ئارۊ پەنج-شەممە ٢٥و کانوونوو دووەموو ٢٠٢٤، عەبدولئەمیر شەمەرى، وەزیروو دلۍ عێراقی سەرۍ شاروو کەرکوکوو پانیشتوو کوردستانیش دا و چەنی وەرپەرسە ئەمنى و ئیدارىیا شارەکەی کۊ بییۊ.

  دماو کۊبییەیۊش جەنی وەرپەرساو شارەکەی، وەزیروو دلۍ کۊنگرێوە ڕۊنامەوانیینە واتش، قۊناغوو دماتەرینە دا فەرماندەیی پۊلیسوو کەرکوکی دۊسیۍ ئەمنییەو شارەکەی ناوەندوو پارێزگاکەینە و قەزاو حەویجەینە و ناوەندوو شارەکای تەری ورگێرۊ، هامشێوەو پارێزگاکای تەری، کە دۊسیۍ ئەمنییەو ناوەندوو شارەکاش چەنە تەسلیمە کریێنۊ.

حەربەپاو قەرارەکەو وەزارەتوو دلۍ عێراقی، چوار فەوجۍ پۊلیسوو ئامادەو کەرکووکی وزیا سەروو پۊلیسى فیدراڵى، ئینەیچ پێسە ئامادەکاریێوە پەی تەسلیمکەرڎەیوە دۊسیۍ ئەمنیىەو شارەکەی جە سوپێوە پەی پۊلیسی.

 هەرپاسە عەبدولئەمیر شەمەرى وەزیروو دلۍ عێراقی سەبارەت بە قەوەتکەرڎەی دۊخی ئەمنیی شارەکەی واتش: "ئێمە رێکۍ کەوتێنمۍ سەروو ئانەیە کە ئیدارەو پارێزگاکەی پڕۊژەو کامێراو چەمدراریی ناوەندوو شارەکا تەمام کەرۊ چەنی کامێرەی زیرەکوو بازگەکا و ئسەیارەو وشکنای سۊنەری بازگە سەرەکییەکاو شارەکەینە نریارە، کە بازگۍ "گرنگۍ و کاریگەرێنێ" سەروو دۊخى ئەمنىی کەرکوکی و پارێزگاکای تەروو دەوروبەروو کەرکوکی".

 یاگۍ ئاماژەینە، پڕۊسەى دایۊپەنەو دۊسیۍ ئەمنیەو شاروو کەرکوکی جە سوپێوە پەی پۊلیسى وێمانەو شارەکەی بەشێوەن جە هەرماننامەو حکومەتوو ئیساتۍ عێراقی بە سەرۊکایەتیی محەمەد شیاع سودانى سەرۊکوەزیرانوو عێراقی.