و قۊناغێوە کە تەرسیی سەروو ژیوایشۊ هەنە. دماین کارڎایۊیچشا دەسەو (دەسوەڵیوستەی یۊگێرتەی دژوو  قەنارەدانی عەبدولرەحمان ئەری و مەزوڵم داغ )ی ئانەیە ماچا کە:" دۊخوو ئا دووە زینڎانییا بەرڎەوام ڕووەو خراپیوە ملۊ، تەنانەت ئا ڤیتامین و دەرمانە تەندروسییانێشا مەدریا پەنە کە بە کەسی مانگێرتەی دریا زینڎاننە، دەسشا بە وەرپەرساو زینڎانی مەیاوۊ و هەوڵۍ پارێزنەرەکایچشا بێئەنجامۍ بیێنێ".

 ئا دەسوەڵێوزە ئاماژە پانەیچ کەرۊ:" ئێمە داوا جە وەرپەرساو زینڎانوو پەدەکەی کەرمۍ، کە دەس ورگێرا جە پاشێلکارییەکاشا وەراوەروو ئا دووە زینڎانییا، هاموەخت داوا جە ڕای گرڎینێچ کەرمۍ هۊشیارۍ با وەرانوەروو ئا دووە گەنجە وڵاتپارێزناو کوردیوە و وێشا بە ساعیبشا بزانا".

س.ز