دەسوەڵێ وستەی ئازادی پەی ڕابەر عەبدوڵا ئۆجالانی جە سوریانە کە ناوەندەکەش ئینا سەرنیشتوو وەرکەوتوو سوریاینە، سەردای چن پارتێوەش کەرد و داواش کەردە ئەرەکۆشای پەی ئازادی ڕابەرو گەلو کوردی عەبدوڵا ئۆجالا بەقوەت بکریۆ.
دەسوەڵێ وستەی ئازادی پەی ڕابەر عەبدوڵا ئۆجالانی جە سوریانە جە چوارچێوەو هەڵمەتەو میان نەتەوەیی "ئازادی پەی عەبدوڵا ئۆجالانی، چارەسەری سیاسی پەی پرسوو کوردی" جە سەردای پارتەکا بەردەواما.
شاندەکە پێکئامابێ جە واتەواچوو دەسوەڵێ وستەکەی فەرزەندە مونزور، ئەنداما دەسوەڵێ وستەکەی فواد چۆلی و گوڵستانە هیبۆی، سەردای ناوەندو پارتو ئاشتی دیموکراتیکی کوردسانی و پارتو دیموکراتیکو کوردی جە سوریانە (پەدەکەسە)، پارتو سەوزی دیموکراتیکی و پارتو لیبراڵی کوردسانیاشا جە قامیشلۆنە کەرد.
شاندەکە چەنی سکرتێرو پارتو ئاشتی دیموکراتیکی کوردسانی تەڵاڵ محەمەدی کۆبیێوە، فەرزەندە مونزور ئامانجو سەرداکەیش ئاشکرا کەرد و ئەرەیاوناش هەڵمەتەو ئازادی میان نەتەوەیی تا مێ گەورەتەر و چالاکتەر بۆ، واتش: "پێویسا ئەرەکۆشایێ یاسایی و مافپەروەری و سیاسی بەهێزتەر کەرمی. پۆکەی ئەبۆ پارتەکێ دژوو ئەرەکۆشی هەڵوێسشا یۆ وزا".
تەڵاڵ محەمەد ئەرەیاوناش ئازادی جەستەیی ڕابەرو گەلو کوردی عەبدوڵا ئۆجالانی پێویستیێوە گرنگو قۆناغەکەین بەتایبەتی پەی چارەسەری پرسو کوردی و پشێوییەکا وەرکەوتو میامینی، واتش: "پێویسا پارتە کوردییەکێ پەی ئازادی جەستەیی عەبدوڵا ئۆجالانی خەبات کەرا. چالاکی پی جۆرە کاریگەر جە بوارو چاندی و سیاسی ئەنجام دریا. ئێمە پێسەو پارتەکەیما، ئامادێنمێ چی بوارەنە هەرمانەکەرمێ".
سەردای ناوەندو پارتوو دیموکراتیکی کوردینە جە سوریا (پەدەکەسە)، ئەندامو کۆمیتەو ناوەندی پەدەکەسە شوکریە حەمۆ جەختش کەردۆ سەرو ئازادی جەستەیی ڕابەرو گەلو کوردی عەبدوڵا ئۆجالانی و واتش: "ئازادی ئێمە، ئازادی گەلو کوردین".
هەرپاسە ئەرەیاوناش پێویسا گرد کەسێوە پەی ئازادی جەستەیی ڕابەرو گەلو کوردی عەبدوڵا ئۆجالانی خەبات و ئەرەکۆشای بکەرۆ.
سەردای پارتی سەوزو دیموکراتیکینە، هامسەرۆکو پارتەکەی لوقمان ئەحمەد واتش: "ئازادی سەرۆکی، کرێڵو چارەسەری پشێوییەکا وەرکەوتوو میامینی و سوریاین. پۆکەی پێویسا پارت و لایەنگرا ئازادی و دیموکراسی، پەی ئازادی جەستەیی ئایی، ئەرەکۆشای یاسایی و سیاسی کەرا".
دماتەر سەردای ناوەندو پارتی لیبراڵی کوردستانیشا کەرد و ئامانجو سەرداکەیشا شرۆڤە کەرد.
سکرتێرو پارتەکەی فەرهاد تەلۆ جەختش کەردۆ پەی ئەرەکۆشای پەی ئازادی جەستەیی ڕابەرو گەلو کوردی عەبدوڵا ئۆجالانی و واتش: "بەشداربییەی .جە هەڵمەتەکێنە، ئەرکێوە ئەخلاقی و نیشتیمانی و ئینسانییا. خەباتو ئێمە چی ڕوۆ بەردەوام بۆ".
